Read lango Lakana 17 Bible Online

Lakana 17 - lango bible

Lakana 17

¹Ka Yecu doŋ okobo kop man, onao waŋe malo i polo, okobo ni, “Pappa, kare doŋ oromo, ket kwogo i kom Wodi, me Wodi daŋ ket kwogo i komi,

²acalo rik imie twer me loyo jo luŋ, me en mi kwo a perakino baŋ jo a rik imio baŋe.

³Man en kwo ame perakino: ŋeyi yin Obaŋa acel me ateni, kede ŋeyo Yecu Kricito ame rik yin ioro.

⁴Atyeko keto kwogo i komi i wi lobo, daŋ doŋ acobo tic a rik imia ni ati.

⁵Amanni, Pappa, mia abed kede kwogo baŋi, kit a rik abedo kede baŋi ame mom ru iketo lobo.

⁶“Atyeko doŋ nyuto nyiŋi baŋ jo a rik ikwanyo i lobo, imia. Gin rik joni, yini ite miyogi baŋa, gin daŋ ogwoko kop mer i.

⁷Aman gin doŋ ŋeo ni jami luŋ a yin imia oya i baŋi;

⁸pien kop a rik imia, atyeko miyo baŋgi, gin daŋ doŋ ogamo, otyeko ŋeyo atika ni an aya i baŋi, doŋ oye ni yin en iora.

⁹Akwao pirgi, mom akwao pi lobo, kono pi jo a rik imia keken, pien gin jo meri.

¹⁰Jamina luŋ megi, kede megi daŋ luŋ mega, an anwoŋo kwogo pirgi.

¹¹An mom dok abedo i lobo, ento gin adoŋ i lobo, an adwogo baŋi. Papo Acil, gwokgi pi nyiŋi a rik imia, migi obed acel, acalo wan otye acel.

¹²Ame rik an pwod atye kedgi karacel, agwokogi pi nyiŋi a rik imia. Akurogi, moro mom tye ame orwenyo i akinagi, kono ka dano ame rik myero rweny, me coc a yam ocoo cobere kakare.

¹³Ento koni doŋ adwogo baŋi. Kop man luŋ an akobo kun pwod atye i lobo, me gin bed i yomcuny aya i baŋa.

¹⁴Doŋ atyeko miyogi kop meri. Lobo odagogi, pien gin mom obedo jo me lobo, acalo an daŋ mom me lobo.

¹⁵Mom akwayo ni kono ikwanyogi oko i lobo, ento akwayo ni igwokgi i baŋ Arac[2].

¹⁶Atika, gin mom me lobo, acalo an mom me lobo.

¹⁷Lonygi kede ateni, me gin bed acil. Koppi en kop ateni.

¹⁸Acalo yin rik iora i lobo, an daŋ aorogi i lobo.

¹⁹Pirgi omio an alonyere kena, me gin daŋ lonygi kede ateni, me gin bed acil.

²⁰“Mom akwao pi jo-ni keken, ento daŋ pi jo ame bino ye an pi kop ame jo-ni bino tito.

²¹Migi ducu obed acel, acalo yin. Apap, ibedo i an kede an daŋ abedo i yin. Migi daŋ obed i wan, me lobo ye ni yin en iora.

²²Kwogo a rik imia daŋ doŋ amio baŋgi oko. Migi obed acel, acalo wan daŋ acel,

²³kun an abedo i gin, yin ibedo i an, me gin daŋ obed acel aboŋo pokere, me lobo ne ni yin en iora, dok daŋ imarogi acalo imara.

²⁴“Apap, amito ni jo-ni ame gin mot ame imia, bed baŋa, kan ame atye iye, me gin nen kwogona ame imia, pien yin imara cakere a mom ru icibo acakki te lobo.

²⁵Pa po a kite atir, lobo pe ru oŋei, ento an anei, jo man doŋ oŋeo ni yin en iora.

²⁶Amio nyiŋi oŋeye baŋgi, dok abino miyo ŋeye odoco, me mar a rik imara kede bed i yigi, an daŋ abed i yigi.”