Read lango Tic Okwena 19 Bible Online

Tic Okwena 19 - lango bible

Tic Okwena 19

¹Ame Apolo tye i Korinti, Paulo nwaŋ obeo i lobo i tuŋ malo, te tuno anaka i Epeco. En rik te nwoŋo jo mogo a lubo Yecu kuno

²te kobbigi ni, “Rik ibin inwoŋo wunu Cuny Acil i kare ilokere idoko wunu jo oye Yecu?” Gin te gamo ni, “Amaa, kom kadi winyo daŋ mom ru owinyo giwa ni Cuny Acil tye.”

³Dok te penyogi ni, “Kara rik obatijawu i kodi batija mene?” Gin te gamo ni, “Batija a Lakana.”

⁴Paulo te kobbigi ni, “Lakana rik batija jo ka gin oŋut, kun kobbigi ni myero gin oye dano ame abino lubo ŋec, mannono en Yecu.”

⁵Ka gin owinyo amannono, rik ote batijagi oko i nyin Rwot Yecu.

⁶Paulo te keto ciŋe i komgi, gin te nwoŋo Cuny Acil, ote cako dumo lebbogo apapat kede rabo kop acalo odwarpiny.

⁷Jo-nono luŋ rik oromo apar wie aryo.

⁸Paulo te wot donyo i kacokere, en rik te bedo rabo kop i tekcuny pi dwete adek, kun laro kedgi kop, dok temo waya tamgi i kom loc Obaŋa.

⁹Cite jo mogo cunygi obedo nwaŋ, mom oye Yecu, kun okobo kop areco i kom Yo-nono i nyim lwak ocokere, omio en te ya oko i baŋgi kun tero jo oye Yecu daŋ; eka en rik te bedo laro kop nino i nino i ot pwony a Turano.

¹⁰Mano otimere pi runi aryo twal, omio jo a bedo i Acia luŋ, Ojudaya anaka jo Grik daŋ, te winyo kop a Rwot.

¹¹Obaŋa onwoŋo tye ka miyo Paulo tiyo ticcogo atek adoŋo me awura apat i en a yam timere.

¹²Jo rik tero otwogi-gu atambara onyo boŋŋi me tic ame ogudo ka i kom Paulo, too daŋ te caŋ gire oko, ceŋ areco daŋ ya oko i komgi.

¹³Rik onwoŋo tye Ojudaya mogo ame oryem cen, a wowota awowot; gin daŋ obin otemo tic kede nyiŋ Yecu i kom jo a tye i cen areco, kun okobo ni, “Akwoŋŋiwu i nyiŋ Yecu ame Paulo rabo pire.”

¹⁴Itino abiro ame gin rik otino Ajudaya moro ame alamdog adwoŋ ame nyiŋe Cikewa, rik daŋ otimo amannono.

¹⁵Cen arac rik te penyogi ni, “Yecu an aŋeo, anaka Paulo daŋ aŋeo; kara wun kono iŋagi wunu?”

¹⁶Eka won cen araccaca te mukere i komgi, te loyogi luŋ i teko; omiogi ote riŋo oko i ot-tu ame gin ducu otye onoro dok kun daŋ owawanogi.

¹⁷Kop man rik te ŋeye baŋ Ojudaya kede jo Grik luŋame bedo i Epeco. Gin luŋ ote bedo alwor meicel, omio jo te medde keto kwogo adwoŋ i nyin Yecu.

¹⁸Jo apol i akina jo oye Rwot te bino ye kede tuco kannaler gigi mogo a yam gin obedo timo.

¹⁹Dok jo apopol daŋ a yam bedo tiyo ticcogo me jojok, te coko bukegi wano oko i nyim lwak luŋ. Rik ote myeko wel jami ame owaŋo, ote nwoŋo oromo ciliŋ tutumia abic twal.

²⁰Kop a Rwot rik te bedo nya, medde i teko i yore acalo mannono.

²¹Ka mano luŋdoŋ otum, Paulo otamo i cunye ni kono ebeo i Makedonia kede Akaya, ete wot i Jerucalem, kun kobo ni, “Ka doŋabedo kuno, myero doŋanen Roma daŋ.”

