Read lango Tic Okwena 10 Bible Online

Tic Okwena 10 - lango bible

Tic Okwena 10

¹Rik tye lo moro i Kaicaria nyiŋe Komelio, en rik adwoŋ cirikale me eryoŋet ame olwoŋo ni, me Itali.

²En rik dano awor, a daŋ lworo Obaŋa karacel kede ode ducu; rik poko jami mere apol me konyo Ojudaya, daŋ kwao Obaŋa kare luŋ.

³I nino moro acel i caa aboŋwen me dyeceŋ, en te neno amalaika a Rwot kannaler i ginanyuta kun donyo baŋe te kobbe ni, “Komelio.”

⁴En daŋ waŋe te cuŋ i kome kun lworo amake, ete kobo ni, “Kara ninono ba, Rwot?” En te kobbe ni, “Kwaeci kede kony ame ibedo miyo otuno malo baŋ Rwot, omio en opo piri.

⁵Amanni cwa jo i Yoppa me wot kel lo moro a nyiŋe Cimon, ame olwoŋo daŋ ni Petero.

⁶En bedo tuŋ anyoŋlao moro ame ode tye i dog nam, nyiŋe Cimon.”

⁷A doŋ amalaika ame okobo kede kop man otyeko wot oko, en te cwano jo aryo i akina omiro ame bedo tuŋe, kede cirikale acel a woro Obaŋa ame en dano acel i akina cirikale ame bedo tuŋe didik.

⁸En te tittigi gin ame otimere luŋ, te cwayogi i Yopa.

⁹Orwo mere ame gin pwod otye i wotgi, a doŋonoko ceggi i ŋet bomanono, Petero oyito i wi ot malo me wot kwayo Obaŋa i akina caa abicel.

¹⁰Kec rik te neke, eka te mito cam; ento ame pwod otye ka yiko, tammere oyutte,

¹¹te neno polo oyabere, ginnoro te ya iye acalli cuka alac kun alologa abino piny i lobo, ame acwayo kede twoke aŋwen.

¹²Kwon leyi luŋ a tyengi aŋwen onwoŋo tye iye, kede twolegu, kede winy a twarre malo.

¹³Dwonnoro te bino baŋe kun kobbe ni, “Petero, ya malo, inek, icam oko.”

¹⁴Ento Petero te gamo ni, “Mom amannono Rwot, pien an gira pe ru acamo ginnoro ame obedo me kwer onyo a mom olony.”

¹⁵Dwonnono dok te bino baŋe tyen me aryo ni, “Gin ame Obaŋa olonyo, kur yin dok ilwoŋ ni gin me kwer.”

¹⁶Ginnono obedo timere kittono tyen adek, eka ote ru tiŋo dwoko oko i polo.

¹⁷Ame tam a Petero pwod ocuŋ ata iyenyo kop me ginanyuta a doŋ eneno, jo ame Komelio ooro onwoŋo tye ocuŋ i doggola, ame gin doŋonwoŋo otyeko penyo ot a Cimon oko.

¹⁸Gin te lwoŋo kun openyo ka ce Cimon ame olwoŋo daŋ ni Petero tye welo me kannono.

¹⁹Ame Petero rik pwod onwoŋo aparo pi ginanyuta, Cuny Obaŋa rik te kobbe ni, “Neno, jo adek tye ayenyi.

²⁰Aco, ya iluŋere iwot kedgi kun mom itamere ata ma, pien an en aorogi.”

²¹Petero te luŋere piny baŋ jo-naca, te kobbigi ni, “An a dano ame imoyo wunu; ibino wunu pi kop aŋo?”

²²Gin te kobbe ni, “Wan oya i baŋ Komelio, ame obedo adwoŋ cirikale, dano a kite atir a lworo Obaŋa, anaka rok me Ojudaya luŋ daŋ pwoe. Amalaika acil doŋ okwenyoro en ni lwoŋi, me iwot i ode, me en winy kop a ya i baŋi.”

²³En te lwoŋogi i ot baŋe, gin te doko wele mere. Odiko en te ya wot kedgi, karacel kede omego mogo ame oya i Yoppa daŋ onywako kedgi yo.

²⁴Orwo mere gin te donyo i Kaicaria. Onwoŋo Komelio akurogi, kun doŋ otyeko lwoŋo wati mere kede dyere mere a ceggi kede.

