Read lango Lakana 11 Bible Online

Lakana 11 - lango bible

Lakana 11

¹Rik tye dano moro ame kome lit, nyiŋe Lajaro me Betania, i paco a Maliam gin kede aminnere Marita.

²Maliam ame nwaŋ koŋ owiro Rwot kede moo a ŋwece kur, dok te we yo tyene kede yer wie, en ame ominnere Lajaro rik kome lit-ti.

³Amego mere ooro kwena baŋ Yecu ni, “Rwot, dano ame imaro-ni kome lit.”

⁴Ento Yecu ka owinyo, okobo ni, “Two man mom obino me neke, ento pi kela kwogo baŋ Obaŋa, me mi kwogo pire baŋ Wot Obaŋa.”

⁵Yecu onwoŋo rik maro Marita gin kede aminnere, kede Lajaro.

⁶Ka en owinyo ni kome lit, en ori dok i kabedo ame rik etye iye kuno nino aryo.

⁷Icennere okobbi jo mere a lube ni, “Odoku doki i Judaya.”

⁸Jo mere a lube te gamo doge ni, “Rabbi, jo Judaya rik omito napi kede gweŋ, kom yin dok idok kuno?”

⁹Yecu ogamo ni, “Caa me dyeceŋ mom apar wie aryo? Ŋat ame wo to dyeceŋ ginnoro gire mom twomo, pien neno ceŋ me lobo.

¹⁰Ento ka dano moro woto dyewor, twomere, pien ceŋ mom tye i yie.”

¹¹En okobo kit man, icennere dok okobbigi ni, “Awo ta Lajaro doŋonino oko, awot coye i wan nino.”

¹²Jo a lube okobbe ni, “Rwot, ka en doŋ onino oko, bino can.”

¹³Yecu onwoŋo okobo pi to mere, ento gin otamo ni okobo pi weo me nino.

¹⁴Yecu otittigi atira ni, “Lajaro doŋoto oko.

¹⁵Cunya yom pirwu pien onwoŋo mom atye kuno, me iye wunu. Doŋ owotu baŋe.”

¹⁶Tomaci, ame olwoŋo ni Rut, okobo baŋ owottere mere a lubo Yecu ni, “Wan daŋ owotu, me owot oto wunu karacel kede.”

¹⁷Ka Yecu otuno, onwoŋo Lajaro doŋori i lyel nino aŋwen.

¹⁸Betania ceggi kede Jerucalem, mito romo mairo aryo.

¹⁹Jo Judaya onwoŋo obino kweyo cuny Marita kede Maliam pi omingi.

²⁰Ka Marita owinyo ni Yecu tye abino, en owoto, orwatte kede, ento Maliam Onwoŋo odoŋ, obedo i ot.

²¹Marita okobbi Yecu ni, “Rwot, kono rik itye kan, kono ominna mom oto.

²²Dok amanni gin Iuŋ ame yin ibino kwayo i baŋ Obaŋa, Obaŋa bino miyi.”

²³Yecu te kobbe ni, “Ominni bino cer.”

²⁴Marita ogamo doge ni, “Aŋeo ni en bino cer i cer me agikki piny.”

²⁵Yecu okobbe ni, “An cer kede kwo; dano ame ye an kadi oto, bino kwo.

²⁶Jo luŋ akwo ame oye an, gin mom bino bilo to atwal. Yin iye man?”

²⁷Marita odokke iye ni, “Ee ta, Rwot, aye ni yin i Kricito, Wot Obaŋa, ame bino i lobo.”

²⁸Marita ka okobo man, owoto olwoŋo aminnere Maliam, okobbe momot ni, “Apwony tye kan, alwoŋi.”

²⁹Ka en owinyo, ova malo oyot, owoto baŋe.

³⁰Yecu onwoŋo mom otuno paco kannono, ento onwoŋo pwod tye kan ame Marita orwatte kede iye ca.

³¹Ojudaya ame akweyo cunye i ot, ka oneno Maliam oya malo oyotoyot, okato oko, gin olube, kun gin otamo ni en awot koko i wi lyel kuca.

