Read lango Lakana 2 Bible Online

Lakana 2 - lango bible

Lakana 2

¹I nino me adek nyom rik obedo i Kana me Galilaya; toto a Yecu onwoŋo daŋ tye kuno.

²Yecu kede jo mere a lube daŋ onwoŋo olwonogi i nyommaca.

³Ka koŋo otum, tota a Yecu okobbe ni, “Koŋogi doŋ mom.”

⁴Yecu ogamo ni, “Imat, kara alaro ŋo wan kedi? Caana mom ru oromo.”

⁵Tottere otitti otic ni, “Tim wunu gin luŋ ame en bino kobbiwu.”

⁶Onwoŋo rik tye kuno abinni pii me gweŋ gin abicel, ame ocibo pi kite me lonyere a jo Judaya; i abino pii acel twero ya iye gulli abic, aŋar abicel.

⁷Yecu okobbigi ni, “Onyu pii i abinni.” Ote onyo poŋ ibic.

⁸Dok okobbigi ni, “Twomu, teru baŋ adwoŋ me nyom;” gin te tero.

⁹Ka adwoŋ me nyom obilo pii ame olokere odoko koŋo, onwoŋo mom ŋeo kan oya iye, ento otic otwomo pii gin onwoŋo ŋeo. Adwoŋ me nyom ocwano anyom,

¹⁰okobbe ni, “Gin a dano ducu timo, okwoŋo miyo jo kono amit, ka jo omato oromogi, ote kelo en a mom mittere wok; ento yin ikano koŋo aberrere tuno naka koni.”

¹¹Man en anyut me agege ame Yecu otio i Kana me Galilaya, kun nyuto kede kwogo mere; jo mere a lube oye en.

¹²Icennere Yecu owoto i Kapernaum, gin kede tottere kede omego mere, naka jo mere a lube, ote ri kuno kare anok.

¹³Ecuban me Kato Ojudaya onwoŋo onoko ceggi, en omio Yecu owoto i Jerucalem,

¹⁴te nwoŋo jo ame acato twoni kede rommi kede amam i ot Obaŋa, kede jo obedo piny aloko cente.

¹⁵Yecu okedo tol aka del, te kotogi ducu i ot Obaŋa, karacel kede rommi kede twoni, te ketto lim a jo aloko cente oko, oloko mejagi aryeba.

¹⁶Okobbi jo a cato amam ni, “Cwa wunu jami magi teŋe; kur iloku ot a Pappa dok ot me cato wil.”

¹⁷Jo mere a lube opo i kop a rik ocoo ni, “Akemo bino maka pi lit a odi.”

¹⁸Ojudaya openye ni, “Anyuttene a yin inyuttiwa omio itimo jami magi?”

¹⁹Yecu ogamo doggi ni, “Ket wunu ot Obaŋa man oko, an abino gero nino adek.”

²⁰Ojudaya ogamo doge ni, “Ot Obaŋa-ni ogero mwakki pyeraŋwen wie abicel twal, kom yin ibino gero nino adek keken?”

²¹En onwoŋo okobo pi ot Obaŋa me kome.

²²Ka doŋ ocere i akina a jo oto, jo mere a lube opo ni kop man yam Yecu okobo; gin te ye coc a yam ocoo, kede kop ame rik Yecu okobo.

²³Ka onwoŋo en tye i Jerucalem i ecuban me Kato, jo apol oye nyiŋe pi neno anyuttogo ame en bedo timo.

²⁴Aco Yecu mom obedo kede gen i komgi,

²⁵pien en yam ŋeo jo luŋ, pe mito ni ŋattoro bed rabo kop me kom dano moro baŋe, pien en ikome ŋeo tam a tye i yi dano.