Read lango Lakana 6 Bible Online

Lakana 6 - lango bible

Lakana 6

¹Icennere Yecu owoto loka nam me Galilaya, en nam me Tiberia.

²Lwak adwoŋ olube, pien gin oneno anyuttogo ame en otio i kom otwo.

³Yecu oyito i wi kidi, obedo piny kuno karacel kede jo a lube.

⁴Ecuban me Kato Ojudaya onwoŋo doŋ ceggi.

⁵Yecu otiŋo waŋe, oneno lwak apol tye a bino baŋe. Omio openyo Pilipo ni, “Obino wilo kwon kwene me jo man cami?”

⁶En okobbe man pi omo cunye; en onwoŋo ŋeo gin ame emito tiyo.

⁷Pilipo odokke iye ni, “Ogati me ciliŋ mia aryo mom bino romogi, ame rommi dano acel acel gamo anok.”

⁸Dano acel i akina jo a lube, en Anderiya omin a Cimon Petero, okobbe ni,

⁹“Awobi moro tye kan kede ogati abic me cayiri, kede reccogo aryo; ento kara magi konyo ŋo baŋ lwak a rom man-ni?”

¹⁰Yecu ogamo ni, “Miu jo bed piny.” Lum onwoŋo olot atek i kabedo-nu; co obedo piny welgi mito romo tutumia abic.

¹¹Yecu okwanyo ogati, opwoo, opokki jo obedo piny, kede rec daŋ amannono, kit acalo gin mito.

¹²Ka doŋ gin oyeŋ, Yecu okobbi jo a lube ni, “Cok wunu ŋide ame odoŋ, ginnoro kur rweny.”

¹³Gin ocoko ŋide opoŋ adukki apar wie aryo, ame oya i ogati abic me cayiri ame jo ocamo odoŋ.

¹⁴Ka jo-nu oneno anyut ame en otio, gin te kobo ni, “Ateteni, man en adwarpiny ca ame abino i lobo.”

¹⁵Ka Yecu oniaŋ ni gin mito bino make me kete bedo abaka tetek, en olwi, owoto i wi kidi en kene.

¹⁶Ka piny oyuto, jo a lube owoto i nam

¹⁷Gin odonyo i yee, ote cako ŋolo dye nam me wot Kapernaum. Onwoŋo piny odoko col, Yecu daŋ onwoŋo pe ru obino baŋgi.

¹⁸Nam otiŋere pi yamo atek ame tye akodo.

¹⁹Ka onwoŋo pwod gin okwaŋ ame romo mairo adek onyo aŋwen, gin oneno Yecu kun awot i wi nam kede tyene, obino ame ceggi kede yee; lworo omakogi.

²⁰En okobbigi ni, “An ennono; kur ilwor wunu.”

²¹Omio gin oye game i yee kede yomcuny. Cucuttono yee otuno i wi tela kan ame gin onwoŋo awot iye.

²²Orwo mere jo a rik odoŋ Ioka nam tuŋ cel, rik gin ŋeo ni tye yee acel keken kuno. Yecu rik daŋ pe odonyo karacel i jo a lube i yee-naca, ento jo a lube rik owoto gigi kengi.

²³Kadi bed amannono, yee ocele ame oya i Tiberia rik obino ceggi kede kabedo ame rik ocamo iye ogati ame Rwot opwoo.

²⁴Ka lwak oneno ni Yecu mom kuno, anaka jo a lube, gin odonyo i yee, owoto i Kapernaum yenyo Yecu.

²⁵Ka gin onwoŋe loka nam tuŋ-ca, openye ni, “Rabbi, kara ibino kan awene?”

²⁶Yecu ogamo doggi ni, “Ateteni akobbiwu ni, itye wunu ka yenya, mom ni, pien rik ineno wunu anyut, ento pien rik icamo wunu ogati iyeŋ wunu kede.

²⁷Kur iti wunu pi cam a top, ento pi cam a ri tuno i kwo a perakino nakanaka, ame Wot a dano bino miyowu; pien Obaŋa Papo oketo anennere i kome.”

²⁸Gin te penye ni, “Myero otim ŋo me oti tic Obaŋa?”

²⁹Yecu ogamo ni, “Man en tic Obaŋa: ye wunu dano ame en ooro.”

³⁰Gin openye ni, “Anyut aŋo ame yin itio ame myero wan onen, ote ye yin? Tic aŋo kara ame yin itio?

³¹Kwariwa con ocamo manna i tim, acalo ocoo ni, ‘En rik omiogi kwon acama ame oya i polo.’ ”

³²Yecu ogamo doggi ni, “Ateteni akobbiwu ni, Muca mom rik omiowu kwon oya i polo, ento Pappa en a tye ka miyowu kwon me ateni a ya i polo.

³³Pien kwon Obaŋa en kwon ame bino piny kun ya i polo, mio kwo baŋ lobo.”

³⁴Gin te kwaye ni, “Rwot, miwa kwon man nino luŋ.”

³⁵Yecu te kobbigi ni, “An a kwon me kwo; dano ame bino baŋa, kec mom bino neke, dano ame ye an, oryo mom bino cire.

