Read lango Tic Okwena 11 Bible Online

Tic Okwena 11 - lango bible

Tic Okwena 11

¹Okwena kede omego a rik bedo i Judaya nwaŋ daŋ ote winyo ni, Orok daŋ doŋ ojolo kop Obaŋa.

²Ka doŋ Petero owoto i Jerucalem, eryoŋet a cuŋ pi lirre te pyem kede,

³kun okobo ni, “Kara piŋo yin iwoto baŋ jo a mom oliro, ite cem-gu kedgi?”

⁴Eka Petero te korrigi i yore ginnoro ducu ame otimere, ni,

⁵“An onwoŋo rik a tye akwayo Obaŋa i boma me Yoppa, tamma te yutte oko, ate neno ginanyuta me ginnoro ame aya i polo acalli cuka alac kun alologa abino piny, ame acwayo kede twoke aŋwen, te tuno naka baŋa.

⁶Ate ŋiyo me anen yie, ate neno leyi a tyengi aŋwen, kede leyi me tim, kede twole-gu, kede winy a twarre malo.

⁷Cite ate winyo dwonnoro ame kobba ni, ‘Ya malo Petero, inek, icam oko.’

⁸Ento an gira ate gamo ni, ‘Mom amannono Rwot, pien an gira pe ru acamo ginnoro ame obedo me kwer onyo a mom olony.’

⁹Rwot te dokka iye tyen me aryo kun oya i polo ni, ‘Gin ame Obaŋa doŋ olonyo, kur yin dok ilwoŋ ni gin me kwer.’

¹⁰Ginnono te bedo timere kittono tyen adek, eka ote wayogi ducu dwoko i polo.

¹¹Cucuttono jo adek te tuno baŋwa i ot a nwaŋ wan otye iye, kun oorogi baŋa, oya i Kaicaria.

¹²Cuny Acil te kobo ni awot kedgi, kun mom dok atamere atama. Cite omego abicel-li te wot keda, ote daŋ wot donyo i ot a lonnaca.

¹³En te kobbiwa kite a rik en eneno kede amalaika ame ocuŋ i ode kun kobbe ni, ‘Cwa jo i Yoppa me kel Cimon ame daŋ olwoŋo ni Petero.

¹⁴En bino kobbi kop ame bino lari, yin anaka kede odi luŋ.’

¹⁵Ame rik pwod acako kop acaka, Cuny Acil rik te bino poto oko i komgi, kite ame rik opoto kede i komwa i ageyi.

¹⁶Cite wia te poyo kop a Rwot a rik okobo ni, ‘Lakana rik batija jo kede pii, ento wun obino batijawu kede Cuny Acil.’

¹⁷Kara ka Obaŋa omiogi daŋ kit mot acel ame rik koŋ omiowa i kare a wan doŋoye Rwotwa Yecu Kricito, kara an rik adoko ŋa ame atwero geŋo Obaŋa?”

¹⁸Kare ame gin doŋowinyo kop-pi, gin te liŋ doŋ aliŋa. Ote doŋ lunyo pako ka Obaŋa kun okobo ni, “Obaŋa kara doŋoyeyi Orok ŋut ame twero miyogi daŋ odonyo i kwo.”

¹⁹Jo a rik oket pi awunawuna ame rik bin erre i kom Citefano rik obin owoto te tuno anaka i Poinike kede Kupuro kede i Antiokia, kun orabo kop Obaŋa baŋ Ojudaya keken.

²⁰Ento mogo i akinagi rik jo Kupuro kede jo Kurene; gin daŋ ka rik otuno i Antiokia, okobo baŋ jo me Grik, kun orabbigi amut aber i kom Rwot Yecu.

²¹Teko a Rwot obedo tic kedgi, lwak jo ecipan rik te lokere baŋ Rwot obedo tic kedgi, lwak jo ecipan rik te lokere baŋ Rwot ote doko jo oye en.

²²Amut me koppono te rwo winyere baŋ lwak jo oye Kricito ame tye i Jerucalem, eka gin te cwayo Baranaba i Antiokia.

²³Ka en otuno, oneno tic me kica Obaŋa, olelo, te cuko cunygi luŋ ni, “Miu cunywu doŋ mok atek i kom Rwot.”

²⁴Rik en dano aber ame Cuny Acil kede iyee Opoŋ i yie. Lwak jo apol nwaŋ te medde bino baŋ Rwot.

²⁵Baranaba te wot Taruco yenyo Caulo.

²⁶Ka en onwoŋe, okele i Antiokia. Gin rik te bedo kunu mwaka acel alutu, kun obedo i lwak jo oye Kricito dok daŋ opwonyo lwak jo ecipan. Antiokia en kan ame ogeo lwoŋo iye jo a lubo Yecu ni, Okricitayo.

²⁷I kare-nono odwarpinnyogo oya i Jerucalem, obino i Antiokia.

²⁸Moro acel i akinagi a nyiŋe Agabo rik te ya malo, Cuny Acil te miye tuco ni, waŋŋoro kec adwoŋ bino poto i wi podo luŋ; man otimere i kare a Kulaudio.

²⁹Man omio olub Yecu te moko ni myero cwal kony baŋ omego mogo a bedo i Judaya, kun ŋat acel acel kwanyo mege i kom limmere acalo etwero.

³⁰Gin daŋ ote timo amannono, ote cwayo Baranaba kede Caulo tero baŋ odoŋe.