³²Ka Maliam otuno kan a Yecu tye iye, oryebere i ŋet tyene, okobbe ni, “Rwot, kono rik itye kan, kono ominna mom oto.”

³³Ka Yecu onene kun akoko, kede jo Judaya ame obino kede daŋ akoko, cunye opoto, yie daŋ te wan atek.

³⁴Te penyo ni, “Ikete wunu kwene?” Gin te dokke iye ni, “Rwot, biye inen.”

³⁵Pig waŋ Yecu te ony irat.

³⁶Omio jo Judaya te kobo ni, “Nen, en kara yam mare ba!”

³⁷Jo mogo i akinagi te kobo ni, “En ame rik oyabo waŋ atowaŋ mom twero geŋo to i kom dano man?”

³⁸Yi Yecu dok owaŋ atek, ojwat, obino i lyel; lyellono rik gorogoro kidi, kun ocego doge i kidi.

³⁹Yecu te kobo ni, “Cor wunu kidi oko.” Marita amin a dano ame oto te dokke ni, “Rwot, koni doŋ ŋwe, pien doŋ ori nino aŋwen.”

⁴⁰Yecu odokke iye ni, “Rik mom akobbi ni ka iye, ibino neno kwogo Obaŋa?”

⁴¹Omio ote coro kidi oko. Yecu te tiŋo waŋe malo, te kobo ni, “Pappa, apwoi pien doŋ iwinya.

⁴²An aŋeo con ni yin iwinya i kare ducu, ento akobo man pi lwak jo ame ocuŋ i laŋeta-ni, me gin ye ni yin rik iora.”

⁴³Ka en okobo man, oredo i dwon aloŋo ni, “Lajaro, donyo oko!”

⁴⁴Ŋat a rik oto-ni, te kato oko kun ciŋe kede tyene orio kede boŋo, waŋe oboo i tambara. Yecu okobbigi ni, “Gonye wunu me woti.”

⁴⁵Jo apol i akina Ojudaya ame obino karacel kede Maliam, ka oneno gin ame Yecu otio, gin oye en.

⁴⁶Ento jo ocele i akinagi owoto baŋ Oparicayo, te kobbigi gin ame en otio.

⁴⁷Omio olamdog adoŋo kede Oparicayo te lwoŋo okiko, ote kobo ni, “Kara obino wunu timo ŋo? Pien dano man tye a tiyo anyut apol.

⁴⁸Ka owe ke wunu kede kodi kite-nu, jo luŋ bino ye en, jo me Roma bino tuno, te ke to kabedowa-ni oko, kede rokwa daŋ.”

⁴⁹Ento dano acel i akinagi, Kayapa, en alamdog adwoŋ i mwaka nono, te kobbigi ni, “Wun mom iŋeo wunu ginnoro kadi acel,

⁵⁰dok pe iparo wunu ni kono obedo ber baŋwu, dano acel i to pi lwak, me kur tyek rokwa ducu.”

⁵¹En mom okobo man pire kene, ento pi bedo alamdog adwoŋ i mwaka-nono, rik otuco bala adwarpiny ni, Yecu bino to pi rokkono;

⁵²mom pi rokkono keken, ento me cok otino Obaŋa ame olal ata bed acel.

⁵³Cakere i nino-nu, gin te poro kop me neke.

⁵⁴Pi mannono, te miyo Yecu mom dok woto kannaler i akina Ojudaya, ento te ya oko i kuno, te wot i lobo ame ceggi kede tim, i paco a nyiŋe Epraim; obedo kuno kede jo mere a lube.

⁵⁵Ecuban me kato a jo Judaya onwoŋo doŋ tye ceggi, jo apol oya i pacci, owoto i Jerucalem ame kare me Kato pe ru oromo, me gin olonyere kengi.

⁵⁶Rik gin oyenyo Yecu, kun gin ocuŋ i ot Obaŋa, okobo kengi kengi ni, “Wun itamo wunu nino? Ni en mom abino i ecuban?”

⁵⁷Olamdog adoŋo kede Oparicayo onwoŋo gin ociko ni, ka dano moro ŋeo kan a en tye iye, myero tittigi, me gin omake.