Read lango Tic Okwena 15 Bible Online

Tic Okwena 15 - lango bible

Tic Okwena 15

¹Jo mogo rik te wot i Antiokia kun oya i Judaya, ote cako pwonyo omego ni, “Ka mom olirowu pi cobo cik a Muca, mom itwero wunu larre.”

²Pwony man rik te miyo tam pokere oko, Paulo kede, Baranaba te pyem i jo-nono atek, omio ote yiko ni Paulo kede Baranaba karacel kede jo mogo i akinagi myero wot i Jerucalem baŋ okwena kede odoŋe, me niaŋ kop i kom pyem man.

³Lwak jo oye Kricito rik te lwokogi i wotgi-nono, gin rik ote beo i Poinike kede i Camaria kun otitti jo kit ame Orok olokere kede me lubo Yecu; omio omego luŋ olelo meicel.

⁴Ame gin doŋ otuno i Jerucalem lwak jo oye Kricito, kede okwena, kede odoŋe te jologi aber, gin daŋ ote tittigi gin ducu ame Obaŋa omiogi otio.

⁵Cite jo mogo oye Yecu, ame onwoŋo me dul Oparicayo, te ya malo, kobo ni, “Orok gire myero lir, dok daŋ cikgi me gwoko cik a Muca.”

⁶Okwena kede odoŋe te cokere karacel me laro kop man.

⁷A doŋ gin olaro pi kare alac, Petero te ya malo, te kobbigi ni, “Omegona, wun iŋeo wunu ni i kare acon Obaŋa rik obin oyera i akinawu, me ami Orok winy amut aber, ote ye.

⁸Dok daŋ Obaŋa ame ŋeo cuny jo obedo cadengi kun miogi Cuny Acil a rom i en a rik omiowa.

⁹En gire mom oketo apokapoka moro i akinawa kede gin, ento olonyo cunygi daŋ pi iyee.

¹⁰Kara piŋo wun itemo wunu Obaŋa kun iyimo wunu lodi apek i ŋut jo a lubo Yecu, ame kadi kwariwa onyo wan mom oromo yeyo?

¹¹Wan giwa doŋ kwariwa onyo wan mom oromo yeyo? Wan giwa doŋ oye ni wan karacel kede gin, wan ducu obino larre pi kica a Rwot Yecu.”

¹²Jo luŋ i cokere te koŋ liŋ mot; ote winyo kop a Baranaba kede Paulo kun oporo pi anyuttogo kede taŋo ame Obaŋa omiogi teko me tiyo i akina Orok.

¹³Ame gin doŋ otyeko kop, Yakobo te gamo ni, “Omegona, koŋ iwinya wunu.

¹⁴Cimeon doŋ otyeko tittiwa kite ame Obaŋa ogeo limo kede Orok kun kwanyo lwak jo iyi akinagi me bed jo mere.

¹⁵Man gire orwatte arwata kede kop odwarpiny a rik ocoo ni,

¹⁶‘Icennere ka man otum abino dwogo, abino dok gero kabedo a Daudi a rik orette oko; abino dok gero i wi oburrere, abino dok tiŋo malo,

¹⁷me jo odoŋ mo Rwot, kede rok ducu ame odoko jo mere,

¹⁸Man kop a Rwot, ame omio kop magi oŋeye geye i kare acon.’

¹⁹En omio an aŋolo ni pe myero wan ocanu Orok ame lokere baŋ Obaŋa,

²⁰ento myero wan ocoyigi waraga, otittigi kur ocam ginnoro me kwer ame otyeko yalli cal jogi, owek daŋ timmogo me coco, kede camo ginnoro ame odeo adea, dok daŋ kur ocam remo.

²¹Pien cakere i kare acon Muca daŋ rik tye kede jo a rabo pire i boma luŋ; bukkere pwod okwano cabit i cabit i kacokere.”

²²Eka okwena kede odoŋe, karacel kede lwak jo oye Kricito luŋ, rik te moko ni myero yer jo mogo iyi akinagi, cwagi Antiokia karacel i Paulo kede Baranaba. Gin te yero Juda ame olwoŋo ni Barcaba gin kede Cira, ame onwoŋo gin rik jo adoŋo i akina omego,

²³ote miyo jo-nono waraga ame ocoo aman: “Baŋ omegowa ame obedo Orok a tye i Antiokia, Curia kede Kilikia, Wan okwena kede odoŋe ame wan omegowu, omotowu.

²⁴Doŋ otyeko winyo ni tye jo mogo ame oya i baŋwa kan, ame tye ka poto cunywu i koppogo a rubo tamwu, aco kun wan mom ocikogi kadi acelloro.

²⁵Mano omio wan omoko i cuny acel me yero jo cwayo baŋwu kun obino karacel i dyerewa Baranaba kede Paulo,

²⁶ame gin jo a doŋ otyeko jalo kwogi pi nyiŋ Rwotwa Yecu Kricito.

²⁷En omio daŋ ocwao Juda gin i Cira; gin ikomgi bino porriwu kite kop acellono i dog.

²⁸Pien Cuny Acil kede wan doŋ omoko ni myero mom yim yeccoro apek i komwu, kono ka kop magi a pirgi tek:

²⁹kwer wunu ginnoro ducu ame oyalli cal jogi, kede remo, kede gin ame odeo adea, wek wunu daŋ timmogo me coco. Maginono en ame ka igwokere wunu iye, nwoŋo itimo wunu ber. Doŋ ibedu giwu.”

³⁰Kare ame doŋ ocikogi oko, gin te wot i Antiokia, ote coko lwak karacel, ote miyogi waraga.

³¹Ka gin okwano, gin olelo pi cuko cunygi.

³²Eka Juda kede Cira, ame onwoŋo rik gin odwarpiny, te daŋ cuko cuny omego kede kop apol, ame meddigi teko.

³³Gin rik te koŋ bedo kuno pi kare anonokkoro, eka omego te cikogi kede kuc i dokgi baŋ jo a nwaŋ ocwaogi. [

³⁴Ento Cira te tamo ni kono gire en edoŋ kuno.]

³⁵Paulo kede Baranaba te doŋ i Antiokia. Gin te bedo pwony kede rabo kop a Rwot kuno karacel kede jo ocele apol.

³⁶Ame kare doŋ okato alalac, Paulo te kobbi Baranaba ni, “Odok koŋ cen i boma ducu ame rik wan orabo iye kop a Rwot, me owot olim omegowa, onen kit ame gin tye kede.”

³⁷Baranaba rik te tamo ni kono otero Lakana ame olwoŋo daŋ ni Marako owoto kedgi.

³⁸Ento Paulo te tamo ni mom ber me tero dano a yam koŋ olwi owekogi oko i Pampulia, kun mom owoto kedgi i tic.

³⁹Kop-pi te miyogi pyem atek ateka, te miyo ŋat acel acel pokere oko awottere. Baranaba te tero Marako, kwaŋ wot kede naka i Kupuru;

⁴⁰Paulo te yero mere Cira, te wot kede, kun omego koŋ okwayigi winyo a Rwot.

⁴¹En te beo i Curia kede i Kilikia kun omio teko baŋ lwak oye Kricito luŋ.