Read lango Lakana 20 Bible Online

Lakana 20 - lango bible

Lakana 20

¹I nino ame lubo cabit Ojudaya, Maliam me Magdala odilo i wi lyel odiko con ame piny pwod icocol, te neno ni okwanyo kidi oko i dog lyel.

²En or iŋo, owoto baŋ Cimon Petero kede dano ocele ame lubo Yecu, ŋat ame onwoŋo Yecu maro, okobbigi ni, “Okwanyo Rwot oko iyi lyel, mom oŋeo kan ame okete iye.”

³Petero kede ŋat a lube ocele-naca te mako yo, wot i lyel.

⁴Gin aryo ducu orwomo ŋwec karacel, dano a lubo Yecu ocele ca te lanyo Petero oko i ŋwec, en te geyo tuno i lyel.

⁵En oguŋo te ŋiyo yie, oneno boŋŋi me camanini ame onwoŋo oboe kede odoŋ kakare, ento en mom odonyo i yie.

⁶Cimon Petero daŋ te bino kun lube, en te donyo i lyel. En oneno boŋŋi me camanini ame onwoŋo oboe kede odoŋ kakare,

⁷kede itambara ame rik tye i wie; mom tye karacel kede boŋŋi camanini, ento odolle tye kene teŋe.

⁸Icennere ŋat a lubo Yecu ocele ca, ame onwoŋo ogeo tuno i lyel, daŋ te donyo i yie, oneno, te ye.

⁹Pien rik onwoŋo gin mom ru oniaŋ i coc a yam ocoo ni, myeroen oceroko i akinajo oto.

¹⁰Jo a lubo Yecu-nono te dok paco.

¹¹Ento Maliam ocuŋ i laŋet lyel kun akoko; ame en tye akoko, oguŋo, te ŋiyo yi lyel.

¹²En te neno omalaika aryo ame rukgi tar, kun obedo kan ame rik opyelo iye kom Yecu; acel obedo tuŋ wie, acel obedo tuŋ tyene.

¹³Gin te penye ni, “Dako, kara ikoko no?” En te kobbigi ni, “Okwanyo Rwot mera oko, mom aŋeo kan ame okete iye.”

¹⁴A doŋ okobo kop man, olokere, te neno Yecu ocuŋ i yo ŋee, ento en mom oŋeo ni Yecu ennono.

¹⁵Yecu te penye ni, “Dako, kara ikoko ŋo? Daŋ iyenyo ŋa?” Maliam otamo ni apur poto ŋit ennono, omio okobbe ni, “Adwoŋ, ka yin en ame itere, titta kan ame ikete iye, me akwany oko.”

¹⁶Yecu te lwone ni, “Maliam.” En olokere, te kop kede i leb Eburania ni, “Rabbi!” Te koppere ni, Apwony.

¹⁷Yecu te kobbe ni, “Kur imaka, pien pe ru ayito baŋ Papo. Wot baŋ omegona, itittigi ni, ‘An ayito baŋ Pappa ame en daŋ Papawu, baŋ Obaŋana, daŋ Obaŋawu.’ ”

¹⁸Maliam me Magdala owoto, okobo baŋ jo a lubo Yecu ni, “An be aneno Rwot,” oporrigi ni en okobo kop man baŋe.

¹⁹Otyeno me nino-nono, nino ame lubo cabit Ojudaya, jo a lubo Yecu onwoŋo tye i ot, kun ocego doggola oko pi lworo Ojudaya. Yecu otuc, te cuŋ i ak inagi, te kobbigi ni, “Kuc obed baŋwu.”

²⁰A doŋ en okobo man, onyuttigi ciŋe kede laŋete. Jo a lube ka oneno Rwot, cunygi obedo yom.

²¹Yecu dok te kobbigi ni, “Kuc obed baŋwu. Acalo Papo rik oora, an daŋ aorowu.”

²²A doŋ en okobo man, owe i komgi, okobbigi ni, “Gam wunu Cuny Acil.

²³Ka iweko wunu bal a ŋattoro, nwoŋo doŋ oweko oko; ka mom iweko wunu bal a ŋattoro, nwoŋo daŋ mom oweko.”

²⁴Tomaci ame olwoŋo ni, Rut, ame en ŋat acel i akina jo apar wie aryo, onwoŋo mom tye baŋgi i kare ame Yecu bino.

²⁵Jo a lubo Yecu ocele mere otitte ni, “Wan be, oneno Rwot.” Ento en odokkigi iye ni, “Ka mom aneno waŋ poo me cumali i ciŋe, aketo ciŋa i waŋ poo cumali, acwao ciŋa i laŋete, kom mom abino ye.”

²⁶Ame nino aboro doŋ otyeko kato, jo mere a lube dok onwoŋo obedo i ot, Tomaci onwoŋo doŋ tye baŋgi. Doggola onwoŋo ocegere oko, ento Yecu obino, te cuŋ i akinagi, okobbigi ni, “Kuc obed baŋwu.”

²⁷Icennere okobbi Tomaci ni, “Ket ciŋi kakan, nen ciŋa: rye ciŋi, cwa i laŋeta; iwek bedo a mom iye, ento ame ye.”

²⁸Tomaci ogamo doge ni, “Kom yin i Rwotta kede Obaŋana!”

²⁹Yecu openye ni, “Pien inena, omi i iye? Tye kede winyo jo a mom onena, ame gin ye.”

³⁰Yecu otio anyut apol i nyim jo a lube, ame mom ocoogi i buk man.

³¹Ocoo ka magi me wek iye wunu ni Yecu en Kricito, Wot Obaŋa, dok daŋ me wek iye wunu, ibed wunu i kwo pi nyiŋe.