Read lango Lakana 15 Bible Online

Lakana 15 - lango bible

Lakana 15

¹“An olok me ateni, Pappa en apur.

²Jaŋe acel acel i koma a mom nyak, en lwero oko; ento jaŋe ducu ame nyak en lonyo, me med nyak apol.

³Wun doŋ olonyowu oko pi kop ame akobo baŋwu.

⁴Bed wunu i an, an daŋ i wun. Acalo bala jaŋ olok mom twero nyak pire kene, ka mom omoko i kom olok, amannono, wun daŋ mom itwero wunu ka mom ibedo wunu i an.

⁵An olok, wun ibedo wunu jana. Ŋat ame bedo i an, kede an i en, en nyako nyige apol, pien mom itwero wunu tiyo ginnoro aboŋo an.

⁶Ka dano moro mom bedo i an, obole oko bala jaŋ yat, two oko; ocokogi, obologi i mac, gin waŋ oko.

⁷Ka ibedo wunu i an, ame kun koppa bedo i wun, kwa wunu gin ducu ame imito wunu, obino timo pirwu.

⁸Man bino kela kwogo i kom Pappa, ka inyako wunu nyigwu apol; kite-nono, ibino doko wunu jo a luba.

⁹Acalo Papo rik omara, an daŋ amarowu amannono; bed wunu i mar mera.

¹⁰Ka igwoko wunu cikka, ibino wunu bedo i mar mera, i kite acalo rik an agwoko cik a Pappa, abedo i mar mere.

¹¹Kop man atittiwu wek yomcunya bed i yiwu, me ipoŋ wunu kede yomcuny.

¹²“Man en cik mera, ni imarre wunu kenwu acalo rik an amarowu.

¹³Mom tye ŋattoro ame tye kede mar adwoŋ ame kato man, dano ijalo kwo mere pi awottere.

¹⁴Wun owotena ka ce itio wunu gin ame an acikowu.

¹⁵Mom dok abino lwoŋowu ni wun opii, pien opii mom ŋeo gin ame adwoijnere tio; ento an alwoŋowu ni wun owotena, pien doŋ atyeko nyuttiwu gin ducu ame rik awinyo i baŋ Pappa.

¹⁶Mom wun en iyera wunu, ento an en ayerowu, dok aketowu me iwot, inyak wunu nyigwu, dok me nyigwu perakino, wek gin ducu ame ibino wunu kwayo i baŋ Papo i nyina, en miwu.

¹⁷Gin ame acikowu iye en ene ni, marre wunu kenwu kenwu.

¹⁸“Ka lobo odagowu, myero iŋe wunu ni rik okwoŋo daga, a kun pe ru odagowu.

¹⁹Kono ibedo wunu jo me lobo, kono lobo omaro wun jo mere; ento wun mom ibedo wunu jo me lobo, ento ayerowu i lobo, mannono omio lobo odagowu.

²⁰Po wunu kop a rik akobbiwu, ni, ‘Opii mom bedo dwoŋ ame kato adwoŋŋere.’ Ka rik oliba, wun daŋ obino libowu; ka rik ogwoko koppa, wun daŋ obino gwoko megwu.

²¹Magi-nono ducu obino timo i komwu pi nyina, pien gin mom ŋeo ŋat ame rik oora.

²²Kono ce rik mom abino akobo baŋgi, kono gin mom i balloro; ento amanni kopporo ame gin bino pido pi balgi mom tye.

²³Ŋat ame odaga, nwoŋo odago Pappa daŋ.

²⁴Kono rik mom atio ticcoro ame dano moro ocele mom otio i akinagi, kono gin mom i balloro; ento amanni gin doŋ onena, dok odaga, karacel i Pappa.

²⁵Man otimere me kop a con ocoo i cik megi cobere kakare ni, ‘Gin odaga nono.’

²⁶Ento ka Akony bino tuno, ame abino oro baŋwu iiya i baŋ Papo, en Cuny me ateni ame ya i baŋ Papo, en bino bedo cadenna.

²⁷Wun daŋ ibedo wunu cadenna, pien ibedo wunu baŋa cakere i ageyi.