Read lango Lodo Cik 33 Bible Online

Lodo Cik 33 - lango bible

Lodo Cik 33

¹Kare ame Muca dano Obaŋa mom ru oto, en olammi jo Icrael winyo,

²kun kobo ni, “Rwot rik obino kun ya i wi Cinai, kun ya i Ceir naka i komwa; kun caro wi kidi me Paran calo ceŋ ame adonyo, obino i joacil tutumia i tutumia, kun leb mac tye alyel i ciŋe tuŋ cem,

³Ateteni, en rik, onwoŋo maro jo mere, en onwoŋo gwoko jo mere acil luŋ i ciŋe; mannono en omio gin bedo lubo yori, kun yin ipwonyogi,

⁴kare ame Muca omio cik pirwa, me bedo gi-alwak a Yakobo.

⁵Mannono rik te miyo Rwot doko abaka i Jecurun, kare ame ocoko otel a lwak karacel, kede atekere luŋ me Icrael.”

⁶“Obaŋa myero omi Reuben bed kwo, kurto, myero kur mi wel jo mere jwik oko,”

⁷Gin ame en okobo i kom Juda ene: “Ama Rwot, winydwon Juda, kele paco baŋ jo mere. Yin ikomi lweny pire, konye lweny i kom okworrere.”

⁸Aco i kom Levi en okobo ni, “Mi baŋ Levi Tumim meri, kede Urim meri baŋ ŋat ame lwori, ame yin rik iomo cunye i Maca, en ŋat arik ipyem kede i dog pii me Meriba.

⁹En ŋat a rik okobo kop i kom pappere kede tottere ni, ‘Mom aparogira pirgi’; pien okwero daŋ omego mere, itine mere ikome daŋ cunye ocao oko,

¹⁰Gin bino pwonyo Yakobo i gin ame iciko, kun daŋ pwonyo Icrael kede cikki; gin bino waŋo odok akur i nyimi, kede mot aŋola ame owaŋo alutu i wi kenoni me lam,

¹¹Ama Rwot, mi gum i kom jo mere, dok daŋ igam gin ame en otio, nyon pyer okworrere piny, karacel kede jo a dage, me gin kur dok ya malo.”

¹²Aco i kom Benjamin en okobo ni, “Ŋat ame Rwot maro, en bedo i laŋete kun bedo kede kuc; Rwot gwoke kare ducu, kun bedo i akina kiddi mere.”

¹³Aco i kom Yucepu en te kobo ni, “Myero Rwot mi gum i lobo mere, kede mot abeco ame ya i polo, kede en ame bino pi pii atut ame opoŋ ite lobo piny,

¹⁴kede gigi mogo abeco ame cek pi ceŋ kede gigi mogo abeco ame cek pi dwe acel acel,

¹⁵kede cammogo abeco ame cek i wi kiddi mogo ame operakino kede jami acek abup i wi tur a ri nakanaka,

¹⁶kede mot abeco ame oya i lobo kede jami luŋ iye, kede winyo a ŋat a rik obedo i yat obuŋere, Rwot myero mi gummono luŋ joye i wi Yucepu kede i ataddi wi ŋat ame oyero i akina omego mere,

¹⁷Atin twonnere me kao tye kede kwogo tuŋe calli me a twon jobi me tim, en bedo coro rok luŋ i tuŋe-nono, tuno kedgi luŋ i agikki me lobo; jo-nono gin jo Epraim tutumia apar, jo-nono gin jo a Manace tutumia i tutumia.”

¹⁸Aco i kom Jabulon en te kobo ni, “Cunyi myero bed yom, yin Jabulon, ka iwot oko; kede yin Icakar daŋ i kemani,

¹⁹Gin bino lwoŋo rok ocele i wi kidigi, kan ame gin mio iye mot oŋolo ame tye kakare, pien gin bino coko lim i nam oko, kede kit lonyo luŋ ame okanne i kwoyo.”

²⁰Aco i kom Gad en te kobo ni, “Rwot myero mi winyo bed i kom ŋat a nyao waŋ lobo a Gad Gad buta piny calo eŋatu, kun kikilo bad lee kede wie.

²¹En oyero lobo aberrere pire kene, i kan ame onwoŋo owekke iye lobo atel me mony; en te wot baŋ otel wi lwak kun notte karacel Icrael me cobo kop a Rwot oŋolo.”

²²Aco i kom Dan en te kobo ni, “Dan obedo atin eŋatu, ame kirre i ŋwec kun ya i Bacan.”

²³Aco i kom Naputali en te kobo ni, “Naputali wee, Rwot omii gum, me ibed twon alonyo me winyo a Rwot nam daŋ myero bed megi giri kede lobo me tuŋ anyarodi.”

²⁴Aco i kom Acer en te kobo ni, “Rwot myero mi Acer bed atin a kome gum kato itino ducu en bed ŋat omaro meicel i akina omego mere en bed ŋat a lwoko tyene kede moo,

²⁵Acer, dogcel me paconi myero obed nyonyo kede mola, tek komi myero medde ameda ito.”

²⁶“Yin Jecurun, ŋattoro be mom acalo Obaŋa, ame ŋweco baro polo me bino konyi, kun beo i kwogo mere i dye pol.

²⁷Obaŋa ame rik tye con i con-ni en ame kabedoni, kare luŋ ciŋe tye piny me tiŋi malo, En oryemo okwor oko i nyimi, kun kobo ni, ‘Tyekgi oko,’

²⁸Mannono omio Icrael obedo i kuc, ikwae a Yakobo te bedo gigi aboŋo ayela moro, lobo ame kal kede koŋo olok dwoŋ iye ata; kan ame toyo totona i polo bido lobo.

²⁹Yin Icrael, ŋa kara a yie yom calo yin, yin rok ame Rwot rik olaro Rwot en obedo kwot me geŋereni, kede pala romoni ame omii iloo piny, Okwori bino miye kengi baŋi, tyeni bino nyono kabedogi luŋ, ame tye i wi atenni kiddi.”