Read lango Lodo Cik 7 Bible Online

Lodo Cik 7 - lango bible

Lodo Cik 7

¹“Ka doŋ Rwot Obaŋawu bino kelowu i lobo ame idonyo wunu iye, me wot gamo wunu bedo megwu, kun ryemo rok apol oko i nyimwu, jo Kitti, jo Girgac, jo Amor, jo Kanaan, jo Kivi, kede jo Jebuc, gin luŋ rok kany wie aryo adoŋodoŋo, dok ame otek okatowa oko,

²ka ce Rwot Obaŋawu bino miyogi i ciŋwu, ite loyo wunugi, myero ijwergi wunu luŋ acalo gin me kwer. Kur icikere wunu kedgi, kur daŋ ibed wunu kede kica moro baŋgi,

³Kur inyomere wunu kedgi, kur imi anyirawu baŋ awobegi, dok kur daŋ inyommi wunu awobewu anyiragi.

⁴Pien gin bino balo wi awobewu oko iluba, ote lunyo woro obaŋa mogo ocele; mannono bino miyo akemo mako Rwot te ru tyekowu oko.

⁵Ento myero itimgi wunu kit man: mumuko wunu keno me yalo jogigi oko, ret wunu kiddigi ame ocibo me awora piny, toŋu Acerimgi oko, waŋ wunu calgi ame opao apaa oko kede mac.

⁶“Pien wunu ibedo wunu jo acil; wun ibedo wunu jo a Rwot Obaŋawu. Rwot Obaŋawu otyeko yerowu i akina rok luŋ ame tye i lobo me ibed wunu jo mere en ikome.

⁷Mar a Rwot rikomoko i komwu, te yerowu, mom pi welwu ame pol kato me a rok ocele, wun en ame onwoŋo doŋ inok wunu meicel i kom rok ocele luŋ.

⁸Ento pien Rwot Obaŋawu rikomarowu, te gwoko kwoŋŋere a rik ekwoŋo baŋ kwariwu, en omio en okwanyowu kede teko me ciŋe, te lakorowu oko i ot me opii i ciŋ Parao, abaka me Miciri,

⁹Myero doŋ iŋe wunu ni Rwot Obaŋawu, en Obaŋa ame genne, ame gwoko cikere mere, dok daŋ gwoko marrere a mom lokere baŋ lwagi jo tutumia ame mare, dok daŋ mako cikkere luŋ.

¹⁰Ento culo kwor i kom jo ame dage, kun nekogi oko. En mom bino weko ŋat a dage, en bino culo kwor i kome.

¹¹Pi mannono myero igwokere wunu i cobo cikkere, kede icwillere, kede gin ame ociko, ame acikowu kede tin.

¹²“Ka ce iwinyo wunu cik magi, ite mako wunu kun daŋ icobo wunu, Rwot Obaŋawu daŋ bino gwoko cikere mere, karacel kede marrere a mom lokere ame rik ekwoŋo pire baŋ kwariwu.

¹³En bino marowu dok bino miyowu gum, bino miyo welwu medde, dok daŋ bino miyo gum i kom itinowu ame ibino nywalo kede i kom gin ame bino cek i pottiwu, i kom kalwu, kono olok, kede moowu; karacel kede i kom itino dok kede i kom itino rommi, i lobo ame rik en okwoŋo pire baŋ kwariwu ni ebino miyowu.

¹⁴Obino miyowu gum ame kato rok ocele ducu; ico moro onyo dako moro mom bino bedo oraŋa i akinawu, onyo i akina limwu akwo.

¹⁵Rwot bino kwanyo kit two luŋ i akinawu. Two moro arac mom bino poto i komwu acalli me Miciri ame rik ikanyo wunu. Rwot bino miyo kodi two-nono poto i kom jo luŋ ame dagowu.

¹⁶Nek wunu jo luŋ ame Rwot Obaŋawu bino miyo i ciŋwu. Kica kur makwu i komgi, dok daŋ kur ilwor wunu obaŋegi; pien gin bino doko kumma me cikowu.

¹⁷“Aco ka ce yam ibedo paro i cunyi ni, ‘Rok magi doŋodoŋo katowa oko; atwero ryemogi niŋo?’

¹⁸Kur ibed i lworo moro i komgi, ento wii myero kur wil i kom gin ame Rwot Obaŋawu yam otimo i kom Parao kede i kom jo Miciri luŋ,

¹⁹Poyo kite ame otemogi kede kun wun ineno wunu kede waŋwu, karacel anyuttogo kede taŋo me awura, kede teko me ciŋ kede bade ame oryeo, ame Rwot Obaŋawu yam okwanyowu kede i kuno. Rwot Obaŋa bino timo kittono i kom rok luŋ ame ilworogi-nono.

²⁰Dok daŋ Rwot Obaŋawu bino coro lwak pipino apipim i akinagi, tuno waŋ ame otyeko jo ame onwoŋo odoŋ, ame oponniwu oko.

²¹Kur imi wunu koyo onyere i komwu, pien Rwot Obaŋawu tye i akinawu, en twon Obaŋa adwoŋ meicel.

²²Rwot Obaŋawu bino ryemo rok magi i nyimwu momot; mom itwero tyekogi wunu oyotoyot, naka mio leyi me tim nya apol meicel te yelowu.

²³Ento Rwot Obaŋawu bino miyo rok magi luŋ i ciŋwu, bino babanogi oko, tuno waŋ ame ityekogi wunu.

²⁴Bino daŋ miyo obakkigi i ciŋwu, eka ite miyo wunu nyingi rwenyo oko i wi lobo. Mom tye moro i akinagi ame bino cuŋ i nyimwu; tuno ka ityekogi wunu ducu.

²⁵Waŋ wunu cal obaŋegi oko ame opao apaa i mac. Kur ipar wunu pi ryal kede jabu ame tye i komgi, kur daŋ iter wunu me miyo doko megwu, naka mio gin doko kumma me mokowu; pien mannono obedo gin me kwer baŋ Rwot Obaŋawu.

²⁶Kur ikel wunu ginnoro me kwer i udiwu, ame mio idoko wunu jo oceno calo gin. Myero ikwer wunu oko, cunywu daŋ ca oko atwal, pien gin obedo gin ame myero jwer oko ducu.