Read lango Tic Okwena 13 Bible Online

Tic Okwena 13 - lango bible

Tic Okwena 13

¹I kom lwak jo oye Kricito me Antiokia rik tye iye odwarpiny kede opwony: Baranaba kede Cimoen ame olwoŋo Niga, Lukio me Kurene, Manaen ame rik odono i ot acel gin kede Kerode aloc, kede Caulo.

²Ame onwoŋo rik gin tye aworo Obaŋa kede kanyo kec, Cuny Acil rik te kobo ni, “Pokka wunu Baranaba gin kede Caulo pi tic a ceŋ doŋ alwoŋogi iye.”

³Icennere a doŋ okanyo kec kede kwayo Obaŋa, gin te keto ciŋ i wigi, eka ote cikogi wot.

⁴Amannono Cuny Acil te cwayogi, gin ote wot i Celeukia, eka i kannoro gin te kwaŋo nam ote dokoro i Kupuro.

⁵Ka gin obino i Calamic, gin orabo kop Obaŋa i kacokere luŋ, kun Lakana tye kedgi acalo akonygi.

⁶Eka gin te wowota iyi cula-nu luŋ, ote tuno naka i Papo; kuno gin te cop i kom emuroko moro ame adwarpiny agoba, en rik Ajudaya ame nyiŋe Bar-Yecu.

⁷En rik obedo baŋ Cerugio Paulo, aloccoro ame wie tio. Aloc rik te lwoŋo Baranaba gin kede Caulo, pien onwoŋo mito winyo kop Obaŋa.

⁸Ento Elima ame emuroko ca (pien mano en te kop me nyiŋe) opyem kedgi, kun mito dwanyo wi aloc oko i kom iyee.

⁹Cuny Acil rik te poŋ i yi Caulo ame olwoŋo daŋ ni Paulo, eka te nene atek,

¹⁰te kobbe ni, “Yin wot a Catan, ame yii Opoŋ i goba kede kite areco luŋ, yin akwor a kwone tim luŋ atira. Yin mom ibino weko dwanyo yo a Rwot ame atir?

¹¹Winy ba, amanni ciŋ Rwot doŋ tye oko i komi, ibino bedo atowaŋ kun mom ineno ceŋ pi kare moro alalac.” Cucuttono waŋe te titiba, piny te dokke acol oko, owoto ame acacato piny kun temo yenyo jo moro a myero pee kede ciŋ.

¹²Ka aloc oneno gin otimere, oye Yecu. En te wuro meicel pwony i kom Rwot.

¹³Paulo gin kede owote mere rik ote kwaŋ kun oya i Papo, ote tuno i Perga a tye i Pampulia. Lakana owekogi te dok gire i Jerucalem.

¹⁴Cite gin te kato kun oya i Perga, ote tuno naka i Antiokia me Picidia. Gin rik te donyo i kacokere i cen cabit.

¹⁵Ame doŋ otyeko kwano kop i cik a Muca kede bu ke odwarpiny, odoŋe me kacokere te cwayo kwena baŋgi kun kobo ni, “Omegowa, ka itye wunu i kopporo me cuko cuny lwak, kob wunu.”

¹⁶Paulo te ya malo, te diyogi i ciŋe kun kobo ni, “Wun jo Icrael, naka wun jo ame lworo Obaŋa, winy wunu.

¹⁷Obaŋa a jo man Icrael rik oyero kwariwa, te miyogi bedo jo moro adoŋo meicel i kare a gin obedo i lobo Miciri. En te bino kwanyogi oko kede teko me ciŋe ame oryeo malo.

¹⁸En rik te diyo cunye i gwokogi i tim pi mwakki pyeraŋwen.

¹⁹Kare ame en doŋ otyeko rok apapat abiro i lobo me Kanaan, en rik te miyo lobo-naca baŋ jo Icrael me leyo doko megi pi mwakki mia aŋwen kede pyerabic.

²⁰Icennere te miyogi oŋolkop ituno kede i kare adwarpiny Camwiri.

²¹Gin dok te kwayo pi abaka; Obaŋa te miyogi Caulo wot a Kic, dano me atekere a Benjamin, ame te loyogi pi mwakki pyeraŋwen.

²²Ame Obaŋa okwanye oko, rik dok te miyogi Daudi me bedo abakagi. En dano ame Obaŋa rik omio caden i kome kun kobo ni, ‘Doŋ anwoŋo ni Daudi wot a Yecu en dano ame cunya maro, en bino cobo ginnoro luŋ ame an amito.’

²³I kom ikwae a Daudi-nono, Obaŋa doŋ okelli jo Icrael Alar, ame en Yecu, acalo rik en gire ociko.

²⁴Ame en mom ru obino, Lakana onwoŋo koŋ orabo kop baŋ jo Icrael luŋ ni gin oŋut me batijagi.

