Read lango Lakana 10 Bible Online

Lakana 10 - lango bible

Lakana 10

¹“Ateteni akobbiwu ni, ŋat a mom donyo i dog an ok rommi, ento yito i kan ocele, dano-nono akwo, dok ayak;

²ento ŋat ame donyo i doggola, en akwat rommi.

³Agwok-doggola yabbe, rommi winyo dwone; en lwoŋo rommi mere kede nyiŋgi, terogi oko.

⁴Ka doŋ ocwao mege ducu oko, en woto i nyimgi, rommi lube, pien oŋeo dwone.

⁵Gin mom lubo welo, ento oriŋo oko i baŋe, pien gin mom ŋeo dwon welo.”

⁶Yecu okobo carokop man baŋgi, ento gin pe oniaŋ i te kop ame en otito baŋgi.

⁷Yecu dok okobbigi ni, “Ateteni akobbiwu ni, an a doggola me rommi.

⁸Jo luŋ ame rik okwoŋo nyima gin okwo dok oyak; ento rommi mom owinyogi.

⁹An a doggola; ka ŋattoro odonyo i baŋa en bino bwot; bino donyo, kato oko, te nwoŋo cam.

¹⁰Akwo pe bino pi ginnoro ocele, kono pi kwalo, kede neko, kede tyeko; an abino wek gin nwoŋ kwo, gin bed kede adwoŋ.

¹¹An akwat aber. Akwat aber jalo kwo mere pi rommi.

¹²Ŋat ame tio pi ocara, a mom akwat, kun rommi pe mere ikome, ka oneno apet tye abino, weko rommi te riŋo oko; epet makogi, keketogi.

¹³En riŋo oko, pien en tio pi ocara keken, mom paro pi rommi.

¹⁴An akwat aber; aŋeo rommi mera, rommina daŋ ŋea.

¹⁵Acalo Papo ŋea, an daŋ aŋeo Papo; ajalo kwona pi rommi.

¹⁶Atye kede rommi ocele daŋ, a mom me an ok man, myero daŋ akelgi. Gin bino winyo dwona, obino doko lwak acel kede akwat acel.

¹⁷Gin omio Pappa mara, pien ajalo kwo mera, wek doki agam.

¹⁸Ŋat ame mao i baŋa mom tye; ajalo gira kena. Atye kede twer me jalo kwo mera, dok atye kede twer me gamo odoco; anwoŋo cik man baŋ Pappa.”

¹⁹Apokapoka dok obedo i akina jo Judaya pi kop man.

²⁰Polgi okobo ni, “En tye kede cen, ajarapoa; pi ŋo iwinye wunu?”

²¹Jo ocele okobo ni, “Kop man pe mea ŋat a tye kede cen. Cen twero yabo waŋ jo ame wangi oto?”

²²I kare ca ecuban me poyo kwero ot Obaŋa obedo i Jerucalem;

²³Onwoŋo kare me iporo, Yecu onwoŋo tye a wot i ot Obaŋa, i te baraja a Culeman.

²⁴Ojudaya ocokere, ogure dyere, ote penye ni, “Ibino miyo obedo kala akala pi kare a rom mene? Ka yin i Kricito, tittiwa atira.”

²⁵Yecu odokkigi iye ni, “Atye ko tittiwu, wun mom iye wunu. Tic ame atio i nyiŋ Pappa gin caden mera.

²⁶Wun ikwero ye wunu pien mom itye wunu i akina rommi mera.

²⁷Rommina winyo dwona; an aneogi, gin luba,

²⁸amiogi kwo a perakino odoco. Gin mom bino to nakanaka; ŋat ame bino mayogi i ciŋa mom.

²⁹Pappa ame omiogi baŋa dwon ame kato luŋ, mom tye ŋattoro a twero mayogi i ciŋ Pappa.

³⁰An kede Pappa wan acel.”

³¹Ojudaya dok okwanyo gwene me nape kede.

³²Yecu okobbigi ni, “Atyeko nyuttiwu tic abeco apol ame oya i baŋ Pappa; imito wunu napa i gweŋ pi ticcene?”

³³Ojudaya ogamo doge ni, “Mom pi ticcoro ame ber, ento pi yeto Obaŋa, ame kun yin i dano adana, ikette keni ni yin Obaŋa.”

³⁴Yecu odokkigi iye ni, “Mom ocoo i cikwu ni, ‘An akobo ni wun obaŋa?’

³⁵Ka en lwoŋo jo ame kop Obaŋa obino baŋgi ni gin obaŋa, (coc a yam ocoo mom tur)

³⁶wun ikobo wunu baŋ ŋat ame Papo olonyo, oore i lobo ni, ‘Yeto Obaŋa’, pien akobo ni, ‘An a Wot Obaŋa?’

³⁷Ka mom atio tic a Pappa, pe myero iye wunu an;

³⁸ento ka atio ticcere, kadi bed mom iye wunu an, myero iye wunu tic, wek iŋe dok iniaŋ wunu ni, Papo tye i an, kede an atye i Papo.”

³⁹Gin dok te temo make, ento en te lwi oko i ciŋgi.

⁴⁰Dok owoto loka Jordan, i kabedo kan a Lakana koŋ obatija jo iye. En obedo kuno,

⁴¹jo apol obino baŋe. Gin te kobbe ni, “Lakana rik mom otio anyuttoro, ento gin ducu ame Lakana otito i kom dano man obedo me ateni.”

⁴²Jo apol oye en i kuno.