Read lango Lakana 1 Bible Online

Lakana 1 - lango bible

Lakana 1

¹I agege onwoŋo tye Kop. Kop onwoŋo tye baŋ Obaŋa. Kop rik en Obaŋa.

²I agege en obedo baŋ Obaŋa.

³Jami ducu rik ocako bedo tye pire; mom tye ginnoro ame ocako bedo tye aboŋo eno

⁴Kwo rik tye baŋe, kwo rik obedo ceŋ baŋ jo.

⁵Ceŋ tye aryeny i piny acol, piny acol pe owumo.

⁶Rik tye dano ame Obaŋa ooro, nyiŋe Lakana.

⁷En rik obino pi bedo caden, wek etit kop i kom ceŋ, me jo luŋ ye Obaŋa pi koppere.

⁸En rik mom ceŋ ikome, ento obino me bedo caden pi ceŋ.

⁹Ceŋ me ateni ame menyo jo luŋ onwoŋo tye abino i lobo.

¹⁰En con obedo i lobo, lobo ocako bedo tye pire, ento jo i lobo mom oŋee.

¹¹Rik en obino i pa co mere, jo mere mom ogame.

¹²Jo ducu a nwaŋ ogame, kun oye nyiŋe, en omiogi twer me doko otino Obaŋa,

¹³kun mom onywalogi kede remo, kadi i mit me kom, onyo i mit a dano, ento pi twer Obaŋa.

¹⁴Kop rik olokere odoko dano, obedo i akinawa. Wan oneno kwogo mere, ame rom kede kwogo atin acel kene ame oya i baŋ Obaŋa Papo; kica kede ateni ceŋ opoŋ baŋe.

¹⁵Lakana otito pire, oredo ni, “Man en dano ame rik akobo kop i kome ni, ‘Tye dano ame alubo ŋea, en dit kata, pien yam en okwoŋo nyima con.’ ”

¹⁶Wan ducu omeddiwa kica i kom kica, ame oya i lonyo mere apol.

¹⁷Pien cik nwaŋ omio kun bea baŋ Muca, ento kica kede ateni Yecu Kricito en okelo.

¹⁸Mom tye ŋattoro a yam koŋ oneno Obaŋa, kono Wod acel keken ame bedo i kor Obaŋa Papo, en ame onyutti jo Obaŋa.

¹⁹Man en kop me caden ame Lakana otito, ka jo Judaya rik ooro olamdog kede jo Levi ame oya i Jerucalem pi penye ni, “Yin i ŋa?”

²⁰En otuco kannaler, mom okwero, otuco ni, “An gira mom a Kricito.”

²¹Dok ote penye ni, “Kara yin i ŋa? Yin Elia bo?” Ogamo ni, “Aa, pe.” “Onyo yin adwarpiny ca bo?” En ogamo ni, “Pe gire.”

²²Dok onwoo penye ni, “Yin i ŋa? Wek odwok kop baŋ jo ame oorowa. Kara ilwoŋere keni ni yin i ŋa?”

²³Ogamo ni, “An dwon dano a redo i tim ni, ‘Tir wunu yo a Rwot,’ acalo adwarpiny Icaya rik okobo.”

²⁴Jo ame ooro, mogo nwaŋ obedo Oparicayo.

²⁵Gin openye ni, “Ibatija jo piŋo, ka yin mom i Kricito, kadi Elia onyo adwarpiny-nyu?”

²⁶Lakana ogamo doggi ni, “An abato jo kede pii, ento tye dano moro ame ocuŋ i akinawu, ame pe iŋeo wunu.

²⁷En ŋat ame alubo ŋea, an mom aromo gonyo waro mere.”

²⁸Mannono ducu otimere i Betania loka kulo Jordan, kan ame onwoŋo Lakana batija jo iye.

²⁹Orwo mere Lakana oneno Yecu kun abino baŋe, te kobo ni, “Neno wunu Atin-romo Obaŋa ame kwanyo bal me lobo.

