Read lango Lakana 12 Bible Online

Lakana 12 - lango bible

Lakana 12

¹Ka rik odoŋ nino abicel me tuno i ecuban me Kato, Yecu otuno i Betania, kan a Lajaro bedo iye, ame en ŋat a rik Yecu ocero iyi akina jo oto.

²Gin te tedde cam me otyeno kuno; Marita obedo ka poko cam, Lajaro onwoŋo en dano acel i akina jo ame obedo i dog cam.

³Maliam okwanyo moo a ŋwece kur ame wellere bup, moo nard agili ame romo ratili acel, owiro kede tyen Yecu, oweo tyen Yecu kede yer wie; ŋwec moo oku to, oromo ot ducu.

⁴Ento Juda me Keriot, ŋat acel i akina jo a lube, en ame abino keto erupe i kome, open ye ni,

⁵“Ŋo omono cato moo man i wei me ciliŋ mia adek, me mi baŋ ocan?”

⁶En okobo man, mom ni onwoŋo en paro pi ocan, ento pien rik en akwo; en rik gwoko cao lim, kwanyo gin ame obolo iye.

⁷Yecu te kobo ni, “Weke wunu, me kan naka i nino me yika.

⁸Ocan itye wunu kedgi nino luŋ, ento an mom abino bedo kedwu ni no ducu.”

⁹Ka lwak Ojudaya apol oniaŋ ni en tye kuno, gin te bino, mom pi neno Yecu keken, ento pi ne no Lajaro daŋ, ame Yecu rik ocero iyi akina jo oto.

¹⁰Pi mannono, olamdog adoŋo te poro kop me neko Lajaro daŋ,

¹¹pien Ojudaya apol oya oko i baŋgi pire, kun oye Yecu.

¹²Orwo mere lwak jo apol ame rik obino iyi ecuban te winyo ni Yecu tye abino i Jerucalem.

¹³Gin te jako jaŋ otit, ote wot me jole kun owo ni, “Ojana, pak wunu Rwot! Gum myero bed i kom ŋat ame abino i nyiŋ Rwot, ame en Abaka me Icrael!”

¹⁴Yecu onwoŋo atin kana, te bedo i wie, acalo rik ocoo ni,

¹⁵“Kur ilwor, yin Cion; nen, abaka meri abino baŋi, obedo i wi atin kana!”

¹⁶Jo mere a lube mom koŋ oniaŋ i man; ento ka doŋ oketo kwogo i kom Yecu, gin te po ni rik ocoo kop magi i kome, dok ni otimo pire.

¹⁷Lwak ame rik tye baŋe ka en lwoŋo Lajaro i lyel pi cere iyi akina jo oto, gin otito pire.

¹⁸En gin omio lwak owoto ka jole, pien gin onwoŋo owinyo ni en otio anyut man.

¹⁹Oparicayo te kobo kengi kengi ni, “Mom doŋ ineno wunu ni mom ikonyo wunu ginnoro. Nen, lobo ducu doŋ owirre me lube.”

²⁰Jo ame rik owoto ka woro Obaŋa i ecuban, mogo i akinagi onwoŋo jo Grik.

²¹Jo-nu owoto baŋ Pilipo me Betecaida, ame tye i Galilaya, ote kobbe ni, “Adwoŋ, wan omito neno Yecu.”

²²Pilipo owoto, otito baŋ Anderiya, Anderiya owoto karacel gin i Pilipo, oterri Yecu kop-pu.

²³Yecu te gamo doggi ni, “Caa doŋ oromo me keto kwogo i kom Wot a dano.

²⁴Ateteni akobbiwu ni, nyig kal ka mom opoto i lobo oto, bedo kene, ento ka oco nyige bedo apol.

²⁵Ŋat a maro kwo mere bino rwenyo kwo mere arwenya; ŋat ame dag kwo mere i lobo man, bino gwoko tuno naka i kwo a perakino odoco.

²⁶Ka ŋattoro tio pira myero luba; kan ame an abedo iye, atic mera daŋ bino bedo kuno. Ka dano moro tio pira, Papo bino nyuto woro i kome.

²⁷“Aman cunya oballe, kara abino kobo ŋo? Akobo ni, ‘Pappa, lara i caa man?’ Ento pi kop-pi omio atuno i caa-ni.

²⁸Pappa, ket kwogo i nyiŋi.” Dwon te ya i polo ni, “Doŋ aketo kwogo iye, abino keto odoco.”

²⁹Lwak ame ocuŋ i laŋete owinyo; ote kobo ni, “Polo omor.” Jo ocele ni, “Amalaika okobo kede.”

³⁰Yecu ogamo ni, “Dwon man mom obino pira, ento pirwu.

³¹Amanni otye a ŋolo kop i kom lobo man; aman aloc me lo bo man obino bole oko.

³²An ka obino tina malo ya i lobo, abino waya jo luŋ baŋa.”

³³En okobo man pi nyuto kit to ame en bino to kede.

³⁴Lwak te gamo doge ni, “Wan owinyo i cik ni Kricito perakino nakanaka. Kara yin dok ikop niŋo, ni Wot a dano myero tiŋe malo? Kara Wot a dano-nu en ŋa-nono?”

³⁵Yecu te kobo ni, “Pwod itye wunu kede cen pi kare anok. Wot wunu ame pwod itye wunu kede cen, me colpiny kur ŋukwu. Ŋat ame woto i colpiny mom ŋeo kan ewot iye.

³⁶Ka pwod itye wunu kede cen, ye wunu cen, me idok wunu itino me cen.” Yecu ka okobo kop man, opokere kedgi, te ponnigi oko.

³⁷Kadi Yecu otio anyuttogo apol a rom mano i nyimgi, gin mom oye en,

³⁸me kop adwarpiny Icaya cobere kakare, ni, “Rwot, ŋa oye kop ame wan otito? Dok na ame bad Rwot onyutte baŋe?”

³⁹Man en omio mom gin otwero ye, pien Icaya dok okobo ni,

⁴⁰“En oneko wangi, omio cunygi odoko nwaŋ, me kur onen kede wangi, kadi niaŋ i cunygi, kadi dwogo, me acaŋgi.”

⁴¹Gin omio Icaya okobo kop man, pien rik oneno kwogo mere, okobo pire.

⁴²Kadi bed kite-nono, jo apol, a naka mogo i akina oloc, oye en, ento pi lworo Oparicayo omio mom gin otuce, me kur ryemgi oko i kacokere;

⁴³pien gin maro kwogo ame dano miogi akato kwogo ame Obaŋa mio.

⁴⁴Yecu oredo ni, “Ŋat oye an, mom oye an, ento oye ŋat oora.

⁴⁵Ŋat a nena, nwoŋo aneno ŋat oora.

⁴⁶An a ceŋ ame bino i lobo, me jo ducu ame ye an kur bed i piny acol.

⁴⁷Ka dano moro winyo kop-pa kun mom gwoko, an pe anolle kop; pien rik mom abino ka ŋolo kop i kom lobo, ento abino pi laro lobo.

⁴⁸Ŋat ame kwera, ame mom winyo koppa, tye ŋat ame ŋolle kop; kop a doŋ akobo bino ŋolle kop i nino me agikki.

⁴⁹Pien mom akobo pira kena; Papo ame oora en ikome omia cik, gin ame myero akobbi, kede gin ame myero alokki.

⁵⁰Aŋeo ni cik mere en kwo a perakino odoco. Gin ame akobo, aloko acalo Papo okobba.”