Read lango Lakana 19 Bible Online

Lakana 19 - lango bible

Lakana 19

¹Pilato otero Yecu, opwode kede del.

²Cirikale okado tok kwogo abaka me okuto, ote rwako i wie, dok ote ruke kede boŋo amaramar.

³Gin obino baŋe kun okobo ni, “Amoti, abaka Ojudaya!” Gin obape kede ciŋgi.

⁴Pilato dok owoto baŋgi, okobbigi ni, “Nen, abino ke le oko baŋwu, me iŋe wunu ni an mom anwoŋo kopporo i kome.”

⁵Yecu odonyo baŋgi kun oruko tok kwogo me okuto kede boŋo amaramar. Pilato te k obbigi ni, “Nenu dano man.”

⁶Ka olamdog adoŋo kede otic onene, gin owo ni, “Gure i kom yat! Gure i kom yat!” Pilato te kobbigi ni, “Wun tere, iwot igure wunu i kom yat, pien an gira mom anwoŋo kopporo i kome.”

⁷Ojudaya te gamo ni, “Wan otye kede cik; pi cikkono, en myero to, pien okette kene ni en ebedo Wot Obaŋa.”

⁸Ka Pilato owinyo kop man, lworo omedde i kome,

⁹te dok oko i Praitorion, openyo Yecu ni, “Kara yin iya i kwene?” Ento Yecu gire mom te gamo doge.

¹⁰Omio Pilato te kobbe ni, “Ikwero gamo doga oko? Mom iŋeo ni an atye kede twer me gonyi, kede twer me guri i kom yataria?”

¹¹Yecu odokke iye ni, “Kono rik mom omii twer ame oya i malo, kono mom ibedo kede twerroro i koma; pi mano, ŋat ame omia baŋi tye kede bai adwoŋ akato.”

¹²Tekere i kare-nono, Pilato ocako yenyo yo me gonye oko, ento Ojudaya owo ni, “Ka igonyo dano man, yin mom idyere a Kaicari. Dano ducu ame kette kene ni ebedo abaka nwoŋo opyem kede Kaicari.”

¹³Pilato ka owinyo kop man, okelo Yecu oko te bedo i wi kom me ŋolo kop i kabedo ame ocano iye gweŋ adikadika; i leb jo Eburania olwoŋo ni, Gabbata.

¹⁴Ninonaca onwoŋo nino me Yikere i camo ecuban me Kato; caa onwoŋo ceggi romo abicel. En okobo baŋ Ojudaya ni, “Nenu, abaka mewu ene!”

¹⁵Jo te wo ni, “Neke oko! Neke oko! Gure i kom yataria!” Pilato openyogi ni, “Agur abakawu i kom yataria?” Olamdog adoŋo odok iye ni, “Wan giwa omom i abaka, kono Kaicari keken.”

¹⁶Pilato te miyo Yecu baŋgi me agura i kom yataria.

¹⁷Gin te tero Yecu, kun oryoŋo yataria mere kene, owoto i kabedo ame olwoŋo ni, Cogo Wic, ame i leb jo Eburania olwoŋo ni, Golgota.

¹⁸Gin ogure i kom yat kuno, karacel kede jo ocele aryo, i ŋete tuŋŋi i tuŋŋi, kun Yecu tye i dyere.

¹⁹Pilato ocoo kop oketo i wi yataria; ocoo ni, “Yecu me Najaret, abaka Ojudaya.”

²⁰Ojudaya apol okwano kop man, pien kan ame oguro Yecu iye rik ceggi kede boma adwoŋ, dok daŋ rik ocoo i leb jo Eburania, i leb jo Roma kede i leb jo Grik.

²¹Olamdog adoŋo Ojudaya te kobbi Pilato ni, “Kur ico ni, ‘Abaka Ojudaya’, ento ni, ‘Dano man okobo ni, An Abaka Ojudaya.’ ”

²²Pilato te dok iye ni, “Gin ame acoo, doŋ acoo.”

²³A doŋ cirikale oguro Yecu i kom yataria, gin okwanyo boŋŋi mere, ote poko yie aŋwen, naka kanyi mere daŋ, cirikale acel acel i mere. Ento kanyi mere onwoŋo mom okwoo akwoa; ocweo ka ilul, cakere i malo.

²⁴Gin okobo kengi kengi ni, “Kur oyec wunu ayeca, ento obol wunu kwir, me onen ŋat ame bino tero.” Man otimere me coc a yam ocoo cobere kakare ni, “Gin opoko rukka i akinagi, obolo kwir i kom boŋina.”

²⁵Cirikale otimo man, ento tota a Yecu kede amin tottere, Maliam cik a Kelopa, kede Maliam me Magdala, onwoŋo rik ocuŋ i te yataria mere.

²⁶Yecu ka oneno tottere kede ŋat ame lube ame en maro kun ocuŋ ceggi i laŋete, okobbi tottere ni, “Imat, nen wodi!”

²⁷Te dok kobbi ŋat ame lubenono ni, “Nen totti!” Cakere i caa-nono ŋat ame lubo Yecu-nono te tero tota a Yecu i paco mere.

²⁸Icennere, ka oŋeo ni ducu doŋ otum, Yecu okobo ni, “Oryo ocira,” me coc a yam ocoo cobere kakare.

²⁹Kuno onwoŋo ocibo iye gulu koŋo awac; gin te rwako abwaŋarot ame opoŋ iye kono awac i wi tir, ote keto i doge.

³⁰Ka Yecu omato kono awaccono, okobbo ni, “Doŋ otum”; akula wie, omio cunye.

³¹Nino-nono onwoŋo obedo rik nino me Yikere, omio Ojudaya okwao Pilato ni myero tur tyengi oko, me ote tero komgi oko; me wek komgi kur ri i wi yataria i ceŋ me cabit, pien cabittono onwoŋo nino adwoŋ.

³²Cirikale obino, te cako turo tyen dano me agege, kede dano ocele a rik oguro karacel i Yecu.

³³Ka gin otuno i kom Yecu, gin oneno ni en doŋ otyeko to oko, naka mom doŋ ote turo tyene.

³⁴Ento dano acel i akina cirikale te cobo laŋet Yecu kede toŋ; oyotoyot remo kede pi i te mollo i yie.

³⁵Dano ame oneno otuco kannaler, kop a en otuco obedo kop ateni; en ŋeo ni etito kop me ateni, me wun daŋ iye wunu.

³⁶Pien kop magi otimere me coc a yam ocoo cobere kakare ni, “Cogo mere moro mom obino turo.”

³⁷Dok dul coc ocele okobo ni, “Gin bino neno ŋat ame gin ocobo.”

³⁸Icennere Yucepu me Arimataya, ame rik en ŋat a lubo Yecu, ento i muŋ, pi lworo Ojudaya, en okwao Pilato ni myero eter kom Yecu; Pilato oye. En obino otero kome.

³⁹Nekodem, ame nwaŋ koŋ obino baŋe dyewor, daŋ obino kun okelo murra ame orubo kede tebakori, ame pekkere mito romo ratili mia.

⁴⁰Gin otero kom Yecu, ote boyo kede boŋo me camanini, karacel kede gin a ŋwece kur, i kite ame yik Ojudaya tye kede.

⁴¹Kabedo kan ame rik ogure iye onwoŋo tye iye poto, potonu rik tye iye lyel anyen, ame yam mom ru oyiko iye ŋattoro.

⁴²Gin te yiko Yecu kuno, pien pi nino me Yikere, lyellono onwoŋo ceggi.