Read lango Lodo Cik 34 Bible Online

Lodo Cik 34 - lango bible

Lodo Cik 34

¹Muca rik te ya i bar me Moab, wot i wi kidi me Nebo, i wi atenni me Piciga malo, ame otikere kede Jeriko. Rwot te nyutte lobo luŋ, cakere i Gilead tuno naka i Dan,

²kede Naputali luŋ, kede lobo Epraim kede Manace, lobo me Juda luŋ tuno kede naka i nam me tuŋ to,

³Negeb kede lobo ame obedo bar, ame en aye luŋ me Jeriko, ame obedo boma me otit, tuno kede naka i Joar.

⁴Rwot te kobbi Muca ni, “Man en lobo ame rik akwoŋo pire baŋ Iburaim, baŋ Icaka, kede baŋ Yakobo, ni abino miyo baŋ ikwaegi. An doŋ amii ineno kede waŋi, cite yin mom ibino tuno iye kuno,”

⁵Muca ame obedo amiro a Rwot, rik te to kuno i lobo me Moab, kun lubo gin ame Rwot onwoŋo okobo;

⁶rik ote yike kuno i luŋ ame tye i lobo Moab ame otikere i Ber-peor, cite mom tye ŋattoro ame ŋeo kan ame oyike iye-nono naka atot tin.

⁷Kare ame en to, onwoŋo doŋ mwaka me dittere romo mia acel kede pyeraryo; waŋe onwoŋo mom ru ocoro, dok daŋ onwoŋo pwod twon lomoro ame teko mere mom ru odok cen.

⁸Jo Icrael rik te koke i bar me Moab pi nino pyeradek; eka nino me koke kede kumo pire rik doŋ te tum.

⁹Pien Muca rik onwoŋo oketo ciŋe i kom Yocwa wot a Nuni omio cuny me ryeko rik te poŋ i kome; mannono te miyo jo Icrael bedo winye, te daŋ bedo tic kite a Rwot rik ociko kede Muca.

¹⁰Cakere i kare-naca mom dok tye adwarpinnyoro ame oya i akina jo Icrael ame rom kede Muca, ame Rwot rik ŋeye kede waŋ i waŋ.

¹¹Mom tye ŋattoro a dok cal kede ka itamo pi anyut, taŋo me awura ame Rwot rikomio en obedo tiyo i Miciri, baŋ Parao kede omiro mere luŋ kede lobo mere luŋ,

¹²kede dok ka itamo pi twoni gigi mogo adoŋodoŋo, dok daŋ iyiliyili, ame en obedo tiyo kun jo Icrael luŋ neno kede waŋgi.