Read lango Lodo Cik 4 Bible Online

Lodo Cik 4 - lango bible

Lodo Cik 4

¹“Aman doŋ ba, wun jo Icrael, gwok wunu icwil luŋ kede gin luŋ ame ociko, ame atye ka pwonyowu kede; myero icob wunugi me ibed wunu kwo, iwot ile wunu lobo ame Rwot Obaŋa a kwariwu tye amiyowu.

²Kur imed wunu kopporo i kom kop ame acikowu kede-ni, dok daŋ kur ibol wunu moro oko iye. Gwok wunu cik a Rwot Obaŋawu luŋ kite ame amio kede baŋwu.

³Rik ineno i waŋwu gin ame Rwot otimo i Baal-peor. Rwot Obaŋawu rik obino oneko jo luŋ ame woro Baal i Peor i akina lwak.

⁴Cite wun luŋ ame imedde wunu moko i kom Rwot Obaŋawu, en pwod itye wunu kwo luŋ naka atot tin.

⁵Nen ba, doŋ atyeko pwonyowu icwil luŋ kede gin ame Rwot Obaŋawu ocika kede, me icob wunugi i lobo ame iceggi wunu leyo me bedo megwu.

⁶Gwok wunu dok daŋ icob wunu, pien mano en ame bino bedo ryekowu kede ŋec a wun itye wunu kede i nyim rok ocele, ame ka gin owinyo icwil magi luŋ, gin bino kobo ni, ‘Ateni, twon rok adwoŋ wok-ki kara ryek ba, dok daŋ gin jo a ŋeo piny.’

⁷Pien mom dok tye twon rokkoro ocele adwoŋ ame obaŋagi bedo ceggi kedgi kite acalo Rwot Obaŋawa bedo ceggi kedwa i kare luŋ ame okok baŋe.

⁸Dok mom daŋ tye twon rokkoro adwoŋ ame tye kede icwil kede gin ame ociko baŋgi atira a rom i cik ame tin aketo i nyimwu-ni.

⁹“Ento nen aber ni igwokere wunu atek, Kur imi wii wil i kom gin ame ineno wunu. Kur imigi rweny oko i cunywu pi kare me kwowu luŋ. Tit wunu pire baŋ itinowu kede baŋ ikwaewu me gin daŋ ŋe,

¹⁰kite ame rik icuŋ wunu kede i nyim Rwot Obaŋawu i Koreb, i nino ame Rwot rik okobba iye ni, ‘Cok lwak luŋ i nyima, me amigi owiny koppa, me opwony lwora i kare luŋ ame gin obino bedo kede kwo i wi lobo, me wek gin daŋ pwony kede itinogi.

¹¹Rik i te bino wunu cuŋ aceggi i te kidi, kun mac tye awaŋ i kidi, leb mac otuno malo i polo, i piny acol icuc, kede pol ocule acula ikuna.’

¹²Rwot rik te kop kedwu i dye mac. Rikite winyo wunu dwon keken kun mom ineno wunu ginnoro; dwon keken en ame owinyere.

¹³En rik te tittiwu ni, cikere mere ame en ociko ni myero icob wunu, ame en cik apar en ocoogi i kiddi apada aryo.

¹⁴I kare-nono Rwot rik te cika ni apwonywu kede cik luŋ kede gin ame ociko luŋ, me wek iwot igwok wunu i lobo ame iwot wunu gamo ca me bedo megwu.

¹⁵“Myero igwokere wunu atek ba, Kite acalo rik mom ineno wunu cal ginnoro i kare ame Rwot rik kobo kedwu i dye mac a lyel,

¹⁶pi mannono, myero kur ikel wunu cannoro i komwu kenwu pi tiyo wunu cal ginnoro ame ipao wunu apaa pirwu kenwu, kadi kit callogo ame iporo wunu i cal kom ginnoro keken, ico onyo dako.

¹⁷Onyo ame iporo wunu i lee moro ame tye i wi lobo, onyo winyo moro ame twarre i bwome malo i yamo,

¹⁸onyo ginnoro ame lak alaka i lobo, onyo reccoro ame bedo i pii ame tye i te lobo.

¹⁹Ka ce itiŋo waŋwu malo ite neno wunu ceŋ kede dwe kede lwak acer apipim, ame gin luŋ obedo mony me polo, kur imi waa tamwu terwu wot ryebere piny i nyimgi worogi, Rwot Obaŋawu opokogi baŋ rok luŋ ame tye i te polo acalo jami me awora,

²⁰ento Rwot rik oyerowu te kwanyowu oko i Miciri, ame rik cal i ot alyet ame oteto iye nyonyo, me ibed wunu jo mere ikome, kite ame itye wunu kede i kare man.

²¹Dok daŋ rik akemo omako Rwot ikoma pirwu, te kwon ni an mom abino ŋolo kulo Jordan, mom abino tuno i lobo aber ame Rwot Obaŋawu tye ka miyowu me bedo megwu.

²²An ata i lobo man kun mom aŋolo kulo Jordan, ento wun ibino wot wunu loka, i lobo aber ca i te gamo wunu bedo megwu.

²³Gwokere wunu ba, me wiwu kur wil oko i cikere a Rwot Obaŋawu ame en rik ocikere kede kedwu. Kur iti wunu cal ginnoro ame opao apaa ame cal i kom ginnoro ame yam Rwot Obaŋawu ociko ni kur itim wunu.

²⁴Pien Rwot Obaŋawu en mac ame waŋo piny, en Obaŋa ame nyek.

