Read lango Tic Okwena 12 Bible Online

Tic Okwena 12 - lango bible

Tic Okwena 12

¹I kare-nono abaka Kerode te ero timo jo mogo ame oye Kricito cucu.

²Oneko Yakobo omin a Lakana i pala bat.

³Ka en oneno ni kodi timmono oyomoro yi Ojudaya, en te medde kede, te mako Petero daŋ oko. Man onwoŋo rik kare me Ogati a Tobi Mom iye.

⁴Ka doŋomako Petero, okete buc, kun omie baŋ dul cirikale aŋwen, ame tye iye jo aŋwen aŋwen, me gwoke. Kerode onwoŋo mito ni bin kele baŋ lwak ka kare me Kato doŋ otum.

⁵Eka rik doŋ ote keto Petero i buc, ento lwak jo oye Kricito rik te keto cunygi atek kwayo Obaŋa pire.

⁶I dyewor me nino ame Kerode mito kela Petero i nyim lwak, en rik onwoŋo obuto i akina cirikale aryo, a kun otwee kede jegere aryo, okur ame ocuŋ i doggola onwoŋo tye agwoko dog ot buc.

⁷Oyotoyot amalaika a Rwot te nen, acara moro te menyo icika. Amalaika-nono te bapo laŋet Petero, te coye kun kobbe ni, “Ya malo oyot.” Jegere te poto oko i ciŋe.

⁸Amalaika dok te kobbe ni, “Tweye, rwak daŋ amukki oko.” Petero daŋ te timo amannono, amalaika dok te kobbe ni, “Aco bol boŋoni i komi, iluba.”

⁹Petero te donyo oko, lube. En onwoŋo mom gire aŋeyo ni gin ame amalaika atimonaca tye ateni, ento en onwoŋo atamo ni eneno ginanyuta moro.

¹⁰Gin te kato okur me agege kede me aryo mere, eka ote tuno i doggola nyonyo ame pello i dye boma. Mannono te yabere gire kene, gin ote kato, lubo yo acel keken. Amalaika te doŋ weke oko.

¹¹Ka Petero doŋ oniaŋ pire kene, okobo ni, “Aman doŋ aniaŋ ateni ni Rwot kara ocwao amalaika mere, olara oko i ciŋ Kerode, kede i kom ginnoro ducu ame yam Ojudaya tye akuro.”

¹²Ame en doŋ oniaŋ kop man oko, te wot i ot a Maliam tota a Lakana ame nyiŋe ocele Marako, kannono en onwoŋo jo apol ocokere iye, okwayo Obaŋa.

¹³Kare ame en ogoo doggola atidi me dogcel, aŋeca moro a nyiŋe Roda te bino me winyo.

¹⁴En te niaŋ ni dwon Petero ennono, yomcuny te mone yabo dogcel oko, te dok lunyo riŋo dok i ot, te kobbigi ni, “Petero be tye ocuŋ i dogcel.”

¹⁵Gin te kobbi nyannono ni, “Yin ipo do, agin.” Ento en te cerre gire atekateka ni en gire ennono. Gin doŋ te kobo ni, “Aŋar ca ŋit amalaika mere eno be!”

¹⁶Ento Petero te bedo medde goyo doggola. Ka doŋgin oyabo doggola, ote neno ni en gire ennono, gin te wuro miecel.

¹⁷Petero te diyogi kede ciŋe ni koŋ oliŋ, en te tittegi kite ame Rwot okwanye kede i buc. Te kobbigi ni, “Tit wunu kop man baŋ Yakobo kede omego.” En te ya wot oko i kabedo ocele.

¹⁸Ame doŋ piny oru, arubaruba rik te bedo adwoŋ i akina ocirikale pi gin ame otimere i kom Petero.

¹⁹Ka Kerode oyenye mom te nwoŋe, openyo okur, te ciko ni myero wot nekgi oko. En Kerode te ya oko i Judaya, te wot bedo i Kaicaria.

²⁰Akemo onwoŋo rik omako Kerode i kom jo me Turo kede Cidon. Gin ducu rik ote cokere bino baŋe i tam acel. A doŋ gin obibito Bulacito agwok ot buto abaka, ote doŋ penyo pi kuc, pien lobogi rik onwoŋo kwo i cam a ya i lobo abaka.

²¹Eka i nino moro acel ame rik onwoŋo omoko oko. Kerode te rukere i ruk me loccere, te bedo i wi kom me dittere, te kop baŋgi.

²²Lwak te wo ni, “Man gire dwon obaŋa, mom mea dano!”

²³Eka cucuttono, amalaika a Rwot te goye, kudi te came, te to oko; pien en mom omio Obaŋa kwogo.

²⁴Cite kop Obaŋa te nya medde ameda.

²⁵Baranaba gin kede Caulo te dwogo kun oya i Jerucalem, ame daŋ doŋ ocobo ticgi a rik ocwaogi iye oko. Lakana ame nyiŋe ocele Marako daŋ obino kedgi.