Read lango Lakana 3 Bible Online

Lakana 3 - lango bible

Lakana 3

¹Rik tye ŋattoro i akina Oparicayo nyiŋe Nekodem, en dano acel i akina jo adoŋo me Judaya.

²En rik obino baŋ Yecu dyewor, okobbe ni, “Rabbi, wan oŋeo ni yin apwony ame iya i baŋ Obaŋa; pien mom tye lo moro ame twero tiyo anyut magi ame yin itio ka ce Obaŋa mom tye kede.”

³Yecu okobbe ni, “Ateteni akobbi ni, ka dano pe onywalo tyen me aryo, mom twero neno loc Obaŋa.”

⁴Nikodem openye ni, “Dano twero nywalle niŋo ka doŋ oti oko? Twero dok i yi tottere tyen me aryo, ka dok ote nywale?”

⁵Yecu ogamo doge ni, “Ateteni akobbi ni, ka dano pe onywalo kede pii kede Cuny Acil, mom twero donyo i loc Obaŋa.

⁶Gin ame onywalo kede kom en kom, ame onywalo kede Cuny en cuny.

⁷Kur iwur pien akobbi ni, ‘Myero nywalwu tyen me aryo.’

⁸Yamo kodo kan a en amito, iwinyo ŋurrere, ento mom iŋeo kan ame oya iye, kadi kan ame akodo adok iye; dano acel acel ame onywalo kede Cuny tye amannono.”

⁹Nekodem openye ni, “Man twero timere niŋo?”

¹⁰Yecu ogamo ni, “Yin apwony me Icrael twal, mom iniaŋ i kop man?

¹¹Ateteni akobbi ni, wan okobo i kom gin a wan oŋeo, obedo caden i kom gin a doŋ oneno, ento wun mom ijolo wunu kop ame wan otittiwu.

¹²Ka atittiwu kop me lobo, mom iye wunu, ibino ye wunu niŋo ka atittiwu kop me polo?

¹³Mom tye dano moro ame yam koŋ oyito i polo, kono en ame rik oyitto piny kun oya i polo, en Wot a dano, ame bedo i polo.

¹⁴Kit acalo Muca nwaŋ otiŋo twol malo i tim, Wot a dano daŋ myero tiŋe malo amannono

¹⁵me dano acel acel ame ye en nwoŋ kwo a perakino nakanaka.”

¹⁶Pien Obaŋa rik omaro lobo amannono, omio Wode acel keken, me dano acel acel ame ye en kur rweny odoco, ento bed kede kwo a perakino nakanaka.

¹⁷Obaŋa nwaŋ mom ooro Wode i lobo me ŋol kop loo lobo, ento me lobo larre pire.

¹⁸Dano ame ye en mom obino ŋolle kop, ento dano a mom ye en doŋoŋolo kop oloe oko con; pien mom oye nyiŋ Wot Obaŋa acel keken.

¹⁹Ŋolo kop tye ni aman, ceŋ rik obino i lobo, ento jo omaro piny acol akato ceŋ, pien ticgi reco.

²⁰Pien dano acel acel a rio tiyo gin arac dag ceŋ, mom bino i ceŋ, me kur nyut ticcere kannaler.

²¹Ento dano ame tio tic me ateni bino i ceŋ, me ticcere nen kannaler, ni etio i Obaŋa.

²²Icennere Yecu kede jo mere a lube owoto i lobo Judaya; obedo kedgi kun bato jo.

²³Lakana daŋ onwoŋo tye a batakino jo i Ainon, ceggi kede Calim, pien pii rik dwoŋ kuno, jo obino, obatijagi iye.

²⁴Onwoŋo mom ru otweo Lakana i buc.

²⁵Pyem obedo i akina jo a lubo Lakana kede dano moro me Judaya i kom kop me lonyere.

²⁶Gin obino baŋ Lakana ote kobbe ni, “Rabbi, lo a nwaŋ itye kede loka Jordan, ame rik ikobo kop me caden i kome ca, nen ba, en tye abatija jo, jo luŋ woto baŋe.”

²⁷Lakana ogamo ni, “Dano mom twero nwoŋo ginnoro ka mom omie iya i polo.

²⁸Wun ikomwu ibedo wunu cadenna, pien yam atittiwu ni, ‘An mom a Kricito gira, ento oora ageo nyime.’

²⁹Lo a cuŋ i ŋet nyako en anyom; dyere anyom ame cuŋ i laŋete kun winye, lelo meicel pi winyo dwon anyom; pi mano an cunya yom gira kakare.

³⁰En myero medde, an myero ajwik ajwika.”

³¹Dano ame oya i malo en loo ducu; dano oya i lobo en dano me lobo, kobo kop me lobo; dano ame oya i polo, en loo ducu.

³²En bedo caden pi gin ame eneno kede pi gin a en owinyo, ento mom tye dano moro ame oye kop a en otito.

³³Dano ame oye koppere nwoŋo doŋ omoko ni Obaŋa en won ateni.

³⁴Dano ame Obaŋa ooro kobo kop Obaŋa, pien Obaŋa mom mio Cuny Acil kun pimo apima.

³⁵Papo maro Wod, otyeko miyo jami luŋ aluŋa i ciŋe.

³⁶Dano ame ye Wod, tye kede kwo a perakino nakanaka; dano a mom woro Wod, mom bino neno kwo, ento akemo Obaŋa tye i kome.