²⁵Kare ame Petero tye a donyo, Komelio odare, te ryebere piny i ŋet tyene, wore.

²⁶Ento Petero te yiye oko malo kun kobo ni, “Ya malo, an daŋ a dano wadwu.”

²⁷Petero te bedo leyo kop kede kun donyo i ot, te nwoŋo jo apol ocokere karacel.

²⁸En te kobbigi ni, “Wun luŋ iŋeo wunu ni, cik mom ye ni Ajudaya moro myero notte arokkoro, akadi tuno baŋe; ento an Obaŋa doŋ otyeko nyutta ni kur acwan dano moro ni me kwer onyo ni mom olony.

²⁹En omio ka olwoŋa, an abino aboŋo pyem. Doŋ apenyi ni, yin ilwoŋa pino?”

³⁰Komelio te kobo ni, “I nino adek a doŋ okato, i kodi caa-ni i kome, onwoŋo rik atye akwayo Obaŋa i oda i kwac me caa aboŋwen; cite oyotoyot, dano moro te cuŋ i nyima ame rukkere tye alyel alyela.

³¹Te kobba ni, ‘Komelio, kwacci doŋ owinyere kede kony ame i bedo miyo ocan Obaŋa doŋopo pire.

³²Amanni doŋcwajo i Yoppa, me wot cwan Cimon ame olwoŋo daŋ ni Petero; en bedo i ot a Cimon anyoŋ-lao ame ode tye i dog nam.’

³³Eka ate daŋ cwayo kwena baŋi cuto, yin daŋ itimo ber, ibino. Aman wan luŋ en otye kan i nyim Obaŋa me winyo gin ame Rwot ociki iye.”

³⁴Cite Petero te ero kop kun kobo ni, “Doŋ aniaŋ ateteni ni Obaŋa kara mom poko akina a jo.

³⁵Kara bo i rok luŋ, ka dano moro lwore, kun timo gin a tye atira, en gire jolo.

³⁶Wun iŋeo wunu kop a rik en ocwao baŋ jo Icrael, kun rabbigi amut aber me kuc ame bino pi Yecu Kricito, ame en Rwot a jo luŋ.

³⁷Dok daŋ iŋeo wunu gin ame otimere i Judaya luŋ, ame ogeye i Galilaya, i ŋe batija ame Lakana rik orabo pire.

³⁸Iŋeo wunu daŋ kite ame rik Obaŋa oonyo kede Cuny Acil i kom Yecu me Najaret, te miye teko. En daŋ obin omamano piny kun timo gin aber, dok caŋo jo luŋ ame tek a Catan obwoogi, pien Obaŋa rik tye kede.

³⁹Wan ocaden me gin ducu ame rik en obedo tiyo i lobo Judaya kede i Jerucalem. Rik obin oneke kun oŋabe i kom yataria.

⁴⁰Cite Obaŋa te cere oko i nino me adekkere, daŋ te miye nen kannaler;

⁴¹mom baŋ lwak luŋ, ento baŋwa wan jo a rik Obaŋa oyerowa con me bedo caden, wan jo ame rik ocamo dok daŋ omato karacel kede, ame en doŋ ocer oko iyi akina a jo oto.

⁴²Rik en te cikowa ni orab baŋ lwak dok obed cadennere me nyutti jo ni en ebedo ŋat ame Obaŋa oyero me ŋolo kop a jo akwo kede jo oto.

⁴³Mannono daŋ en dano a rik odwarpiny luŋ omio caden i kome kun okobo ni, dano acel acel ame ye en obino weko ballere oko pi nyiŋe.”

⁴⁴Ame Petero pwod tye a kobo kop man. Cuny Acil te poto i kom jo luŋ ame awinyo koppere.

⁴⁵Te miyo Ojudaya ame oye Rwot ame rik obino i Petero owuro, pien Obaŋa oonyo mot me Cuny Acil naka i kom Orok.

⁴⁶Pien gin owinyogi kun odumo leb apapat, opako kede Obaŋa. Petero te kobo ni,

⁴⁷“Ŋattoro tye ame twero cerre oko i pii, me kur batija jo man ame gin daŋ doŋ onwoŋo Cuny Acil bala wan-ni?”

⁴⁸Petero te ciko ni myero batijagi i nyiŋ Yecu Kricito. Gin dok te kwayo Petero ni myero koŋ medde bedo baŋgi pi nino moro.