²²Omio en te oro jo aryo i akina jo a konye, Temoteo kede Eracito, kun en koŋ dikere anok i Acia.

²³I kare-nono arubaruba rik obedo adwoŋ i kom kop me Yo man.

²⁴Rik tye lo moro ame atet ryal, nyine Demeterio, en rik onwoŋo teto ot jok Atemi atitino moro, teto i ryal kun kelli odiro i tic magoba adwoŋ.

²⁵En rik te coko odiro-nono karacel kede jo ocele ame ticgi acel i megi-nono, eka te kobbigi ni, “Jo-nie, wun iŋeo wunu ni ticwa-ni en a kelliwa lonyo.

²⁶Aco wun doŋityeko neno, dok daŋ iwinyo wunu ni, Paulo moro-ni aman doŋobito jo dok oloko lwak apipim, mom ka i Epeco kan keken, ento buco doŋromo yi Acia luŋ, kun en kobo ni, obaŋa moro ducu ame jo tio kede ciŋgi mom gire obaŋa kadi acelloro.

²⁷Dok mom ticwa keken en a tye arac, ento anaka ot Atemi ikome ame jok adit-ti daŋ bino doko gin a konynere mom, ame man bino kwanyo kwogo me dit a dako man ame jo me Acia kede wi podo luŋworo.”

²⁸Jo-nu ka owinyo kop man, akemo te makogi atek meicel, ote bedo rereda ni, “Atemi a jo Epeco en ame dwoŋ gire!”

²⁹Arubaruba rik te bedo i bomanono adwoŋ meicel; jo rik te mako Gayo kede Aricitako, ame gin onwoŋo jo me Makedonia a nwaŋ woto karacel i Paulo, eka gin ducu te mwomere i cuny acel i ka tuko.

³⁰Paulo te mito ni en daŋ edony i akina lwak, ento olub Yecu te geŋe oko.

³¹Jo mogo a doŋo me Acia ame rik owote mere daŋ ocwaye kwena ni myero kur emiye me donyo i ka tuko.

³²Mannono omio redo a jo opokere oko papat, jo ocele aredo pi gin-ni, jo ocele pi ginnoro ocele; pien tam a jo i cokere onwoŋo doŋ orubere oko, omio pol a jo mom omedo i niaŋ gin omiogi ocokere.

³³Jo mogo i akina lwak otamo ni gin ocokere pi Alegejanda, pien Ojudaya ocwae i nyimgi. Alegejanda te diyogi kede ciŋe, kun onwoŋo en amito pido i nyim lwak.

³⁴Cite ka gin oniaŋ ni en kara onwoŋo obedo Ajudaya, gin luŋ ote wo i dwon acel pi kare a romo caa aryo, kun okobo ni, “Atemi a jo Epeco en ame dwoŋ gire!”

³⁵A doŋ aran me boma-nu ojuko lwak oliŋ oko, Alegejanda te kobo ni, “Wun jo me Epeco, kara ŋa a dok kwia ni boma me Epeco en ame gwoko ot jok Atemi adwoŋŋere, kede calloro a rik opoto i polo?

³⁶Kop-pi ducu mom tye ŋattoro a romo kwero; doŋ myero ibed wunu mot, kur itim wunu ginnoro ducu i myelkom.

³⁷Pien ikelo wunu jo-ni kan a kun gin gigi mom oyak ot jok, dok daŋ mom oyeto gigi obaŋawa.

³⁸Doŋ ba, ka Demeterio kede odiro tic ame tye kedgi tye kede kopporo i kom dano moro, okiko tye, oloc daŋ tye; myero gin opid kopgi apida kengi kengi.

³⁹Ento ka iyenyo wunu ginnoro ocele obino tyeko i cokere a lubo cik.

⁴⁰Pien bino bedo rac baŋwa, ka opiddiwa pi kop me tubere i gin otimere tin, pien te koppere mom nen, mio nyuto gin okelo aruruba man loowa oko.”

⁴¹A doŋ en okobo man, te keto cokere oko.