²⁵A doŋ Lakana ceggi cobo ticcere, okobo ni, ‘Kara wun itamo wunu ni an ŋa? An gira mom a dano-nono. Pe gire, ento ŋattoro tye ame abino i ŋea ame an mom aromo gonyo amuk i tyene.’

²⁶“Omegona, ikwae Iburaim kede wun jo ocele ame ilworo wunu Obaŋa, kop man me larre ocwalliwa wunu.

²⁷Pien jo a bedo i Jerucalem kede odoŋegi, rik mom oŋee, dok daŋ mom oniaŋ kop odwarpiny ame rik obedo kwannigi cabit i cabit. Gin gigi te miyo kop odwarpiny cobere kakare pi ŋolo kop loye.

²⁸Kadi bed gin rik mom onwoŋo kopporo i kome a romo miyo oŋolle to, gin okwao Pilato ni myero mi nek oko.

²⁹A doŋ gin ocobo ginnoro ducu a rik ocoo i kome, gin te kwanye oko i kom yataria, pyele i lyel.

³⁰Ento Obaŋa gire obin ocere oko iyi akina a jo oto.

³¹En rik te bedo nen pi nino apol baŋ jo a nwaŋ obino kede i Galilaya kun owoto i Jerucalem; amanni jo-nono doŋ cadennere baŋ jo.

³²Wan doŋ okelliwu amut aber ni mano, gin ame rik Obaŋa ociko baŋ kwariwa,

³³en doŋ ocobo oko kakare baŋwa wan ikwaegi, i cero Yecu, acalo rik ocoo i abuli me aryo ni, ‘Yin i Woda; tin doŋ anywali.’

³⁴En rik ocere iyi akina a jo oto, mom dok bino top gire, daŋ rik en okobo kit man: ‘Abino miyowu gin acil, ame genne, a rik aciko pi Daudi.’

³⁵En omio rik okobo i jabuli moro ocele ni, ‘Mom ibino weko kom Dano meri Acil top.’

³⁶Pien ka Daudi doŋotyeko lubo tam Obaŋa i kare mere, rik en obin oto oko, ote yike karacel kede kwari mere, en daŋ te top oko.

³⁷Cite ŋat ame Obaŋa ocero rik mom obin otop.

³⁸Pi mannono omegona, myero iŋe wunu ni otye ka rabbiwu kop i kom weko bal pi dano man.

³⁹Pire, jo luŋ ame oye doŋ okwanogi ni kitegi atira, kun okwanyo i komgi bal ducu ame mom otwero kwanyo i komgi pi cik a Muca.

⁴⁰Gwokere wunu doŋ ba, me kop a nwaŋ odwarpiny okobo kur tun i komwu, ni,

⁴¹‘Nenu ba, wun jo ame ocae! Wur wunu, ite rwenyo wunu odoco; pien atye ka tiyo ticcoro i karewu, tic ame mom ibino wunu ye, kadi ŋattoro tittiwu pire.’ ”

⁴²Kare ame gin doŋ okato oko, lwak te kwayo ni kop man myero dok tittigi i cabit a bino ca.

⁴³A doŋ cokere oket oko, Ojudaya apol kede jo olokere i dini Ojudaya ame woro Obaŋa rik te lubo Paulo gin kede Baranaba; gin rik te bedo kop kedgi kun oeukuro cunygi me medde bedo i kica Obaŋa.

⁴⁴Eka i ceŋ me aryo mere, jo me boma luŋ obuco cokere karacel pi winyo kop Obaŋa.

⁴⁵Cite Ojudaya ka oneno lwak apol, nyeko te makogi atek, ote pyem i Paulo kun oyete ayeta.

⁴⁶Paulo kede Baranaba te kop i tekcuny ni, “Onwoŋo myero yam koŋ oge rabbiwu kop Obaŋa. Ento kit ame wun giwu ibolo wunu oko teŋe, kun mom itamo wunu ni iromo wunu nwoŋo kwo a perakino nakanaka, wan doŋ olokere giwa baŋ Orok.

⁴⁷Pien Rwot ocikowa ni: ‘An doŋ aketi me bedo cen baŋ Orok, me imi yo me larre otun i agikki wi podo luŋ.’ ”

⁴⁸Ka Orok owinyo, oyomoro yigi atek, ote keto kwogo i kop Obaŋa. Jo luŋ a nwaŋ oyero pi kwo a perakino nakanaka te doko jo oye Yecu.

⁴⁹Kop a Rwot rik te lal i lobo-nono luŋ.

⁵⁰Ojudaya rik te cupo monnogo a ŋeye, a woro Obaŋa, kede odoŋe me boma-nono; gin rik te tugo jo me wuno Paulo gin kede Baranaba, eka ote ryemogi oko i bomagi.

⁵¹Paulo-gi te teŋo apua me tyengi i komgi, ote wot gigi i Ikonio.

⁵²Olub Yecu rik te lelo, Cuny Acil te poŋ i yigi.