²⁵“Ka doŋ iri wunu kuno ame inywalo wunu itinowu kede ikwaewu, ka ce iballe wunu pi tiyo calloro ame opao apaa ame cal i ginnoro, kede timo ginnoro ame nen arac i nyim Rwot Obaŋawu, me iroke wek akemo make;

²⁶an tin alwoŋo polo kede lobo me bedo cadenna i komwu, ni ibino ru to wunu luŋ i lobo ame iwot wunu ŋolo Jordan me wot leyo bedo megwu. Mom ibino ri wunu iye kare alac, ento obino ru jwerowu oko iye.

²⁷Dok Rwot bino keketowu oko atata i akina rok papat, welwu ame bino doŋ i akina orok kan ame Rwot aryemowu iwot wunu iye, bino dok piny.

²⁸Ibino woro wunu kit obaŋe apol atata kuno, obaŋe ame otio i yen kede kiddi, gin ame otio i ciŋ, a mom neno, a mom winyo kop, a mom daŋ cemo, akadi ŋweyo ginnoro.

²⁹Ibino doŋ yenyo wunu Rwot Obaŋawu, ibino nwoŋe wunu daŋ ka ce iyenyo wunu kede cunywu luŋ kede tipowu luŋ.

³⁰I cennere doŋ ka piny oloowu kun jami magi luŋ doŋ otimere i komwu, ibino lokere wunu dwogo cen baŋ Rwot Obaŋawu, ite daŋ winyo wunu koppere. En mom bino wekowu, dok daŋ mom bino tyekowu oko. Wie mom bino wil i cikere mere ame rik ocikere kede baŋ kwariwu, ame rik ekwoŋo baŋgi,

³¹Pien Rwot Obaŋawu, en Obaŋa ame akica.

³²“Koŋ ipeny wunu pire i kare a doŋ okato oko i ŋec, kare ame rik mom ru onywalowu, cakere i kare Obaŋa oketo iye dano i wi lobo; cak penyo pire i agikki piny tuŋ cel tuno kede tuŋ ocele; inen ka ce yam koŋ twon ginnoro adwoŋ calo man otimere, onyo yam koŋ owinyo pire.

³³Tye rokkoro ame yam koŋ owinyo dwon obaŋagi kun kobo i dye mac, acalo wun ame yam koŋ iwinyo wunu eka dok te bedo kow?

³⁴Onyo yam koŋ tye obaŋa moro ame otemo kwanyo rokkoro me bedo mege kene i akina rok ocele kun temo cuny rokkono i yore apol, kede anyuttogo, kede taŋo mogo me awura, kede lweny kede ciŋ atek, kede bad ame oryeo, kede twon lworo adwoŋ, ame rom i gin ame Rwot Obaŋawu otimo i kom lobo Miciri kun waŋ oneno kede waŋwa?

³⁵Magi luŋ rik onyuto baŋwu wek iŋe wunu ni Rwot en Obaŋa; mom dok tye Obaŋa moro ocele.

³⁶En omio wun iwinyo wunu dwone i polo me epwonywu wek eyik kitewu; dok daŋ onyuttiwu maccere adwoŋ i lobo, dokite winyo wunu daŋ koppere i dye mac.

³⁷Pien en rikomaro kwariwu eka te yero ikwaegi, ame gin onywalo, rik te kwanyogi oko i lobo Miciri pi teko mere adwoŋ kun en ikome tye kedwu,

³⁸kun ryemo i nyimwu rok adoŋo dok atek a katowu oko me wek ekelwu i lobogi, me emiwu lobogi bed megwu, kite ame tye kede naka atot tin.

³⁹Myero doŋ tin iŋe wunu dok iketo wunu cunywu ni Rwot en Obaŋa malo i polo kede piny i lobo; mom dok tye Obaŋa moro ocele.

⁴⁰Pi mannono myero imak wunu icwillere, kede gin ame en ociko luŋ ame tin an acikowu kede, me wek nyimwu kede me itinowu ame bino lubo ŋewu bed acil, me iperakino wunu kare alac i lobo ame Rwot Obaŋawu tye ka miyowu me bed megwu atwal.”

⁴¹I kare-nono Muca te poko boma adek i yo tutuŋ kide, loka Jordan,

⁴²me wek ŋat oneko nek riŋ lar kuno; me wek ŋat a mom oneko awottere me akaka, kun onwoŋo amone moro gire mom i akinagi i kare okato, wek ka en oriŋo i boma moro i akinamagi, en bino laro kwo mere:

⁴³Gin boma-nogo rik obedo Bejer ame tye i tim, i lobo opette, pi jo Reuben, Ramot i Gilead pi jo Gad, kede Golan i Bacan pi jo Manace.

⁴⁴Man en cik ame rik Muca oketo i nyim jo Icrael.

⁴⁵Magi gin kop me caden, icwil, kede kop ame rik ociko ducu, ame Muca okobo baŋ jo Icrael i kare a doŋ gin oya oko i Miciri,

⁴⁶a doŋ otye loka Jordan, i luŋ ame otikere i Bet-peor, i lobo Cikon abaka a jo Amor ame rik bedo i Kecbon ame rik Muca kede Icrael oloo i kare ame gin doŋ oya oko i Miciri,

⁴⁷Gin rik otero lobo-nono obedo megi karacel kede lobo a Og abaka me Bacan. Magi gin obakki aryo me a jo Amor ame rik onwoŋo bedo loka Jordan tuŋ kide.

⁴⁸Lobo-nono rik obedo lobo luŋ ame ocakere i Areor ame tye i ŋet luŋ me Arnon, tuno kede i kidi me Cirion (ame en Kermon),

⁴⁹karacel kede Araba luŋ ame tye i kor kidi me Piciga.