Read lango Lakana 14 Bible Online

Lakana 14 - lango bible

Lakana 14

¹“Cunywu kur poti; ye wunu Obaŋa, ye wunu an daŋ.

²I ot a Pappa tye iye kabedo apol; kono mom amannono, kono atittiwu, pien abino wot me yikkiwu kabedo.

³Ka awoto, ayikkiwu kabedo, dok abino dwogo, aomowu baŋa, me kan ame an abedo iye, wun daŋ ibed wunu iye.

⁴Wun iŋeo wunu yo me kan ame an abino wot iye.”

⁵Tomaci te kobbe ni, “Rwot, wan mom oŋeo kan ame ibino wot iye; kara otwero ŋeyo yo nino?”

⁶Yecu te gamo ni, “An ayo, kede ateni kede kwo; mom tye ŋattoro ame bino baŋ Papo, kono ka i koma keken.

⁷Kono rik iŋea wunu, kono iŋeo wunu Pappa daŋ; ya amanni iŋee wunu dok daŋ doŋ inene wunu.”

⁸Pilipo te gamo doge ni, “Rwot, nyuttiwa Papo, bino romowa.”

⁹Yecu te dokke iye ni, “Doŋ ari kedwu kare alac rom man, mom ru iŋea, Pilipo? Ŋat ame onena doŋ oneno Obaŋa Papo; kara ŋo omio yin dok ikobo ni, ‘Nyuttiwa Papo?’

¹⁰Yin mom iye ni, an atye i Papo, kede Papo i an? Kop ame akobo baŋwu, mom akobo pira kena; ento Pa po ame bedo i yia tio ticcere.

¹¹Wun ye wunu ni an atye i Papo, kede Papo i an; ka mom amannono, ye wunu an pi tic keken.

¹²“Ateteni akobbiwu ni, ŋat ame ye an, en daŋ bino tiyo tic ame an atio; dok bino tiyo tic ame dito kato man, pien an awot baŋ Papo.

¹³Gin ducu ame ibino wunu kwayo i nyina, abino tiyo, me iket wunu kwogo i kom Papo pi Wod;

¹⁴ka ibino wunu kwayo ginnoro i nyina, abino tiyo.

¹⁵“Ka imara wunu, ibino wunu gwoko cikka.

¹⁶An abino kwayo Papo, en bino miyowu Akony ocele ame bino bedo kedwu nakanaka,

¹⁷en Cuny me ateni ame lobo mom twero gamo, pien lobo mom nene, dok mom ŋee-gu. Wun iŋee wunu pien en bedo kedwu, dok daŋ bino bedo i yiwu.

¹⁸“Mom abino wekowu calo otino kic; abino dwogo baŋwu.

¹⁹Odoŋ kare anok, lobo mom dok bino nena, ento wun ibino wunu nena; pien an akwo, wun daŋ ibino wunu kwo.

²⁰I ninonono ibino wunu ŋeyo ni an atye i Papo, kede wun i an, kede an i yiwu.

²¹Dano ame tye kede cikka, ame gwoko, en dano ame mara; dano ame mara, Pappa bino marre, an daŋ abino mare, abino nyutte kena baŋe.”

²²Juda ame mom me Keriot te penye ni, “Rwot, kara man bino bedo nino, ni ibino nyutte keni baŋwa, ento mom baŋ lobo?”

²³Yecu odokke iye ni, “Ka ŋattoro mara, en bino gwoko koppa, Pappa bino marre, wan obino tuno baŋe, obino yiko kabedowa baŋe.

²⁴Ŋat a mom mara, mom gwoko koppa; kop ame iwinyo wunu mom mega, ento me Obaŋa Papo ame rik oora.

²⁵“Kop man atittiwu ame pwod atye baŋwu.

²⁶Ento Akony, ame en Cuny Acil, ame Papo bino oro i nyina, en bino pwonyowu i kop luŋ, en bino poyo wiwu i kop ducu ame rik akobbiwu.

²⁷Awekkiwu kuc, amio kucca baŋwu, amiowu mom bala en a lobo mio. Cunywu kur poti, pe ilwor wunu.

²⁸Doŋ iwinyo akobbiwu ni, ‘An abino wot oko, dok abino dwogo baŋwu.’ Kono imara wunu, kono ilelo wunu pien awot baŋ Papo, pien Papo dwon kata.

²⁹Amanni akobbiwu man ame mom ru otimere, me ka bino timere, iye wunu.

³⁰Mom dok abino rado kop apol kedwu, pien aloc me lobo man tye abino. En mom kede twer i koma;

³¹ento man atimo acalo Papo ocika, me lobo ni an amaro Papo. Ya me owotu giwa.