Read lango Tic Okwena 14 Bible Online

Tic Okwena 14 - lango bible

Tic Okwena 14

¹I boma me Ikonio daŋ dok te timere i kite acellono. Paulo kede Baranaba owoto i kacokere Ojudaya, ote kop iye i yore ame te miyo lwak jo ecipan, Ojudaya kede jo Grik, te ye Yecu.

²Cite Ojudaya a mom oye rik te tugo Orok kun oketo tam areco i cunygi i kom omego.

³Rik gin te ri kuno pi kare alac, kun orabo kop i kom Rwot i tekcuny, Rwot daŋ te bedo caden me kop i kom kica mere, kun miogi teko me tiyo anyuttogo kede taŋo.

⁴Jo me bomanono te pokere oko; mogo odok baŋ Ojudaya, eka mogo te dok baŋ okwena.

⁵Orok kede Ojudaya karacel kede olocgi rik te mito timogi arac kun omito napogi i gweŋ,

⁶ento okwena ka oŋeo, te riŋo gigi oko i Licitra kede Derube, ame gin boma me Likaonia, kede i lobo omano kannono.

⁷Gin daŋ te rabo amut aber kuno.

⁸I Licitra rik onwoŋo tye iye lo moro ame bedo abeda, kun mom twero wot i tyene; en onwoŋo oŋwalo con i yi tottere, daŋ onwoŋo mom ru owoto kadi acelloro.

⁹En onwoŋo rik tye awinyo kop ame Paulo tye arabo. Paulo te nene atek ateka; ka oneno ni en tye kede iyee me caŋ,

¹⁰okobbe i dwon aloŋo ni, “Ya icuŋ atira kede tyeni.” En oputte malo iwic, te cako wot oko.

¹¹Lwak ka oneno gin ame Paulo otio, gin owo i dwon aloŋo kun okobo i leb jo Likaonia ni, “Obaŋa mogo doŋ ociro piny baŋwa, kun ocalli jo!”

¹²Baranaba gin te lwoŋo ni, Jeuc, eka Paulo gin te lwoŋo ni, Kermec, pien Paulo en a rik onwoŋo obedo kop.

¹³Alamdog a Jeuc, ame ot jokkere onwoŋo tye i nyim boma-nono, te kelo twoni i dogcel ame odolo tigo ature i ŋutgi, kun en karacel kede lwak onwoŋo amito ŋologi me yalo Caulo-gi.

¹⁴Cite ka okwena Baranaba kede Paulo owinyo pire, gin oyeyeco boŋŋigi, ote mwomere i dye lwak kun okobo ni,

¹⁵“Jo-ni, kara Ŋo omio itimo wunu kittono? Wan, daŋ obedo dano adana, ame rom aroma kedwu. Wan orabbiwu amut aber me iya wunu oko i gigi mogo a tere mom, ilokere wunu baŋ Obaŋa akwo a rik otio polo kede lobo kede nam kede jami luŋ a tye iye.

¹⁶Rik i kare acon en oweko rok luŋ owoto gigi i yogi ata;

¹⁷kadi amanno, en rik mom oweko dano aboŋo cadennoro a nyute baŋwu. Pien en rik obedo tiyo gin aber, omiowu kot ame oya i polo, kede kare me ceko cam, daŋ omio iyen wunu i cem kede yiwu daŋ opoŋo kede lelo.”

¹⁸Kadi gin okobo kop man, mom obedo yottigi me geŋo lwak ŋolo twoni me yalogi.

¹⁹Ento Ojudaya mogo te bino ame oya i Antiokia kede i Ikonio; gin ocupo lwak te napo Paulo kede gweŋ, ote waye tere i ne boma kun otamo ni en doŋ oto oko.

²⁰Ento jo a lubo Yecu te cokere guro Paulo dyere, en te ya malo, te dok gire i boma. Orwo mere Paulo te wot gin i Baranaba i Derube.

²¹Eka gin te rabo amut aber i boma-nono, te miyo jo apol lokere doko jo a lubo Yecu; gin gigi doŋ te dok oko i Licitra, lkonio kede Antiokia.

²²Gin odio cuny jo a lubo Yecu, kun ocukoro cunygi me medde bedo iyi iyee man, kun okobbigi ni, “Myero ocor wunu can apol pi donyo i loc Obaŋa.”

²³Ame gin doŋ otyeko yero odoŋe pi lwak jo oye Yecu i kabedo acel acel, gin te miyo jo-nono i ciŋ Rwot Yecu ame gin geno, kun koŋ ogeo kwayo Obaŋa kede kanyo kec.

²⁴Gin obeo i Picidia, ote bino i Pampulia.

²⁵A doŋ gin otyeko rabo kop i Perga, owoto i Attalia.

²⁶Gin te kwaŋo nam i kannono, ote tuno i Antiokia, kan ame rik okwayigi iye winyo Obaŋa pi tic ame rik gin doŋ otyeko cobo.

²⁷Kare ame gin doŋ otuno, gin te coko lwak jo oye Kricito karacel, ote tittigi ginnoro luŋ ame Obaŋa otio karacel kedgi, dok ni en doŋ oyabbi Orok doggola me iyee.

²⁸Gin rik te bedo i jo a lubo Yecu pi kare alalac.