Read lango Lakana 9 Bible Online

Lakana 9 - lango bible

Lakana 9

¹Ka cen en tye ka wot iyo, oneno dano ame onywalo ame waŋe oto.

²Jo mere a lube openye ni, “Rabbi, na ame obalo, dano man on yo jo ame onywale bo, omio onywale ame waŋe oto?”

³Yecu te gamo ni, “Dano man mom obalo, kadi jo ame onywale daŋ, ento man otimere me tic Obaŋa onyutte i kome.

⁴Myero oti wunu tic a ŋat ame oora kun cen pwod tye; dyewor bino tuno ame ŋattoro mom twero tic.

⁵Ka pwod atye i lobo, an a ceŋ me lobo.”

⁶Ka en okobo amannono, oŋulo lao piny, orubo kede lobo, te juko wan dano-nono kede lobo,

⁷te kobbe ni, “Woti, ilwok i kut me Ciloam” (ame te koppere ni, Ame ooro). En owoto, olwoko, odwogo ame waŋe doŋ neno.

⁸Jo me turgi kede jo a yam ne ne ka en akwayo lim te kobo ni, “Man mom dano ame yam bedo piny kun kwao lim?”

⁹Jo mogo okobo ni, “En ikome”; jo ocele ni, “Pe gire, ento cal kede acala.” En dano-nono te gamo ni, “Kom an gira ennono.”

¹⁰Gin te penye ni, “Kara waŋi oyabere nino?”

¹¹En ogamo ni, “Dano ame olwoŋo ni Yecu orubo lobo, ojuko kede waŋa, te cika ni, ‘Woti, ilwok i Ciloam.’ Rik awoto, alwoko, acako neno piny.”

¹²Gin openye ni, “En tye kwene?” Ogamo ni, “Mom aŋeo.”

¹³Gin otero dano a yam waŋe otonono baŋ Oparicayo.

¹⁴Nino ame Yecu orubo iye lobo-nono, te yabo kede waŋe, onwoŋo rik ceŋ me cabit.

¹⁵Oparicayo openyo dano-nono odoco ni, “Kara waŋi oyabere niŋo?” En odokkigi iye ni, “En ojuko waŋa i lobo, alwoko, omia aneno piny.”

¹⁶Jo mogo i akina Oparicayo te kobo ni, “Dano man mom oya ibaŋ Obaŋa, pien mom gwoko cik me cen cabit.” Ento jo ocele okobo ni, “Dano ame abalo twero tiyo anyut a rom man?” Omio apokapoka obedo tye i akinagi.

¹⁷Dok openyo dano ame yam waŋe oto ni, “Yin kono itamo kop aŋo i kome, pien oyabo waŋi?” En odok iye ni, “En adwarpiny do.”

¹⁸Ojudaya mom oye ni en rik obedo atowaŋ, dok ni oyabo waŋe, ituno ka olwoŋo jo ame onywalo dano ame waŋe oyabere-ni.

¹⁹Gin ote penyogi ni, “Man atinwu ame ikobo wunu ni onywalo a waŋe oto? Do omio en koni doŋ neno piny?”

²⁰Jo onywale te dokkigi iye ni, “Wan oŋeo ni man obedo atinwa, dok daŋ yam onywale ame waŋe oto;

²¹ento kite ame en koni neno kede piny, wan mom oŋeo, dok ŋat oyabo waŋe daŋ mom oŋeo. Penye wunu; en doŋ dwoŋ, en bino kop pire kene.”

²²Jo onywale okobo man pien onwoŋo olworo jo Judaya, pien jo Judaya onwoŋo oporo kop karacel ni, ka ŋattoro otuco ni Yecu en Kricito, obino ryemo oko i kacokere.

²³En gin omio jo onywale okobo ni, “En doŋ dwoŋ, penye wunu.”

²⁴Omio olwoŋo dano a yam waŋe oto tyen me aryo, ote kobbe ni, “Mi kwogo baŋ Obaŋa; wan oŋeo dano man abalo.”

²⁵En ogamo ni, “Ka en abalo, an mom aŋeo; gin acel keken ame an aŋeo, rik waŋa oto, koni doŋ aneno piny.”

²⁶Openye ni, “En otimi niŋo? Oyabo waŋi i kite aŋo?”

²⁷En okobbigi ni, “Doŋ atittiwu con, wun mom iwinyo wunu. Piŋo pwod imito wunu winyo? Wun daŋ imito wunu doko jo mere a lube bo?”

²⁸Gin te yete kun okobo ni, “Yin en ibedo dano a lube, ento wan olubo giwa Muca.

²⁹Wan oŋeo ni Obaŋa rik okobo gin kede Muca, ento dano man mom oŋeo kan ame oya iye.”

³⁰Dano ca te dokkigi iye ni, “Man kop me awura atek! Wun mom iŋeo wunu kan ame en oya iye, kun en oyabo waŋa.

³¹Wan oŋeo ni Obaŋa mom winyo abalo, ento ka dano woro Obaŋa, dok tio gin ame en mito, Obaŋa winye.

³²A naka rik con mom ru owinyere ni ŋattoro oyabo wan dano ame onywale a waŋe oto.

³³Kono dano man rik mom oya i baŋ Obaŋa, kono mom twero ti mo ginnoro.”

³⁴Gin ogamo doge ni, “Yin a rik kom onywali i bal keken, daŋ ipwonyowa?” Gin te ryeme oko.

³⁵Yecu ka owinyo ni oryeme oko, onwoŋe te penye ni, “Yin iye Wot a dano?”

³⁶En odok iye ni, “En na, adwoŋ, me aye en?”

³⁷Yecu okobbe ni, “Doŋ inene; en en ame tye ka kop kedi-ni.”

³⁸En okobo ni, “Rwot, aye”; owore.

³⁹Yecu okobo ni, “An abino i lobo man pi ŋolo kop, wek jo a mom neno gin nen, jo ame neno dok jo a wangi oto.”

⁴⁰Jo mogo i akina Oparicayo ame onwoŋo ceggi kede owinyo kop man. Gin te penye ni, “Wan daŋ waŋwa oto?”

⁴¹Yecu ogamo doggi ni, “Ka kono waŋwu oto, kono mom itye wunu kede bal; ento wun ikobo wunu ni, ‘Wan oneno piny’; pi mannono balwu pwod doŋ bedo gire.