Read lango Lakana 4 Bible Online

Lakana 4 - lango bible

Lakana 4

¹Oparicayo daŋ owinyo ni Yecu tye ka loko jo apol me doko jo a lube, kede batijagi ame kato Lakana oko;

²aco kono Yecu ikome mom obatija ŋattoro, jo a lube keken en obatija jo.

³Ka Yecu oŋeo ni Oparicayo owinyo, en oweko lobo Judaya, te dok i Galilaya.

⁴Rik myero en ŋolle i lobo me Camaria.

⁵En rik te tuno i paco moro me Camaria ame nyiŋe Cukar, ceggi kede poto a rik Yakobo mii wode Yucepu.

⁶Akoŋ a Yakobo rik tye kuno, Wottere-nu rik oole meicel, omio Yecu obedo piny i ŋet akoŋ; onwoŋo caa doŋ oromo abicel.

⁷Dako moro me Camaria nwaŋ te bino ka twomo pii. Yecu te kwaye ni, “Mia pii moro, amati.”

⁸Pien onwoŋo jo a lube owoto wilo cam i paco-nono.

⁹Dako me Camaria te penye ni, “Yin dano me Judaya ikwao pii amata baŋa piŋo, ame an a dako me Camaria?” Pien Ojudaya mom mer kede jo Camaria.

¹⁰Yecu ogamo kop a dako ni, “Kono ce iŋeo mot ame Obaŋa mio, kun daŋ iniaŋ i kom dano ame akwayi ni, ‘Mia pii, amat’ ti, kono ikwae, kono en omii pii me kwo.”

¹¹Dako ogamo ni, “Adwoŋ, yin mom itye i gitwomo, akoŋ daŋ tut; kara inwoŋo pii me kwo-nono kwene?

¹²Yin idwoŋ ikato kwarowa Yakobo? En rik omiowa akoŋ man, en ikome yam mato pii man, karacel kede itino mere kede dokkere.”

¹³Yecu ogamo doge ni, “Dano ame mato pii man, oryo pwod bino neke,

¹⁴ento ŋat ame bino mato pii ame an abino miye, oryo mom dok bino neke nino ducu. Pii ame an abino miye bino lokere doko akoŋ ame kukunya i yie, tuno naka i kwo a perakino odoco.”

¹⁵Dako okwae ni, “Adwoŋ, mia piinono, me oryo kur dok neka, awek bino kan ka twomo pii.”

¹⁶Yecu okobbe ni, “Wot icwan cwari, ite dwogo kan.”

¹⁷Dako odok iye ni, “An cwara mom.” Yecu okobbi dako ni, “Yin ikobo kakare ni cwari mom.

¹⁸Aco kono rik cogi tye abic, man ame itye kede-ni mom cwari, ikobo kakare.”

¹⁹Dako okobbe ni, “Adwoŋ, aneni yin adwarpiny giri.

²⁰Kwariwa nwaŋ woro Obaŋa i wi kidi man, ento wun ikobo wunu ni kabedo a myero wor iye Obaŋa tye i Jerucalem.”

²¹Yecu ogamo dog dako ni, “Dako, ye an; kare bino romo ame mom ibino wunu woro Obaŋa Papo i wi kidi man, kadi i Jerucalem.

²²Wun iworo wunu gin ame ikwia wunu, wan oworo gin a wan oŋeo, pien larre ocakere i baŋ Ojudaya.

²³Ento kare bino romo, daŋ doŋ otuno oko, ame ka jo ame woro Obaŋa i ateni, gin bino woro Papo i cuny kede ateni, pien Papo yenyo jo a cal amannono me wore.

²⁴Obaŋa en cuny, jo ame wore myero wore i cuny kede ateni.”

²⁵Dako okobbe ni, “An aŋeo ni Maciya ceŋŋoro bino (ame olwoŋo ni, Kricito): ka ceŋŋoro en otuno, bino nyuttiwa kop luŋ.”

²⁶Yecu odokke iye ni, “An en a kop kedi-nono.”

