Read lango Lodo Cik 6 Bible Online

Lodo Cik 6 - lango bible

Lodo Cik 6

¹“Magi en cik, icwil kede gin ame Rwot Obaŋawu ociko ni apwonywu kede, me iwot icob i lobo ame iwot wunu gamo me bedo megwu loka ca.

²Pi kare me kwowu luŋ, wun karacel kede itinowu kede ikwaewu, ibino lworo wunu Rwot Obaŋawu, kun igwoko wunu icwillere luŋ kede cikere ame acikowu kede. Mannono bino miyo iperakino wunu kare alac.

³Pi mannono winy ba, yin icrael, gwokere me cobogi, me nyimi bed acil, dok daŋ inya apol meicel, kite ame rik Rwot Obaŋa a kwariwu rik ociki kede, i lobo ame cak kede moo kic mol amola iye.

⁴“Winy ba, yin Icrael. Rwot Obaŋawa en Rwot acel.

⁵Mar Rwot Obaŋani kede cunyi ducu, kede tiponi luŋ kede tekoni luŋ.

⁶Cik magi luŋ aciki kede tin-ni, myero imi bed i cunyi;

⁷dok daŋ ibino pwonyo itinoni atek meicel. Kop kop i komgi ka itye paco, ka itye iwot iyo, ka ibuto kede ka iya doŋ malo i kabuto,

⁸Twegi i ŋut ciŋi, obed me anen; twe daŋ i tur nyimi.

⁹Cogi daŋ i kom yen me doggola odi, kede i dogcel.

¹⁰“Rwot Obaŋawu bino kelowu i lobo ame rik okwoŋo pire baŋ kwariwu Iburaim, kede Icaka kede Yakobo ni ebino miyowu, lobo ame tye iye boma abeco meicel ame wun mom igero wunu;

¹¹gedo iye luŋ opoŋ iye jami abeco meicel ame mom wun en iketogi wunu iye. Akoŋ apipim daŋ tye iye ame doŋ okunyo oko ame wun mom ikunyo wunu, potti olok kede me jeituni daŋ tye iye apipim ame wun mom ipito wunu. Doŋ ba, ka ce ibino camo wunu ite yeŋ wunu,

¹²myero igwokere wunu, wiwu kur wil oko i kom Rwot ame okwanyowu i lobo Miciri, i ot me opii.

¹³Lwor wunu Rwot Obaŋawu, ti wunu ticcere, ti wunu kede nyiŋe ka ce ikwoŋo wunu kwoŋoro.

¹⁴Kur ilub wunu Obaŋa mogo ocele, ame obedo me a rok luŋ omano laŋetwu.

¹⁵Ka ce ibino timo wunu kittono, akemo bino mako Rwot Obaŋawu i komwu, te tyekowu oko i wi lobo. Pien Rwot Obaŋawu ame tye i akinawu, en.

¹⁶“Kur iom wunu yi Rwot Obaŋawu, Obaŋa ame nyek kite a rik iomo wunu kede yie i Maca.

¹⁷Ketto cunywu meicel igwoko cik a Rwot Obaŋawu luŋ kede koppere me caden, kede icwil luŋ, ame en ocikowu kede.

¹⁸Ti wunu gin ame tye ateni dok daŋ ame ber i nyim Rwot, me nyimwu bed cil, me iwot idony wunu i lobo aber ame Rwot Obaŋawu okwoŋo pire ni ebino miyo baŋ kwariwu, iwot igam wunu bed megwu.

¹⁹En bino ryemo okworwu oko i nyimwu, kite ame Rwot okobo.

²⁰“I kare i nyim ka atinni bino penyi ni, ‘Kara kop me caden te koppere ŋo, karacel kede icwil luŋ kede gin ame ociko ame Rwot Obaŋawu ocikowu iye-ni?’

²¹Yin ibino kobbe ni, ‘Wan rik obedo opii a Parao i Miciri, Rwot rik te kwanyowa oko i kuno kede ciŋe atek.

²²Rwot rik onyuto anyuttogo kede taŋo mogo me awura, ame doŋodoŋo dok alit meicel i kom jo Miciri kede i kom Parao kede i kom jo ode luŋ kun wan oneno kede waŋwa.

²³En rik te kwanyowa oko i kuno, me kelowa kan, wek emiwa lobo ame rik ekwoŋo pire ni emiyo baŋ kwariwa.

²⁴Rwot rik ocikowa ni myero wan ocob icwil magi luŋ, myero daŋ olwor Rwot Obaŋawa me obed aber nakanaka, me en gwokwa obed kwo, kite ame otye kede-ni.

²⁵Ka ce ogwokere icobo cik magi luŋ i nyim Rwot Obaŋawa, kite ame en ocikowa kede, obino bedo jo ame kitewa atira’.