Read lango Lakana 7 Bible Online

Lakana 7 - lango bible

Lakana 7

¹Icennere Yecu obedo ka wot i akina Galilaya; pe omito wot i Judaya, pien jo Judaya onwoŋo mito neke.

²Ecuban Ojudaya me Gero Gonye onwoŋo doŋ ceggi.

³Omego mere okobbe ni, “Ya oko i kano iwot i Judaya, me jo a lubi nen tic ame yin itio.

⁴Mom tye dano moro ame tio tic i muŋ, ka en ikome mito nen kannaler. Ka itio ticcogo, nyutte keni baŋ lobo.”

⁵Pien kadi omego mere ikome daŋ mom oye en

⁶Yecu okobbigi ni, “Karena mom ru otuno, karewu tye nino luŋ.

⁷Lobo mom twero dagowu, ento daga, pien an atuco kop i kome, ni tiecere luŋ reco.

⁸Wotu i ecuban; an mom awot i ecuban-nono, pien karena mom ru oromo aber.”

⁹Ka doŋ okobo kop man baŋgi, en odoŋ i Galilaya.

¹⁰Ka omego mere otyeko wot i ecuban, en daŋ olibere owoto i muŋ, mom kannaler.

¹¹Jo Judaya obedo ka yenye i ecuban kun openyo ni, “En tye kwene?”

¹²Lwak rik oŋuŋura meicel pire. Jo mogo kobo ni, “En dano aber”; jo ocele ko bo ni, “Mom gire, tye ka rwenyo lwak.”

¹³Ento pi lworo Ojudaya, mom tye ŋattoro okobo pire kannaler.

¹⁴Ka doŋ otuno i dye ecuban, Yecu owoto i ot Obaŋa, ocako pwony iye.

¹⁵Ojudaya owuro kun okobo ni, “Dano man oŋeo nukuta niŋo, kun mom okwano?”

¹⁶Yecu odokkigi iye ni, “Pwonnya mom mera ikoma, ento mea ŋat ame rik oora.

¹⁷Ka dano moro mito tiyo gin ame Obaŋa mito, en bino niaŋ ka pwony man oya i baŋe, onyo ka akobo pira kena.

¹⁸Dano ame kobo pire kene, yenyo kwogo pire kene; ento dano ame yenyo kwogo pi ŋat ame oore, dano-nu en me ateni, gin ame mom atir mom i yie.

¹⁹Muca nwaŋ mom omiowu cik? Ento mom tye dano moro i akinawu ame gwoko cik-ku. Piŋo imito nuwu neka?”

²⁰Lwak ogamo ni, “Yin ajaracen! Ŋa ame mito neki?”

²¹Yecu ogamo doggi ni, “Nwaŋ atio tic acel i cen cabit, wun ducu iwuro wunu.

²²Muca nwaŋ omiowu cik me lirre (pe ni oya i baŋ Muca, ento oya i baŋ kwariwa), wun daŋ icen cabit iliro wunu dano.

²³Ka oliro dano i cen cabit, ni cik a Muca kur baile, pino yiwu wan i koma pi cano kom dano i cen cabit?

²⁴Kur iŋol wunu kop ineno wunu i waŋ, ento ŋol wunu kop atira.”

²⁵Jo mogo me Jerucalem te kobo ni, “Man mom en dano ame amito neko-nie?

²⁶Nen, en tye ka kop kannaler, gin daŋ mom okobbe ginnoro. Doŋ oloc niaŋ ateni ni man en Kricito?

²⁷Ento wan oŋeo kan a dano man oya iye; ka Kricito bino nen, mom tye dano moro ame bino ŋeyo kan ame oya iye.”

²⁸Yecu ka tye apwony i ot Obaŋa, en oredo ni, “Wun iŋea wunu, iŋeo naka kan ame aya iye? An mom abino pira kena; ŋat ame oora en me ateni, ame wun mom iŋeo wunu.

²⁹An aŋee, pien aya i baŋe, en oora.”

³⁰Gin te mito make, ento mom tye dano moro ame oketo ciŋe i kome, pien kare mere pe ru oromo.

³¹Ento jo apol i akina lwak oye en. Gin okobo ni, “Ka Kricito bino nen, bino tiyo anyut apol ame kato en ame dano man otio-ni?”

³²Oparicayo owinyo lwak tye aŋunura i kome, omio olamdog adoŋo kede Oparicayo ocwao otic me make.

³³Yecu okobo ni, “Pwod koŋ abedo kedwu pi kare anok, icennere abino dok baŋ ŋat ame cen oora.

³⁴Ibino wunu yenya, ento mom ibino nwoŋa; kan ame an atye iye, wun mom itwero tuno wunu iye.”

³⁵Ojudaya te penyere kengi kengi ni, “Dano man kara amito wot kwene, ame wan mom obino nwoŋe-ni? En amito wot baŋ jowa ame oket ata i akina jo Grik kede pwonyo jo Grik?

³⁶Kara man te koppere niŋo, ni, ‘Ibino yenya wunu, ento mom ibino nwoŋa wunu,’ dok ni, ‘Kan ame an atye iye, wun mom itwero tuno wunu iye?’ ”

³⁷I nino ame ecuban gik iye, en nino adit, Yecu oya malo oredo ni, “Ka oryo neko dano moro, en myero bin mat pii baŋa.

³⁸Dano ame ye an, acalo coc a yam ocoo kobo, ‘Kulli me pii me kwo bino mollo ya i yie.’ ”

³⁹Rik en okobo man i kom Cuny Acil ame jo a ye en bino nwoŋo; pien onwoŋo rik pe ru omio Cuny Acil, pien onwoŋo pe ru oketo kwogo i kom Yecu.

⁴⁰Ka gin owinyo kop magi, jo mogo i akina lwak te kobo ni, “Ateni, man adwarpiny.”

⁴¹Jo ocele okobo ni, “Man Kricito.” Jo mogo openyo ni, “Kricito yam ya i Galilaya bo?

⁴²Coc a yam ocoo mom tito ni Kricito ya i anywalli a Daudi, dok ya i Beterekem, ame paco a Daudi?”

⁴³Omio apokapoka obedo i akina lwak pire.

⁴⁴Jo mogo i akinagi omito make, ento mom tye ŋattoro ame oketo ciŋe i kome.

⁴⁵Otic rik te dwogo baŋ olamdog adoŋo kede Oparicayo, eka gin te penyogi ni, “ŋo omonowu kele?”

⁴⁶Otic ogamo doggi ni, “Mom tye dano moro ame yam okobo kop acalo dano man.”

⁴⁷Oparicayo okobbi otic ni, “Wun daŋ otyeko rwenyowu oko?”

⁴⁸Tye ŋattoro i akina oloc onyo i akina Oparicayo ame oye en?

⁴⁹Ento lwak man a kwia cik-ki oceno oko.

⁵⁰Nekodem, ame con obino baŋe, en dano acel i akinagi, te penyogi ni,

⁵¹“Cikwa ŋolo kop i kom dano aboŋo winyo koppere, me niaŋ gin ame en otimo?”

⁵²Gin te dokke iye ni, “Yin daŋ iya i Galilaya? Koŋ iyeny, ibino neno ni mom tye adwarpinnyoro ame bino ya i Galilaya.” [

⁵³Ŋat acel acel odok i ode;