²⁷Cucuttono jo mere a lube te bino. Gin owuro pien onwoŋo en tye a kop gin i dako, ento mom tye ŋattoro openye ni, “Imito ŋo?” onyo ni, “Ikop kede pino?”

²⁸Dako oweko gulu pii mere, owoto paco, te kobbi jo ni,

²⁹“Biye inen wunu ico moro ame okobba gin a yam atimo ducu. Mom onyo ca en Krici to ennono?”

³⁰Jo obelle i paco, obino baŋe.

³¹I akina-nono jo a lube obako doggi baŋe ni, “Rabbi, cem ba.”

³²En okobbigi ni, “An atye kede cem ame wun ikwia wunu.”

³³Omio jo a lube openyere kengi kengi ni, “Tye dano moro a ŋit okelle cam ba?”

³⁴Yecu okobbigi ni, “Cam mera en me tiyo mit a ŋat oora, kede cobo ticcere.

³⁵Wun mom ikobo wunu ni, ‘Odoŋ dwete aŋwen me cako kac?’ Akobbiwu ni, ‘Tiŋ waŋwu malo, nen wunu kit ame potti obok kede ma akaa.

³⁶Ŋat a kao nwoŋo ocara, coko nyige pi kwo a perakino nakanaka, me acoc kede akac lel karacel.’

³⁷Pien carokop i kan-ni tye kakare, ni, ‘Ŋat a coo pat, ŋat a kao daŋ pat.’

³⁸Rik aorowu me kayo gin ame wun mom icanne wunu iye; jo ocele en ocanne iye, wun idonyo wunu i cannegi.”

³⁹Jo Camaria apol i paco-nono te ye Yecu pi kop ame dako okobo ni “Okobba gin a yam atimo luŋ.”

⁴⁰Ka jo Camaria obino baŋe, gin okwae ni myero koŋ bed kedgi; orio kuno nino aryo.

⁴¹Jo ocele apol oye koppere.

⁴²Gin okobo baŋ dako ni “Koni doŋ wan mom oye pi koppi: pien wan ikomwa doŋ owinyo kede yitwa, otyeko niaŋ ateni ni, dano-ni en Alar me lobo.”

⁴³Ka nino aryo-nu okato, Yecu owoto i Galilaya.

⁴⁴Pien en ikome otuco ni, “Adwarpiny mom oworo i lobo me turgi.”

⁴⁵Ka obino i Galilaya, jo Galilaya ojole, pien gin oneno gin ducu ame en otio i Jerucalem i kare me ecuban, pien gin daŋ rik owoto i ecuban.

⁴⁶En dok te dwogo i Kana me Galilaya, kan ame rik eloko pii odoko koŋo iye. Rik tye aticcoro adit me tun abaka ame onwoŋo wode two i Kapernaum.

⁴⁷Ka en owinyo ni Yecu oya oko i Judaya, obino i Galilaya, owoto okwae ni bin caŋ wode, pien onwoŋo doŋ ceggi to.

⁴⁸Yecu odokke iye ni, “Ka mom ineno wunu anyuttogo kede taŋo, mom ibino ye wunu an kadi atidi moro.”

⁴⁹Atic okobbe ni, “Adwoŋ, tun ame atinna mom ru oto.”

⁵⁰Yecu okobbe ni, “Woti; wodi bino kwo.” Dano-nu oye kop ame Yecu okobbe, te wot oko.

⁵¹Ame en pwod tye i wottere iyo, orwatte kede omiro mere, ame te kobbe ni, “Atinni kwo.”

⁵²En openyogi caa ame two a wode ocako dok iye cen. Gin ogamo ni, “Lyeto oya i kome aworo caa abiro.”

⁵³Pappere oniaŋ ni mano en caa a rik Yecu okobbe iye ni, “Wodi bino kwo”; omio en kede ode ducu oye Yecu.

⁵⁴Man doŋ anyut me aryo ame Yecu otimo ka oya i Judaya, obino i Galilaya.