Read lango Lakana 5 Bible Online

Lakana 5 - lango bible

Lakana 5

¹Icennere Yecu owoto i Jerucalem i ecuban Ojudaya ame onwoŋo tye i kare-nono.

²I laŋet dogcel romi i Jerucalem tye kut ame olwoŋo i dog Eburania ni, Beteceda, ame tye iye gaŋo abic.

³Onwoŋo lwak otwo apol buto kuno, otowaŋ, jo oŋwalo kede jo ame two okweo komgi, [ame okuro tagere a pii.

⁴Pien kare i kare amalaika a Rwot bino i kut, rubo pii. Ŋat okwoŋo lutte i pii ame orubo, kit two ame yam tye i kome luŋ caŋ oko.]

⁵Kuno onwoŋo tye iye dano moro acel ame two mere ori kome mwakki pyeradek wie aboro.

⁶Ka Yecu onene kun obuto, dok oŋeo ni en doŋ operakino kuno pi kare alac, openye ni, “Imito yotkom?”

⁷Atwo odok iye ni, “Adwoŋ, mom atye kede ŋattoro a luta i kut ka pii orubere. Ka atye ka komo iye, ŋat ocele kwoŋo ya, pye oko i nyima.”

⁸Yecu ogamo ni, “Ya malo, ikwany gi-butoni, iwoti.”

⁹Cucut dano-nu ocaŋ; okwanyo gi-buto mere te ero wot. Nino-nu onwoŋo ceŋ cabit,

¹⁰omio Ojudaya okobbi dano ame ocaŋo ni, “Tin ceŋ cabit, cik pe ye ni itiŋ gibutoni.”

¹¹En ogamo doggi ni, ŋat ocaŋa okobba ni, “Kwany gi-butoni, iwoti.”

¹²Gin te penye ni, “Mano ŋa okobbi ni, ‘Kwany gi-butoni, iwot’ tono?”

¹³Ento lo ocano-nono onwoŋo mom ŋeo ŋat ocaŋe. Yecu onwoŋo owoto gire oko, pien jo onwoŋo opoŋ kuno.

¹⁴Icennere Yecu onwoŋe i ot Obaŋa te kobbe ni, “Nen, komi doŋ yot. Kur dok ibal, me gin arac akato mannono mom dok pot i komi.”

¹⁵Danonu owoto orabo baŋ Ojudaya ni, “Yecu en ocaŋa gira.”

¹⁶Gin omio Ojudaya olibo Yecu, pien ocaŋo danonono i ceŋ cabit.

¹⁷Ento Yecu odokkigi iye ni, “Pappa tye atic tuno naka tin, an daŋ atye atic.”

¹⁸En gin omio Ojudaya omedde yenyo yo me neke, mom pi turo cik me cabit keken, ento pien dok olwoŋo Obaŋa ni pappere, kun kette kene ni erom kede Obaŋa.

¹⁹Yecu okobbigi ni, “Ateteni akobbiwu ni, Wod mom twero tiyo ginnoro pire kene, ento tio gin ame en oneno i baŋ Obaŋa Papo; pien gin ame en tio, en gin ame Wod daŋ tio.

²⁰Papo maro Wod, nyutte gin ducu ame etio; dok bino nyutte tic adito akato magi, me iwur wunu.

²¹Pien acalo Papo cero jo oto, miogi kwo, amannono Wod daŋ mio kwo baŋ jo a yie mito.

²²Papo mom ŋolo kop i kom dano moro, ento otyeko miyo ŋolo kop luŋ baŋ Wod,

²³me jo ducu ket kwogo i kom Wod, acalo oketo i kom Papo. Dano a mom keto kwogo i kom Wod, mom keto kwogo i kom Papo ame oore.

²⁴Ateteni akobbiwu ni, dano ame winyo koppa, kun ye ŋat ame oora, tye kede kwo a perakino nakanaka; mom obino ŋolle kop, ento doŋ oya i to, otuno i kwo.

²⁵“Ateteni akobbiwu ni, kare bino romo, daŋ doŋ otuno oko, ame jo oto bino winyo dwon Wot Obaŋa; jo owinyo bino kwo.

²⁶Pien acalo Papo tye kede kwo i yie kene, amannono daŋ oye Wod obed i kwo i yie kene,

²⁷dok omie twer me ŋolo kop, pien en Wod a dano.

²⁸Kur iwur wunu kop man, pien kare bino tuno ame jo ducu a tye i lyel bino winyo dwone,

²⁹gin bino donyo oko. Jo a rik otimo gin abeco gin bino donyo i cer me kwo, jo a rik otimo gin areco gin bino donyo i cer me ŋolo kop.

³⁰“An mom atwero timo ginnoro pira kena; aŋolo kop acalo awinyo; kop ame aŋolo tye atira, pien mom amito tiyo gin ame an amito, ento gin ame ŋat oora mito.

³¹Ka arabo kop i koma kena, koppa mom bedo me ateni.

³²Tye ŋat ocele ame en caden mera; aŋeo ni kop ame en tito i koma kop ateni.

³³Wun rik ioro wunu kwena baŋ Lakana, en orabbiwu kop ateni me caden.

³⁴An mom agamo kop me caden i baŋ dano, atittiwu kop magi me ilarre wunu.

³⁵En rik tara ame ocwinyo, alyel, nwaŋ imito wunu lelo pi kare anok i lero mere.

³⁶Ento atye kede kop me caden a pire dit kato mea Lakana oko; pien Papo omia tic me acoba, tic ame atye ka tiyogi-nono, gin ikomgi bedo cadenna, ni Papo ame oora.

³⁷Doki Papo a nwaŋ oora, en ikome obedo cadenna. Wun rik mom iwinyo wunu dwone, mom ru ineno wunu callere;

³⁸pe ru ibedo wunu kede koppere i yiwu, pien mom iye wunu ŋat ame ooro.

³⁹Ibedo yenyo wunu coc a yam ocoo, pien itamo wunu ni, i coccono itye wunu kede kwo a perakino nakanaka. Aco kono coccono daŋ cadenna, tito kop i koma;

⁴⁰ento ikwero wunu bino baŋa me inwoŋ wunu kwo.

⁴¹An mom ayenyo kwogo ibaŋ jo.

⁴²Ento aŋeo ni mom itye wunu kede mar Obaŋa i yiwu.

⁴³Abino i nyiŋ Pappa, ento wun mom igama wunu. Ento ka ŋattoro obino i nyiŋe kene, wun ibino wunu gamo.

⁴⁴Itwero ye wunu niŋo ka ce ŋat acel acel yenyo kwogo i baŋ awottere, ento mom iyenyo wunu kwogo ame ya i baŋ Obaŋa acel kene?

⁴⁵Kur itam wunu ni abino dotowu baŋ Obaŋa Papo; dano abino dotowu en Muca, ame igeno wunu.

⁴⁶Ka iye wunu Muca, onwoŋo myero iye wunu an daŋ, pien en ocoo kop i koma.

⁴⁷Ento ka mom iye wunu kop ame en ocoo, ibino wunu ye koppa nino?”