Read lango Tic Okwena 18 Bible Online

Tic Okwena 18 - lango bible

Tic Okwena 18

¹Icennere Paulo te ya oko i Atene wot i Korinti.

²En te nwoŋo Ajudaya moro kuno a nyiŋe Akwila, ame onwoŋo dano me Ponto. Dano-nono onwoŋo rik pwod obino abina kun oya i Itali gin i dako mere Puricikula, pien onwoŋo Kulaudio ociko ni Ojudaya luŋ myero ya oko i Roma. Paulo owoto baŋgi,

³te bedo baŋgi, pien dirogi me tic rik kwone acel; gin ducu rik okwo kema.

⁴Paulo rik te bedo laro kop i kacokere cabit i cabit, kun temo wa yo tam Ojudaya kede mea jo Grik.

⁵Kare ame Cira kede Temoteo doŋ otuno kun oya i Makedonia, Paulo te miyo kare mere luŋ i rabo kop Obaŋa, kun mio caden baŋ Ojudaya ni, Yecu gire en Kricito.

⁶Ka gin opyem kede kun oyete daŋ, en otennigi rukkere kun kobbigi ni, “Remowu bed i wiwu! An balloro gira mom baŋa. Cakere tin an gira doŋ abino wot baŋ Orok.”

⁷En te ya i kannaca oko, te wot i paco a lo moro a nyiŋe Titio Yucito; en rik onwoŋo dano a woro Obaŋa, ode ceŋ ceggi kede kacokere.

⁸Kricipo, adwoŋ me kacokere, te lokere doko ŋat oye Rwot, karacel i jo me ode luŋ; jo Korinti apol daŋ ka owinyo, oye Yecu ote batijagi.

⁹I dyeworrono, Rwot te kobbi Paulo i ginanyuta ni, “Kur ilwor; yin kobbi, kur iliŋ;

¹⁰pien an atye kedi. Dano moro mom gire bino timi i ginnoro arac, pien jo mera pol i boma man.”

¹¹En te bedo kuno mwaka acel kede dwete abicel kun pwonyo kop Obaŋa i akinagi.

¹²I kare ame Galio loo Akaya, Ojudaya luŋ obin oputte i kom Paulo i cuny acel, ote tere i ka ŋolo kop,

¹³kun okobo ni, “Dano-ni tye abito jo me woro Obaŋa i yore ame cik mom mito.”

¹⁴A doŋ Paulo cok yabo doge me kop, Galio te kobbi Ojudaya ni, “Wun Ojudaya, kono woki obedo kopporo me tim arac onyo me turo cik i yo arac, kono adio cunya me winyo kopwu, mano ŋeye kene.

¹⁵Aco ka kop i kom nyiŋ kop kede nyiŋ jo kede kop i kom eikwu-ni, wun nenu giwu keŋwu; an adag gira bedo aŋolkop me kodi koppono.”

¹⁶En te ryemogi oko ika ŋolo kop.

¹⁷Gin ote mako Cocitene, adwoŋ me kacokere, ote pwode inyim kom me ŋolo kop; ento Galio gire mom oparo kadi acelloro.

¹⁸Paulo te bedo kuno pi kare alalac, eka te ciko omego, te kwaŋo nam me dokoro i Curia, kun Puricikula gin i Akwila woto karacel kede. En onwoŋo omio omworo yer wie oko i Kenkeria, pien onwoŋo rik en okwoŋo kwoŋ.

¹⁹A doŋ gin otuno i Epeco, Paulo te wekogi kuno, en te wot gire laro kop Ojudaya i kacokere.

²⁰Ka gin okwae ni koŋ dikere baŋgi pi kare alalaccoro, en mom oye.

²¹Ame en doŋ ocikogi, okobo ni, “Abino dwogo baŋwu ka Obaŋa oye.” Eka en te kwaŋo nam kun ya i Epeco.

²²Ka gin otuno i wi tela me Kaicaria, gin te wot moto lwak jo oye Kricito, eka ote wot i Antiokia.

²³A doŋ otyeko kare moro kuno, en te ya oko, te bebea i kabedo acel acel i lobo me Galatia kede Purugia, kun mio teko baŋ jo luŋ a lubo Yecu.

²⁴Dano moro ame nyiŋe Apolo, Ajudaya me Alegejanderia; rik onwoŋo obino i Epeco. En rik dano opwonyere a ŋeo kop meicel, ame tek i coc a yam ocoo.

²⁵Lonnono rik onwoŋo opwonyo i yo a Rwot; en okobo dok opwonyo kop i kom Yecu i yore i yore kun kop okur i cunye, kadi kono onwoŋo en ŋeo ka batija a Lakana keken.

²⁶En ocako kop i tekcuny i kacokere. Puricikula kede Akwila ka owinyo koppere, otere, ote wot medo nyutte yo Obaŋa i yore i yore.

²⁷En rik te mito ni edokoro nam me wot Akaya, omego daŋ te cwako tammere, gin te coyo waraga baŋ jo a lubo Yecu ni myero jole. Ka doŋ otuno, pi kica Obaŋa omio en okonyo jo oye Rwot atek,

²⁸pien cen oloyo Ojudaya kannaler i nyim lwak kede teko me koppere, kun juro coc a yam ocoo pi nyuto ni, Yecu gire en Kricito.