Read lango Tic Okwena 16 Bible Online

Tic Okwena 16 - lango bible

Tic Okwena 16

¹Paulo te wot tuno i Derube kede i Licitra. Kuno onwoŋo tye iye alub Yecu moro a nyiŋe Temoteo, wot a dako moro ame Ajudaya oye Rwot, ento pappere rik gire dano me Grik.

²Omego me Licitra kede Ikonio rik pwoo lonnono.

³Paulo rik te mito ni en wot kede; eka te tere wot lire, pien Ojudaya a rik tye i kabedo-nono, rik gin luŋ ŋeo ni pappere obedo dano me Grik.

⁴Kare ame gin tye abe bea i boma apapat, gin omio baŋ jo cik me agwoka ame rik okwena kede odoŋe oyiko i Jerucalem.

⁵Mano omio lwak jo oye Kricito me kabedo apapat medde atek i iyeegi, kun daŋ wel jo medde didik.

⁶Gin rik te bel i lobo me Purugia kede Galatia, pien Cuny Acil onwoŋo ogenogi oko ni kur orab kop Obaŋa i Acia.

⁷A doŋ gin otuno i waŋ apokki me Mucia, ote tamo ni kono owoto i Bitunia, cite Cuny a Yecu mom te yegi beo.

⁸Gin doŋ te beo i dye Mucia, wot piny i Teroa.

⁹Ginanyuta te nen baŋ Paulo dyewor, kun lonnoro me Makedonia abako doge, alwoŋe ni, “Kwaŋ nam idokoro i Makedonia, ikonywa.”

¹⁰Ka en doŋ oneno gin ame onyutte, wan doŋ ote yenyo yo oyotoyot me wot i Makedonia, pien onwoŋo doŋ oniaŋ aber ni Obaŋa doŋ olwoŋowa me wot rabo amut aber baŋgi.

¹¹En omio wan ote kwaŋ oko kun oya i Teroa, ote kwaŋ atira naka i Camoturake, orwo mere ote tuno Neapoli.

¹²Oya i kuno ote wot i Pilipi, ame en boma me agege me lobo Makedonia, dok daŋ en kan ame jo Roma bedo iye kun olubo cik me Roma. Obedo i boma-nono pi kare alalac.

¹³I cen me cabit ote donyo oko i dogcel wot i dog kulo, kan ame onwoŋo otamo ni tye iye kabedo me kwayo Obaŋa. Eka ote bedo piny kuno, ote kop i monnogo ame onwoŋo ocokere karacel.

¹⁴Dako ame olwoŋo ni Ludia, ame onwoŋo oya i paco me Tuatira, en ame obedo winyo kopwa. Dako-nono onwoŋo acat boŋŋi obedo amaramar, daŋ rik en awor Obaŋa. Rwot oyabo cunye, en te bedo keto cunye i kom gin a Paulo akobo.

¹⁵Ka en otyeko batija karacel kede jo i ode, obako doge baŋwa kun kobo ni, “Ka ityeko moko wunu ni an aye Rwot ateteni, biye ibed wunu i oda.” En odiowa atek, te miyowa wot kede.

¹⁶Ame gin rik otye owot i ka kwayo Obaŋa, gin te rwatte kede nyannoro ame onwoŋo opii, ame jokkere rik tucce kop. Nyannono onwoŋo kelli odoŋe mere lim abup pi tyettere.

¹⁷En olubowa wan i Paulo kun redo ni, “Jo man obedo omiro Obaŋa Amalo Meicel. Gin arabbiwu yo me larre.”

¹⁸Nyan-nu obedo timere amanno pi nino apol, omio Paulo oŋo, te lokere kobbijok ni, “Aciki i nyiŋ Yecu Kricito, ya oko i kome.” Daŋ te ya oko i caanono cuto.

¹⁹Odoŋe mere ka oneno ni gengi me nwoŋo Iim otum oko, gin te mako Paulo kede Cira, ote wayogi terogi i cuk baŋ oloc.

²⁰A doŋ gin okelogi i nyim oŋolkop, ote piddigi ni, “Jo-ni tye ka rurubo boma wa-ni; aco kono gin Ojudaya.

²¹Gin okelo kitgi mogo ame cik mom ye ni wan omak onyo oti kede, pien wan giwa ojo Roma.”

²²Lwak te twarre malo, oŋolkop te yeyeco boŋŋigi oko, ote ciko ni myero pwod jo-nono kede abiro.

²³A doŋ otyeko pwodo dudgi atek, ote ketogi i buc, ote daŋ ciko agwok obuc ni gwokgi aber.

²⁴Agwok obuc te cwalogi i ot buc tyelo, te goyo kol i tyengi oko.

²⁵I dye idiŋ Paulo kede Cira onwoŋo tye akwayo Obaŋa kun daŋ owero wer me pako Obaŋa, ame obuc daŋ awinyo.

²⁶Twon oyeŋo moro te yeyeŋo piny atek meicel cucuttono, te ot buc daŋ oyenere; doggola luŋ me ot buc te yabere oko, nyony otweo obuc daŋ te gony oko.

²⁷Ka agwok obuc oco, oneno doggola me buc luŋ tye twolo; en te woto pala battere me nekere kene, pien onwoŋo otamo ni obuc doŋ olwi oko.

²⁸Ento Paulo te redo kede dwon aloŋo ni, “Kur iwanne keni, pien wan luŋ otye giwa kan.”

²⁹Agwok obuc te lwoŋo mac, omwomere i ot, te wot ryebere piny i nyim Paulo gin i Cira kun kome tye amyel amyela pi lworo.

³⁰En te kelogi oko, penyogi ni, “Odoŋena, kara atim ŋo me alarre?”

³¹Paulogi te kobbe ni, “Ye Rwot Yecu, ibino larre, yin karacel kede jo i odi luŋ.”

³²Eka ote rabbe kop i kom Rwot, en kede jo ame bedo i ode luŋ.

³³En rik te tero jo-nono i caa-naca cuto i dyeworraca, te wot mado waŋ kan owawano i komgi. Eka en karacel kede jo me ode ducu ote batija oko cuto.

³⁴Icennere en te terogi i ode, te miyogi cem, kun olelo gin kede jo i ode luŋ, pien en doŋoye Obaŋa.

³⁵A doŋ piny oru, oŋolkop te cwayo cirikale kun okobo ni, “Gony doŋjo-nono oko.”

³⁶Agwok obuc te tero koppono baŋ Paulo kun kobo ni, “Oŋolkop ocwao kop ni gonywu oko. Doŋ pi manno, donnyo wunu oko me iwot giwu i kuc.”

³⁷Cite Paulo te kobbigi ni, “Wan opwodowa i nyim lwak kannaler aboŋo ŋolliwa kop a kungu wan Oroma! Gin ocwaowa-gu i buc. Aman doŋgin omito cwayowa oko i muŋ? Mom gire Myero gin ikomgi obin ogonywa.”

³⁸Cirikale te dwoko koppono baŋ oŋolkop. Gin ka owinyo ni jo-nono kara onwoŋo obedo jo Roma, lworo omakogi atek.

³⁹Gin te bino bako doggi baŋgi; i kare ame doŋogonyogi odonyo oko, ote kwayogi me ya oko i bomanono.

⁴⁰Gin doŋ te ya wot tuŋ a Ludia; gin ka otyeko neno omego, kun ocuko daŋ cunygi, ote wot gigi oko.