³⁶Ento nwaŋ akobbiwu ni, wun kadi bed inena wunu ento mom iye wunu.

³⁷Jo ducu ame Pappa omia bino bino baŋa: ŋat ame obino baŋa mom abino ryeme.

³⁸Pien doŋ abino piny kun aya i polo, mom pi cobo mitta pira kena, ento pi cobo mit a ŋat ame rik oora.

³⁹Man en gin ame ŋat oora mito, ni kur arweny ŋattoro i kom jo luŋ ame en rik omia, ento acergi i ni no me agikki.

⁴⁰Man en gin ame Pappa mito, ni dano acel acel ame neno Wod, dok ye en, myero nwoŋ kwo a perakino nakanaka; an abino cere i nino me agikki.”

⁴¹Jo Judaya oŋuŋura i kome, pien okobo ni, “An kwon ame bino piny kunya i polo.”

⁴²Gin te kobo ni, “Man mom Yecu, wot a Yucepu, ame pappere kede tottere wan oŋeo? Pino en dok kobo ni, ‘An abino piny kun aya i polo?’ ”

⁴³Yecu ogamo doggi ni, “Kur iŋuŋura wunu kenwu kenwu.

⁴⁴Dano moro mom twero bino baŋa ka Pappa ame rik oora mom ocwae baŋa; dok abino cere i nino me agikki.

⁴⁵Ocoo i kop odwarpiny ni, ‘Gin luŋ Obaŋa bino pwonyogi.’ Dano acel acel ame winyo i baŋ Papo, dok mako, bino baŋa.

⁴⁶Mom ni ŋattoro yam oneno Papo, kono ka ŋat ame yam oya i baŋ Obaŋa, en oneno Papo.

⁴⁷Ateteni akobbiwu ni, ŋat ame ye tye kede kwo a perakino nakanaka.

⁴⁸An akwon me kwo.

⁴⁹Kwariwu rik ocamo manna i tim, gin obin oto oko.

⁵⁰Man en kwon ame obino piny kun oya i polo, ame ka dano moro ocamo, mom bino to.

⁵¹An a kwon me kwo ame obino piny kun oya i polo; ka ŋattoro ocamo kwon man, en bino kwo nakanaka; kwon ame abino miye en koma, ame amio me lo bo nwoŋ kwo.”

⁵²Jo Judaya te ero pyem agwa i akinagi kengi kengi kun okobo ni, “Dano man twero miyowa kome me acama niŋo?”

⁵³Yecu te kobbigi ni, “Ateteni akobbiwu ni, ka mom icamo wunu kom Wot a dano, imato wunu remo mere, mom itye wunu kede kwo i yiwu.

⁵⁴Ŋat ame camo koma, ame mato remona, tye kede kwo a perakino nakanaka, an abino cere i nino me agikki.

⁵⁵Pien koma en cam me ateni, kede remona en gi-amata me ateni.

⁵⁶Ŋat ame camo koma, ame mato remona, bedo i yia, an daŋ abedo i yie.

⁵⁷Acalo Papo akwo nwaŋ oora, kun an abedo kwo pi Papo, amannono ŋat ame cama bino kwo pira.

⁵⁸Man en kwon ame rik obino piny kun oya i polo, mom kit kwon ame kwariwu con ocamo, ote to oko ca; ŋat ame camo kwon man bino kwo nakanaka.”

⁵⁹En okobo man kun onwoŋo en tye apwony i kacokere i Kapernaum.

⁶⁰Jo a lube apol, ka owinyo, okobo ni, “Man kop ame tek; ŋa a twero winyo en-nie?”

⁶¹Ento Yecu oŋeo i yie kene ni jo a lube tye aŋuŋura i kom kop man; openyogi ni, “Kop man obalo tamwu oko?

⁶²Kara twero bedo nino ka kono ineno wunu Wot a dano kun ayito kan ame yam en bedo iye con?

⁶³Gin ame mio kwo en cuny; kom mom konyo; kop ame akobbiwu en cuny kede kwo.

⁶⁴Ento tye jo mogo i akinawu ame mom ye.” Pien cakere i ageyi Yecu rik oŋeo jo ame mom ye-nono, kede ŋat ame bino keto erupe i kome.

⁶⁵En dok okobo ni, “Man en gin omio rik akobbiwu ni, mom tye ŋattoro ame twero bino baŋa, ka ce Papo mom omie twer me bino.”

⁶⁶Cakere i kare-nu jo apol ame lube odok oko cen, mom dok omedde wot kede.

⁶⁷Yecu openyo jo a lube apar wie aryo ni, “Wun daŋ imito wunu ket oko?”

⁶⁸Cimon Petero ogamo doge ni, “Rwot, obino wot baŋ ŋa? Yin itye kede kop me kwo a perakino.

⁶⁹Wan oye, dok otyeko niaŋ ni yin ŋat Acil ame oya i baŋ Obaŋa.”

⁷⁰Yecu okobbigi ni, “Rik mom ayerowu wun jo apar wie aryo? Ento dano acel i akinawu catan.”

⁷¹En onwoŋo akobo Juda wot a Cimon me Keriot, pien kadi bed rik en dano acel i akina jo apar wie aryo, en bino keto erupe i kome.