Read lango Lakana 18 Bible Online

Lakana 18 - lango bible

Lakana 18

¹Ka Yecu doŋ okobo kop man, owoto karacel kede jo mere a lube, oŋolo luŋ me Kidron, kan ame tye iye poto; odonyo iye karacel kede jo mere a lube.

²Juda ame rik oketo erupe i kome daŋ onwoŋo ŋeo kabedonono, pien Yecu kede jo mere a lube rik maro cokere kuno.

³Juda ogamo lwak cirikale kede oticcogo i baŋ olamdog adoŋo kede Oparicayo, te wot kuno kede tara kede mac ame ocwinyo i rao kede jami me romo.

⁴Yecu gire onwoŋo ŋeo gin ducu ame abino timere i kome; Yecu owoto baŋgi, te penyogi ni, “Kara iyenyo wunu na?”

⁵Gin te dokke iye ni, “Yecu me Najaret.” Yecu te kobbigi ni, “An atye do.” Juda ame nwaŋ oketo erupe i kome onwoŋo ocuŋ karacel kedgi.

⁶Ame Yecu doŋ okobbigi ni, “An atye do,” gin ojer i negi ote ony piny.

⁷Dok te penyogi ni, “Iyenyo wunu kara ŋa?” Gin odokke iye ni, “Yecu me Najaret.”

⁸Yecu dok te gamo ni, “Doŋ atyeko kobbiwu ni an atye do; ka iyenya wunu, wek wunu jo man woti.”

⁹Man otimere me kop ame rik en okobo cobere kakare ni, “I akina jo a rik yin imia, moro mom tye ame orwenyo.”

¹⁰Cimon Petero onwoŋo tye kede pala bat; owoto, te toŋo amiro alamdog adwoŋ, oljuno yite tuŋ cem oko. Nyiŋ amiro-nono, Maliko.

¹¹Yecu te kobbi Petero ni, “Rwak palani i akuro mere; ikopo ame Pappa omia, kur amat bo?”

¹²Lwak cirikale kede adwoŋgi kede otic a jo Judaya omake, te tweye.

¹³Ote kwoŋo tere baŋ Anna, papa a cik a Kayapa, ame onwoŋo obedo alamdog adwoŋ imwaka-no-no.

¹⁴Kayapa en a rik omio tam baŋ jo Judaya ni ber dano acel to pi lwak.

¹⁵Cimon Petero olubo Yecu, karacel kede jo mere a lube. Ŋat acel a lube ame onwoŋo ŋeo alamdog adwoŋ, en odonyo i dyekal alamdog adwoŋ karacel kede Yecu,

¹⁶ento Petero ocuŋ teŋe i dog paco. Ŋat a lubo Yecu ame alamdog adwoŋ onwoŋo ŋeo, owoto okobo gin kede aŋeca ame gwoko dog paco, okelo Petero i dyekal.

¹⁷Aŋeca ame gwoko dog paco te penyo Petero ni, “Yin daŋ mom onyo itye i akina jo a lubo dano man?” En ogamo ni, “Amaa, an mom atye iye gira.”

¹⁸Omiro kede otic onwoŋo omoko mac milo, pien piny onwoŋo ŋic, gin ocuŋ kun ooyo mac. Petero rik daŋ tye karacel kedgi, ocuŋ aoyo mac.

¹⁹Alamdog adwoŋ openyo Yecu pi jo mere a lube, kede i kop ame en pwonyo.

²⁰Yecu odokke iye ni, “Rik akobo kannaler baŋ lobo; ni no luŋ abedo pwony i kacokere kede i ot Obaŋa, kan ame jo Judaya ducu cokere iye; mom tye ginnoro ame akobo i muŋ.

²¹Pino ipenya? Peny jo ame rik owinyo kop ame akobbigi; gin ŋeo gin ame akobo.”

²²Ka en doŋ okobo kop man, dano acel adit i akina otic ame onwoŋo ocuŋ i laŋete te ba po leme, kun kobbe ni, “Mannono kite ame yin igamo kede dog alamdog adwoŋ?”

²³Yecu ogamo doge ni, “Ka akobo arac, nyut kopporo me caden me kop arac; ento ka akobo aber, ibapa piŋo?”

²⁴Icennere Anna ocwae, ame doŋ otwee, baŋ Kayapa, alamdog adwoŋ.

²⁵Cimon Petero onwoŋo ocuŋ aoyo mac. Gin te penye ni, “Yin daŋ mom dano acel i akina jo lubo Yecu?” En te kwero oko, kun kobo ni, “Amaa, an mom atye iye gira.”

²⁶Dano acel i akina omiro olamdog adwoŋ, wat a dano ame Petero rik bin toŋ yite ca, openye ni, “Wok i mom aneni i poto wun i Yecu?”

²⁷Petero gire te dok kwero oko; oyotoyot twon gweno te mwoco koko oko.

²⁸Icennere gin te kwanyo Yecu iyi ot a Kayapa, ote tere i Praitorion. Onwoŋo piny ceggi ru. Gin ikomgi mom odonyo i Praitorion, pien gin onwoŋo mito bedo acil, me wek ocam ecuban me Kato.

²⁹Pi man omio Pilato owoto baŋgi, te penyogi ni, “Ipidi wunu dano man pi kop aŋo?”

³⁰Gin te dokke iye ni, “Dano man kono mom atim tim arac, kono mom okele baŋi.”

³¹Pilato okobbigi ni, “Wun ikomwu tere, ŋolle wunu kop kun ilubo wunu cik megwu.” Ojudaya odokke iye ni, “Wan mom oyewa neko dano moro.”

³²Man otimere me kop a Yecu okobo ocobere kakare, kun nyuto kite me to ame en bino to kede.

³³Pilato dok te donyo i Praitorion, olwoŋo Yecu, openye ni, “Yin abaka Ojudaya?”

³⁴Yecu ogamo doge ni, “Yin ikobo man piri keni onyo ca jo ocele en otitti pira?”

³⁵Pilato te gamo ni, “An daŋ Ajudaya bo? Rok meri kede olamdog adoŋo gin omii baŋa: kara yin itimo no?”

³⁶Yecu odok iye ni, “Locca mom me lobo man. Kono ce locca me lobo man, kono jona oromo pira, me kur mia i ciŋ Ojudaya; ento locca mom me lobo man.”

³⁷Pilato openye ni, “Doŋ yin abaka?” Yecu ogamo ni, “Yin ikobo giri ni an abaka. Onywala pi man dok daŋ abino i lobo pi man, me abed caden me kop ateni. Jo luŋ ame tye i ateni winyo dwona.”

³⁸Pilato openye ni, “Ateni kodi ŋo-nono kara?” Ka okobo man, en dok owoto baŋ Ojudaya, okobbigi ni, “Mom anwoŋo kopporo i kome.

³⁹Ento wun itye wunu kede kitewu ni myero gonnyiwu dano moro acel i kare me Kato. Imito agonnyiwu abaka Ojudaya?”

⁴⁰Gin te wo ni, “Aa, mom lo-ni, ento Barabba.” Aco kono Barabba rik ayak.