Read lango Tic Okwena 17 Bible Online

Tic Okwena 17 - lango bible

Tic Okwena 17

¹Gin obeo Ampipoli kede Apolonia, ote tuno naka i Tecalonika, en kan ame onwoŋo kacokere Ojudaya tye iye.

²Acalo kit a Paulo me kare luŋ, en owoto te donyo i kacokere, te laro kedgi kop oya i coc a yam ocoo pi cabit adek,

³kun en gonyo tere me nyuto ni Kricito myero to te cer oko i akina a jo oto, dok te kobo ni, “Yecu ame an arabbiwu kop i kome-nono, en Kricito.”

⁴Jo mogo i akinagi te ye koppere, ote ribere i kom Paulo kede Cira, kede jo apol daŋ i akina jo Grik a woro Obaŋa, anaka mon adoŋo apopol.

⁵Ento nyeko te mako Ojudaya, gin te tero jo mogo areco ame tio i cuk, eka jo-nono te kelo woo adwoŋ i boma. Gin te guro ot a Yacon kun oyenyo Paulo kede Cira me otergi i nyim lwak.

⁶A doŋoyenyogi kwe, ote wayo Yacon kede omego mogo terogi i nyim wegi twer me paco-nono, kun oredo ni, “Jo ame aman doŋtye aloko wi podo luŋ oluktuke, otuno doŋ anaka kan daŋ, Yacon te gamogi i ode.

⁷Ginjo-nono otyeobalo cik a Kaicari oko, kun okobo ni tye dok abaka moro ocele ame olwoŋo ni Yecu.”

⁸Kopgi-nono te tugo lwak kede wegi twer me paco-nono i kare ame gin doŋowinyo.

⁹Wegi twer te miyo Yacon kede jo ocele jeŋo lim, ote gonyogi.

¹⁰Oyotoyot omego te cwayo Paulo kede Cira dyewor i Berea. Gin ka otuno kuno, ote wot i kacokere Ojudaya.

¹¹Ojudaya-naca rik tamgi beco kato me Tecalonika, pien gin rik obin ogamo kop Obaŋa i cunygi luŋ; nino i nino gin rik te bedo moyo i coc a yam ocoo ka ce kop ame okobo tye kakare.

¹²Jo apol i akinagi te lokere doko jo oye Yecu, karacel kede monnogo apopol a ŋeye, anaka co daŋ ame gin jo Grik.

¹³Ka Ojudaya me Tecalonika oniaŋ ni Paulo tye a rabo kop Obaŋa i Berea daŋ, gin daŋ te wot kuno, ote bedo tutugo kede rurubo lwak.

¹⁴Oyotoyot omego te cwayo Paulo oko i dog nam, ento Cira kede Temoteo te doŋ kuno.

¹⁵Jo ame olwoko Paulo otuno kede naka i Atene; Paulo te cikogi baŋ Cira kede Temoteo ni myero gin bino baŋe oyot acalo twerre, jo-nono te dok gigi.

¹⁶Ame Paulo pwod tye akurogi i Atene, cunye owaŋ atek ka oneno boma-nono ducu opoŋ i cal jogi.

¹⁷Omio en te bedo laro kop i kacokere kede Ojudaya kede jo a woro Obaŋa, dok daŋ piny a ru rik te bedo laro kop i cuk kedejo a tye kuno.

¹⁸Jo mogo a gin oryeko me eryoŋet a jo Epikuria kede jo Citoiki daŋ okobo kede, eka jo mogo te kobo ni, “Lon akobo kop miŋomiŋoni ka ŋit akobo ŋo?” Jo ocele akobo ni, “En nen bala arabkop i kom Yecu kede i kom cerrere.”

¹⁹Jo-nono te make, tere i wi kidi me Areopago kun openye ni, “Itwero niaŋowa i kom pwony anyen ame ikelo-nie?

²⁰Pien ikelliwa gigi mogo apat apata ame owinyo; wan doŋ omito ŋeyo ginnono.”

²¹Pien jo me Atene luŋ aluŋa, kede wele ame bedo iye, otyeko karegi i kobo onyo i winyo gigi mogo anyen keken.

²²Paulo te cuŋ i dye kidi me Areopago, te kobo ni, “Wun jo Atene, an doŋaneno ni, wun iketo wunu cunywu i woro obaŋa apapat i yore luŋ aluŋa.

²³Pien ka abedo be bea kun aneno gin ame iworo wunu, anwoŋo keno me lam ame ocoo kome ni, ‘Me Obaŋa a mom oŋeo.’ Doŋ gin ame iworo wunu a mom iŋeo wunu-nono, en ame an arabo pire baŋwu.

²⁴Obaŋa ame oketo wi podo luŋ kede jami a tye iye ducu, en ame obedo Rwot a bwoo polo kede lobo, en mom bedo i ot ame jo ogero i ciŋgi.

²⁵Daŋ jo gire mom twero tiye kede ciŋgi, bala en mito ginnoro; pien en ikome ame mio baŋ jo luŋ kwo kede weo kede jami Iuŋ.

²⁶En daŋ oketo jo luŋ a rokgi papat ame tye i wi podo kun gin ducu oya i kom dano acel. En onwoŋo omoko karegi oko coŋ kede waŋ kio me kabedogi,

²⁷me gin omo Obaŋa, kun ogenoni atot ya obino boboŋo ote nwoŋe. Aco kono Obaŋa gire mom tye bor i ŋattoro.

²⁸Pien ‘Wan okwo i en, olelea i en, obedo tye daŋ i en’; Dok tye acalo oco werwu mogo okobo, ‘Pien wan daŋ wan ikwae mere.’

²⁹Doŋ ka wan obedo ikwae Obaŋa, pe myero opar ni kite Obaŋa calli jabu, onyo ryal, onyo gweŋ, ame gin jami ame opao pi diro kede tam a dano.

³⁰I kare ame jo pwod kwia piny Obaŋa obedo bala mom oneno, ento amanni en doŋciko jo luŋ me ŋut.

³¹Pien en doŋotyeko moko oko nino ame en bino ŋolli lobo kop atira, a kun dano ame en oyero en a bino ŋolo. En daŋ doŋ omoko kop man oko baŋ jo luŋ i cero Yecu i akina a jo oto.”

³²Ka gin owinyo pi cer a jo oto, jo mogo onyero anyera, cite jo ocele okobo ni, “Dok obino medo winyo kop man baŋi i nino ocele.”

³³Paulo gire doŋ te ya wot oko i akinagi.

³⁴Ento jo mogo onotte kede ote lokere doko jo oye Yecu; i kin jo-nono onwoŋo tye iye Dionecio ame en dano a bedo i okiko me Areopago, kede dako moro ame nyiŋe Damari, karacel i jo ocele mere daŋ.