Read lango Lakana 21 Bible Online

Lakana 21 - lango bible

Lakana 21

¹Icennere Yecu dok onyutte baŋ jo mere a lube i dog nam me Tiberia; onyutte ni amane.

²Cimon gin kede Tomaci ame olwoŋo Rut, Nacaneri me Kana me Galilaya, awobe a Jebedayo, kede jo aryo ocele i akina jo a lubo Yecu onwoŋo gin tye karacel.

³Cimon Petero okobbigi ni, “Amito wot mako rec.” Gin te gamo doge ni, “Wan daŋ obino wot kedi.” Gin owoto, ote donyo i yee, mom ote ma ko ginnoro i dyewor-ru.

⁴Ame piny pwod oru arua, Yecu ocuŋ i wi tela, ento jo mere a lube mom oŋeo ni en Yecu.

⁵Yecu te penyogi ni, “Itino, inwoŋo wunu dekkoro ya?” Gin te dok iye ni, “Amaa.”

⁶En te kobbigi ni, “Rye wunu bwo i tuŋ cem me yee, ibino nwoŋo wunu.” Gin te ryeyo, ento tiŋo bwo te loyogi oko pi pol a rec.

⁷Dano mano ame lubo Yecu, ame onwoŋo en maro te kobbi Petero ni, “Rwot ennono.” Cimon Petero ka owinyo ni mannono Rwot, oruko boŋo mere, pien onwoŋo en ogonyo oko, te kworre i nam.

⁸Ento jo a lubo Yecu ocele mere te bino kede yee, kun owao obwo ame rec opoŋ iye, pien onwoŋo gin mom bor i wi tela, mito romo tyen mia acel keken.

⁹A doŋ gin oyito i wi tela, gin oneno mac milo kuno, ame opyelo rec i wie, kede ogati.

¹⁰Yecu te kobbigi ni, “Kel wunu reccogo ame imako wunu amanni.”

¹¹Cimon Petero oyito i yee, owao bwo, okelo i wi tela, ame opoŋ iye rec adoŋo, mia acel kede pyerabic wie adek. Kadi bed gin pol ata, ento bwo mom oyec.

¹²Yecu okobbigi ni, “Biye wunu ka cam, ba.” Mom tye ŋattoro i akina jo a lube ame odio cunye me penye ni, “Yin i ŋa?” Pien gin oŋeo ni en Rwot.

¹³Yecu obino te kwanyo ogati, opokkigi, kede rec daŋ amannono.

¹⁴Man doŋ tyen me adek ame Yecu onyutte kede bajj jo mere a lube, ame doŋ ocer i akina jo oto.

¹⁵A doŋ gin ocamo otum, Yecu openyo Cimon Petero ni, “Cimon wot a Lakana, yin imara ame kato jo magi?” En ogamo ni, “Ee ta, Rwot, yin iŋeo an amari.” Ocike ni, “Kwa itino rommina.”

¹⁶Openye tyen me aryo ni, “Cimon wot a Lakana, yin imara?” En te dok gamo ni, “Ee ta, Rwot, yin iŋeo an amari.” Ocike ni, “Kwa rommina.”

¹⁷Dok openye tyen me adek ni, “Cimon wot a Lakana, yin imara?” Cimon okumo pien openye tyen adek ni, “Yin imara?” Okobbe ni, “Rwot, yin iŋeo jami luŋ; yin iŋeo an amari.” Yecu ocike ni, “Kwa rommina.

¹⁸Ateteni akobbi ni, ka rik yin pwod awobi, itweo boŋi meri keni, owoto kan a yin imito, ento ka doŋ iti, ibino ryeyo badi ŋat ocele en ame bino tweyi bonŋini, bino teri kan ame mom imito.”

¹⁹Okobo man pi nyuto kite me to ame en ebino keto kede kwogo i kom Obaŋa. A doŋ okobo man, te kobo ni, “Luba.”

²⁰Petero olokere, oneno ŋat a lubo Yecu ame Yecu rik maro kun tye awapo yorgi, en ŋat ame rik jenere i kor Yecu i dog cem me otyeno, ame okobo ni, “Rwot, na ame bino keto irupe i komi?”

²¹Ka Petero onene, openyo Yecu ni, “Rwot, kara dano-nu kono?”

²²Yecu okobbe ni, “Ka amito ni en perakino ituno ka abino dwogo, kara ilaro ŋo iye? Yin luba.”

²³Kop man olal i akina omego, ni dano a lubo Yecu-nono mom bino to: ento Yecu rik mom oko bo ni en mom bino to ento ni, “Ka amito ni en perakino ituno ka abino dwogo, kara ilaro ŋo iye?”

²⁴Man en ŋat ame lubo Yecu ame obedo caden i kom kop magi, dok daŋ ocoogi; wan oŋeo ni kop a en otuco obedo kop me ateni.

²⁵Dok daŋ tye jami ocele apol a rik Yecu otio; ka kono rik ocoo ducu acel acel, atamo ni lobo luŋ do obedo diŋ pi buke ame ocoo.