Read lango Lakana 13 Bible Online

Lakana 13 - lango bible

Lakana 13

¹Ame pe ru ecuban me Kato otuno, Yecu onwoŋo ŋeo ru caa mere doŋ oromo me weko lobo man pi dok baŋ Papo. En rik omaro jo mere ame tye i lobo man, omarogi tuno i agikki.

²Kare ame gin pwod tye i dog cem me otyeno, ame Catan doŋ onwoŋo oketo tam i cuny Juda wot a Cimon me Keriot me keto erupe i kom Yecu.

³Yecu onwoŋo ŋeo ni Papo otyeko miyo jami luŋ i ciŋe, dok ni eya i baŋ Obaŋa, edok daŋ baŋ Obaŋa.

⁴En oya i dog cam, te gonyo bongi mere, keto teŋe, eka te tweyo taulo i pyere.

⁵Onyo pi iyi wal, te cako lwoko tyen jo mere a lube, kun weo kede taulo ame en otweo i pyere.

⁶Ka en otuno baŋ Cimon Petero, Petero te penye ni, “Rwot, yin twal ilwoko tyena?”

⁷Yecu ogamo doge ni, “Yin mom iŋeo gin ame atiyo amanni, ento ibino niaŋ iye icennere.”

⁸Petero te kobbe ni, “Kom atwal, yin mom ibino lwoko tyena.” Yecu te dokke ni, “Ka mom alwoki, nwoŋo ribere mom i akinawa.”

⁹Cimon Petero okobbe ni, “Rwot, mom tyena keken ento ciŋa a naka wia daŋ.”

¹⁰Yecu okobbe ni, “Dano ame otyeko lwok, pe myero dok lwok kome, kono tyene keken, pien nwoŋo kome ducu cil. Wun doŋ icil wunu, ento mom wun ducu.”

¹¹En rik onwoŋo ŋeo ŋat a mito keto erupe i kome; en gin omio en okobo ni, “Wun ducu mom icil wunu.”

¹²Ame en doŋ otyeko lwoko tyengi, okwanyo boŋŋi mege, te dok kede i kabedo mere, te penyogi ni, “Iniaŋ wunu gin ame atimo i komwu?

¹³Wun ilwoŋa wunu ni apwony, dok ni Rwot; mannono ber kono, pien atye amannono.

¹⁴Doŋ ka an a Rwot kede apwonywu, alwoko tyenwu, wunu daŋ myero ilwok wunu tyenwu kenwu kenwu;

¹⁵pien anyuttiwu anen me aluba, me wun daŋ itim wunu bala kite ame an atimo kede i komwu.

¹⁶Ateteni akobbiwu ni, opii mom bedo adwoŋ ikato adwoŋŋere, dano ame ooro mom bedo adwoŋ ikato ŋat aore.

¹⁷Ka iŋeo wunu man, ce itio wunu, itye wunu kede winyo.

¹⁸Man mom akobo i komwu wun ducu; aŋeo jo ame doŋ ayero; ento me coc a yam ocoo cobere kakare, ni, ‘Ŋat ame ocamo kwon k aracel keda doŋ otiŋere i koma,’

¹⁹A man atittiwu kop-pi kun pe ru otimere, me ka bino timere, iye wunu ni an a en.

²⁰Ateteni akobbiwu ni, ŋat ame jolo dano ame an aoro, nwoŋo ojola; aco ŋat ojola, nwoŋo ojolo ŋat oora.”

²¹Ka Yecu doŋ okobo kop man, cunye opoto, otuco kannaler ni, “Ateteni akobbiwu ni, ŋat acel i akinawu bino keto erupe i koma.”

²²Jo a lube onenena kengi kengi, pien mom oniaŋ ŋat ame en akop i kome.

²³Ŋat acel i akina jo mere a lube, ŋat ame Yecu rik maro, onwoŋo obuto ceggi kede kor Yecu.

²⁴Cimon Petero ogwete, te kobbe ni, “Tucciwa ŋat ame en akop i kome.”

²⁵En ojeŋere i kor Yecu, te penye ni, “Rwot, kara mano ŋa-nono?”

²⁶Yecu ogamo ni, “En ŋat ame abino gweyo dek ate miyo baŋe.” Ka ogweo dek, omio baŋ Juda wot a Cimon me Keriot.

²⁷Ame en doŋ ogamo, Catan odonyo i yie. Yecu te kobbe ni, “Gin ame itimo, ru time.”

²⁸Mom tye ŋattoro i dog cem ame oniaŋ gin omio en okobbe kop man.

²⁹Jo mogo otamo ni, pien Juda onwoŋo gwoko lim megi, omio Yecu okobbe ni, “Wil jami ame omito pi ecuban”; onyo ni myero mi ginnoro baŋ ocan.

³⁰Ka doŋ ocamo dek ame ogweye, odonyo oko; piny doŋ onwoŋo col.

³¹Kare ame en doŋ okato oko, Yecu te kobo ni, “Aman doŋ oketo kwogo i kom Wot a dano, dok oketo kwogo i kom Obaŋa daŋ pire.

³²Ka oketo kwogo i kom Obaŋa pire, Obaŋa daŋ bino keto kwogo i kome i nyime en Obaŋa, bino keto kwogo i kome oyotoyot.

³³Itino, pwod atye kedwu pi kare anok. Ibino wunu yenya, ento acalo rik atito baŋ Ojudaya, amannono daŋ atittiwu ni, kan ame abino wot iye, wun mom itwero wunu tuno iye.

³⁴Amiowu cik anyen ni, marre wunu kenwu kenwu; imarre wunu kenwu kenwu acalo an amarowu.

³⁵Mannono bino miyo jo ducu ŋeo ni wun ibedo wunu jo a luba, ka ce mer tye i akinawu.”

³⁶Cimon Petero openye ni, “Rwot ibino wot kwene?” Yecu te gamo ni, “Kan ame an abino wot iye, mom itwero luba amanni, ento ibino luba icennere.”

³⁷Petero dok openye ni, “Rwot, ŋo amona lubi amanni? Abino jalo kwona piri.”

³⁸Yecu ogamo ni, “Ibino jalo kwoni pira? Ateteni akobbi ni, twon gweno mom bino kok, tuno ka koŋ ikwera tyen adek.”