³⁰Man dano a rik akobo pire ni, ‘Tye ŋattoro ame alubo ŋea, en dit kata, pien yam en okwoŋo nyima con.’

³¹An daŋ yam pe aŋee; ento gin omio an abino kun abatija jo kede pii, me nyute baŋ jo Icrael.”

³²Lakana omio kop me caden kun kobo ni, “Rik aneno Cuny Acil acalo amam, olyao piny kun ya i polo, opoto i kome, obedo kede.

³³An daŋ yam mom aŋee; ento ŋat ame oora me batija jo kede pii okobba ni, ‘Ŋattoro ame ibino neno Cuny Acil ame olyao, opoto i kome, te bedo kede, mano en ŋat ame bino batija jo kede Cuny Acil.’

³⁴Daŋ rik aneno dok amio kop me caden kannaler ni, ‘Man en Wot Obaŋa.’ ”

³⁵Orwo ocele Lakana dok ocuŋ kede jo aryo ame i akina jo mere a lube.

³⁶En oneno Yecu ka woto, te kobo ni, “Neno wunu Atin-romo Obaŋa.”

³⁷Olubbe aryo-nu owinyo ka en kobo kop man, ote wapo yo Yecu.

³⁸Yecu olokere onenogi owapo yore, te penyogi ni, “Iyenyo wunu ŋo?” Gin ogamo kun openye ni, “Rabbi”, (ame te koppere ni, Apwony) ibedo kwene kara?

³⁹Yecu okobbigi ni, “Biye inen wunu.” Gin obino, oneno kan a en bedo iye, ote rio baŋe i ceŋnono, pien onwoŋo caa tomon ceggi romo.

⁴⁰Anderiya omin a Cimon Petero rik en dano acel i akina jo aryo ame gin owinyo gin a Lakana okobo, ote wapo yo Yecu.

⁴¹En ogeo yenyo ominnere Cimon, okobbe ni, “Wan otyeko nwoŋo Maciya” (ame te koppere ni, Kricito).

⁴²Okele baŋ Yecu, Yecu daŋ te nene, te kobbe ni, “Yin i Cimon wot a Lakana; obino lwoŋi ni Kepa” (ame te koppere ni, Petero[1]).

⁴³Orwo mere Yecu omito wot i Galilaya. En onwoŋo Pilipo okobbe ni, “Luba.”

⁴⁴Pilipo rik en dano me Betecaida; en paco acel-Iu Anderiya kede Petero daŋ bedo iye.

⁴⁵Pilipo dok te nwoŋo Nacaneri, okobbe ni, “Otyeko nwoŋo dano ame rik Muca ocoo pire i cik, kede odwarpiny daŋ, en Yecu me Najaret, wot a Yucepu.”

⁴⁶Nacaneri openye ni, “Gin aber twero ya i Najaret daŋ?” Pilipo okobbe ni, “Koŋ ibiye inen.”

⁴⁷Ka Yecu oneno Nacaneri kun abino baŋe, okobo kop i kome ni, “Nen dano me Icrael me ateni, ame goba pe i yie.”

⁴⁸Nacaneri openye ni, “Iŋea niŋo?” Yecu okobbe ni, “Ame Pilipo pe ru olwoŋi, kun pwod itye i te oduro, onwoŋo doŋ aneni oko.”

⁴⁹Nacaneri ogamo doge ni, “Rabbi, yin i Wot Obaŋa! Yin Abaka a jo Icrael!”

⁵⁰Yecu odokke iye ni, “Yin iye pi kop ame akobbi ni, ‘Aneni i te oduro?’ Ibino neno gigi mogo adito akato man,”

⁵¹Dok omedde kobbe ni, “Ateni akobbiwu ni ibino neno wunu polo kun oyabere, kun omalaika Obaŋa yito malo dok oluŋere piny i kom Wot a dano.”