Read lango Lakana 8 Bible Online

Lakana 8 - lango bible

Lakana 8

¹Ento Yecu owoto i wi kidi me Jeituni.

²Odiko con en dok odwogo i ot Obaŋa; jo luŋ ocokere baŋe, en obedo piny, opwonyogi.

³Opwony-cik kede Oparicayo okelo dako moro ame omako pi cot. Gin te cibe i dyere,

⁴ote kobbi Yecu ni, “Apwony, dako man omako pi cot, onwoŋe kom iye.

⁵Aco i cik Muca ociko ni myero onap kodi jo-nono kede gweŋ. Kara yin iŋolo nino?”

⁶Gin okobo man pi bite, me onwoŋ kopporo me bino dote. Ento Yecu okulle, ocoo piny kede ciŋe.

⁷Ka gin omedde penye, en otirre te kobbigi ni, “Ŋattoro i akinawu ame mom i bai en amyero ge nape kede gweŋ.”

⁸En dok okulle, ocoo piny kede ciŋe.

⁹Ka gin owinyo kop man, oket acel acel, cakere i kom jo adoŋo; Yecu oloŋ kene kun dako pwod ocuŋ kan a rik ocibe iye.

¹⁰Yecu otirre, openyo dako ni, “Dako, ane gin? Mom tye ŋattoro oŋolo kop oloi?”

¹¹En ogamo ni, “Ŋattoro mom, adwoŋ.” Yecu okobo ni, “An daŋ mom aŋolo ni kop loi. Wot giri; cakere tin kur dok ibal ba.”]

¹²Yecu dok okobo kedgi kun rabo ni, “An a ceŋ me lobo; dano ame luba mom bino wot i piny acol, ento bino bedo kede ceŋ me kwo.”

¹³Oparicayo okobbe ni, “Yin itito kop me caden i komi piri keni; kop ame itito mom ateni.”

¹⁴Yecu ogamo kopgi ni, “Kadi bed atito kop i koma kena, koppa en kop me ateni, pien an aŋeo kan ame aya iye, kede kan ame awot iye, ento wun mom iŋeo wunu kan ame aya iye kede kan ame awot iye.

¹⁵Wun iŋolo wunu kop i kite me dano, an mom aŋolo kop i kom ŋattoro.

¹⁶Ento kadi bed aŋolo kop, ŋolo kop mera tye atira, pien an mom atye kena. Ento Papo ame oora tye keda.

¹⁷I cik mewu ocoo ni, ‘Kop a caden aryo bedo me ateni.’

¹⁸An atito kop me caden i koma kena, dok Pappa ame oora daŋ en cadenna.”

¹⁹Gin te penye ni, “Ane Pappi?” Yecu te dok iye ni, “Wun mom iŋea wunu, kadi Pappa. Kono iŋea wunu, kono iŋeo wunu Pappa daŋ.”

²⁰En okobo kop magi i kare ame tye apwonyo jo i ot Obaŋa i ka kano lim, ento mom tye dano moro ame omake, pien kare mere onwoŋo mom ru oromo.

²¹En dok okobbigi ni, “An awot oko; ibino wunu yenya, ento ibino wunu to i balwu. Kan ame abino wot iye, wun mom itwero wunu tuno iye.”

²²Ojudaya te kobo ni, “En bino nekere kene, pien okobo ni, ‘Kan ame abino wot iye, wun mom itwero tuno wunu iye?’ ”

²³En okobbigi ni, “Wun iya wunu i piny; an aya i malo. Wun ibedo wunu jo me lobo man, an mom me lobo man.

²⁴Man en gin omio akobbiwu ni, wun ibino to wunu i balwu, pien ka mom iye wunu ni an atye, ibino to wunu i balwu.”

²⁵Gin te penye ni, “Kara yin i na?” Yecu te dokkigi ni, “An ŋat ame yam atittiwu cakere i ageyi.

²⁶Atye i kop apol me akoba i komwu, kede kop me aŋola apol; ento ŋat ame oora en me ateni, an atitti lobo gin ame doŋ awinyo i baŋe.”

²⁷Gin mom oniaŋ ni en tye ka tittigi kop i kom Obaŋa Papo.

²⁸Omio Yecu te kobbigi ni, “Ka doŋ itiŋo wunu Wot a dano malo, ibino wunu niaŋ ni an atye, dok ni mom atio ginnoro pira kena, ento akobo gin ame Pappa opwonya iye.

²⁹Ŋat ame oora tye keda; mom oweka kena, pien atio gin ame yie mito didik.”

³⁰Ka en okobo man, jo apol oye en.

