Read lango Tic Okwena 2 Bible Online

Tic Okwena 2 - lango bible

Tic Okwena 2

¹Ka nino me Pentekote doŋ otuno, onwoŋo gin luŋ rik ocokere karacel i kabedo acel.

²Cucuttono ginnoro owinyere ame ya i polo kun mor bino bala yamo akodo kede teko, te poŋ yi ot ducu, kan ame onwoŋo gin rik obedo iye.

³Cite gin a cal leb mac ame okaro apol onen baŋgi, te tyer, poto i kom dano acel acel i akinagi.

⁴Cuny Acil rik te poŋ yigi luŋ, gin te cako dumo leb ocele apapat, acalo Cuny Acil omiogi teko me kobo.

⁵I Jerucalem rik onwoŋo bedo iye Ojudaya, jo a woro Obaŋa ame oya i rok luŋ a tye i te polo.

⁶Kare ame ŋur man owinyere, lwak apol ocokere karacel, wigi koŋ te cuŋ oko, pien dano acel acel i akinagi owinyogi akobo leb me turgi.

⁷Omio gin te wuro atek meicel kun okobo ni, “Jonu ducu a kop-pu mom gin Ogalilaya?

⁸Kara piŋo wan ducu, ŋat acel acel tye awinyo kop i leb ame onywale iye?

⁹Wan jo Parti, jo Medi, jo Elam, kede wan jo ame obedo i Mecopotamia kede i Judaya kede Kapadokia, Ponto kede Acia.

¹⁰Purugia kede Pampulia, Miciri kede dul lobo me Libia ame otemere kede Kurene, kede wan wele ame oya i Roma, Ojudaya kede jo olokere i dini Ojudaya,

¹¹jo Kurete kede jo Arab, wan doŋ owinyogi orabo kop i lebwa ikome pi tic adoŋo ame Obaŋa otio.”

¹²Gin ducu owuro, tamgi te tum oko, ote penyere kengi kengi ni, “Kara man te koppere ŋo?”

¹³Ento mogo te cayo acaa kun okobo ni, “Jo-nu omer amera i koŋo alim.”

¹⁴Cite Petero ocuŋ karacel kede jo apar wie acel, te olakino kun kobbigi ni, “Wun jo me Judaya, kede wun jo ducu a bedo i Jerucalem, cik yitwu i koppa, atye i kop ame amito iŋe wunu.

¹⁵Jo-ni ba, mom omer kit ame itamo wunu kede, pien caa me iceŋ pwod adek keken;

¹⁶ento man en gin a rik adwarpiny Joel okobo pire ni,

¹⁷‘Man gin ame bino timere i kare me agikki, Obaŋa ame okobo, abino onyo Cunya i kom jo luŋ, Otinowu awobe kede anyira bino doko odwarpiny, awobewu adoŋo bino neno anyut, jowu oteggo bino leko lek.

¹⁸I kare-nono abino onyo Cunya i kom omiro mera a co kede a mon, gin te doko odwarpiny.

¹⁹Daŋ abino nyuto taŋo malo i polo, kede miyo anyuttogo piny i wi lobo, remo kede mac kede ikuna a duny bala yito.

²⁰A mom ru nino a Rwot obino, nino adwoŋ a nen kannaler, ceŋ bino cido acol icuc, dwe bino lokere doko remo.

²¹Dok daŋ jo luŋ ame bino lwoŋo nyiŋ Rwot obino larogi.’

²²“Wun jo Icrael winy wunu koppa: Yecu me Najaret onwoŋo en dano ame Obaŋa onyuto baŋwu kun moke kede tic atek adoŋo kede taŋo kede anyuttogo ame Obaŋa otio i akinawu kede ciŋe, acalo iŋeo wunu.

²³Yecu-ni rik jo obin omie baŋwu, kun lubo yik a rik Obaŋa oyiko dok oŋeo con, wun ite gure wunu i kom yataria kun ineke wunu kede ciŋ jo a kwia cik Obaŋa.

²⁴Cite Obaŋa doŋ ocere oko, kun ogonye oko i rem me to, pien onwoŋo to mom twero make bedo abuccere.

²⁵Pien Daudi rik okobo kop i kome ni, ‘Kare luŋ yam abedo neno Rwot i nyima, pien en tye i laŋeta tun cem me kur atagere;

²⁶Ennono omio cunya yom, leba daŋ te lelo; anaka koma daŋ bino bedo kede gen.

²⁷Pien mom ibino weko tipona ata i Kadec, kadi miyo kom Dano meri Acil top.

²⁸Imia aŋeo yo me kwo; i nyimi abino lelo meicel.’

²⁹“Doŋ ba, wun omegona, atwero kobbiwu kannaler ni kwarowa Daudi rik oto, ote daŋ yiko, wi lyellere tye baŋwa anaka onyoni.

³⁰Pien onwoŋo rik en adwarpiny; kun en oŋeo ni, Obaŋa yam okwonŋe kwoŋ ni ebino to akware moro i wi kom me loccere,

³¹omio ogeo neno cer a Kricito con, okobo kop i kome ni, mom oweke ata i Kadec, anaka kome daŋ pe otop.

³²Yecu-nono Obaŋa otyeko cero oko wan-ni luŋ ocaden me koppono.

³³Ka doŋ otyeko tuŋe malo i kabedo me kwogo i laŋet Obaŋa tuŋ cem, daŋ te gamo Cuny Acil a yam Obaŋa Papo ociko pire, en doŋ te onyo gin ame wun ikomwu ineno wunu dok iwinyo wunu.

³⁴Pien Oaudi gire mom oyito i wi polo; ento en ikome okobo ni, ‘Rwot okobbi Rwotta ni, Bed i laŋeta tuŋ cem i kabedo me kwogo,

³⁵ituno ka abino miyo okwori doko aten tyeni.’

³⁶Doŋ ba, doggola me Icrael myero ŋe ni, Yecu-nono ame iguro wunu i kom yataria, Obaŋa doŋ oloke odoko Rwot kede Kricito.”

³⁷A doŋ gin owinyo mannono, cunygi te ŋeŋema, ote kobbi Petero kede okwena ocele ni, “Omegowa, kara otim ŋo?”

³⁸Petero te gamo doggi ni, “Iŋut wunu, eka dano acel acel i akinawu te batakino i nyiŋ Yecu Kricito me wek balwu, ote miyowu mot man me Cuny Acil.

³⁹Pien rik ociko pirwu, kede pi itinowu kede pi jo ducu ame tye kananbor ame Obaŋa bino lwoŋogi baŋe.”

⁴⁰Otito i yore ocele apol, kun cuko cunygi kobo ni, “Larre wunu i lwagi jo ogom me kare man.”

⁴¹Jo oye koppere ote batijagi; i nino-nono jo te medde tutumia adek.

⁴²Gin te bedo keto cunygi i pwony okwena, kede i notte karacel, i nyilo ogati, kede i kwayo Obaŋa.

⁴³Jo ducu obedo kede lworo, okwena otio taŋo kede anyuttogo apol.

⁴⁴Jo luŋ ame oye Yecu ocokere karacel, onoto jamigi karacel.

⁴⁵Ote cato limgi kede jami ame owoŋo tye baŋgi, gin ote poko kun dano acel acel gamo acalo mittere tye.

⁴⁶Nino luŋ gin bedo karacel kede cuny acel i ot Obaŋa, onyinyilo ogati i paccigi, daŋ ocamo cemgi kede lelo a cunygi ler,

⁴⁷kun opako Obaŋa, jo luŋ pwoogi. Didik Rwot obedo medo baŋgi jo ame olarre.