³¹Yecu dok okobo baŋ jo Judaya ame oye en ni, “Ka imoko wunu i koppa, wun jo mera a luba me ateni,

³²daŋ ibino wunu ŋeyo kop me ateni, kop me ateni bino gonyowu.”

³³Gin te dokke iye ni, “Wan ikwae Iburaim, pe ru obedo opii a ŋattoro. Man dok ikobo niŋo ni, ‘Obino gonyowu?’ ”

³⁴Yecu te dokkigi iye ni, “Ateteni akobbiwu ni, jo ducu ame timo bai, gin opii abal.

³⁵Opi i mom perakino i ot nakanaka, ento atin anywalli perakino iye nakanaka.

³⁶Amannono ka Wod ogonyowu, obino gonyowu ateni.

³⁷Aŋeo ni wun ikwae Iburaim; ento wun imito wunu neka, pien koppa mom onwoŋo kabedo i yiwu.

³⁸An akobo gin ame aneno i baŋ Pappa, ento wun itio wunu gin ame iwinyo i baŋ papawu.”

³⁹Gin te gamo doge ni, “Iburaim en papawa.” Yecu okobbigi ni, “Kono wun itino Iburaim, kono itimo wunu gin ame yam Iburaim otimo.

⁴⁰Ento koni imito wunu neka, an dano ame atittiwu kop me ateni ame awinyo i baŋ Obaŋa; Iburaim yam mom otio amannono.

⁴¹Wun itio wunu gin ame papawu timo.” Gin odokke iye ni, “Wan mom otino luk; wan otye i papawa acel, en Obaŋa.”

⁴²Yecu ogamo doggi ni, “Kono Obaŋa papawu, kono imara wunu, pien an aya i baŋ Obaŋa, aman doŋ atye kan; mom abino pira kena, en ame oora.

⁴³Piŋo mom iniaŋ wunu kop ame an akobo? Pien mom itwero wunu winyo koppa.

⁴⁴Wun iya wunu i baŋ papawu Catan, imito wunu co bo mit a papawu. En anek geye i acakki piny, mom cuŋ i ateni, pien ateni mom i yie. Ka en kobo goba, en kobo acalo kite mere tye, pien en agoba, dok en won goba.

⁴⁵Ento mom iye wunu an, pien an akobo kop me ateni,

⁴⁶ŋa i akinawu ame twero nyu to balloro i koma? Ka atito kop me ateni, ŋo ame omonowu ye an?

⁴⁷Dano oya i baŋ Obaŋa winyo kop Obaŋa; gin omonowu winyo, pien mom iya wunu i baŋ Obaŋa.”

⁴⁸Jo Judaya odokke iye ni, “Wan pe okobo kakare ni yin i dano me Camaria, yin ajaracen?”

⁴⁹Yecu te dokkigi iye ni, “An mom ajaracen; ento aworo Pappa, wun mom iwora wunu.

⁵⁰An mom ayenyo kwogona pira kena; tye ŋat ame yenyo, en bino ŋolo kop.

⁵¹Ateteni akobbiwu ni, ka ŋattoro gwoko koppa, mom bino ne no to atwal.”

⁵²Ojudaya odokke iye ni, “Koni doŋ oniaŋ ni yin ajaracen. Iburaim nwaŋ oto, kede odwarpiny daŋ; ento yin ikobo ni, ‘Ka ŋattoro gwoko koppa, mom bino bilo to atwal.’

⁵³Yin i dit ikato kwarowa Iburaim ame rik oto-ni? Odwarpiny daŋ oto do! Kara yin ikette keni ni yin i ŋa?”

⁵⁴Yecu te gamo ni, “Ka aketo kwogo i koma kena, kwogo mera mom konyo; Pappa en ame ke to kwogo i koma, ame wun ikobo wunu ni en Obaŋawu.

⁵⁵Ento wun mom iŋee wunu, an aŋee. Ka kono akobo ni mom aŋee, kono adoko agoba bala wun; ento aŋee, agwoko koppere.

⁵⁶Kwarowu Iburaim rik olelo ni ebino neno nino mera; rik one no, cunye te bedo yom.”

⁵⁷Ojudaya te kobbe ni, “Yin ame mwakani pe ru oromo pyerabic-ci, ineno Iburaim?”

⁵⁸Yecu ogamo doggi ni, “Ateteni akobbiwu ni, ame Iburaim pwod mom, onwoŋo an doŋ atye.”

⁵⁹Omio gin okwanyo gweŋ me nape; ento Yecu opono, odonyo oko i ot Obaŋa.