Read lango Tic Okwena 21 Bible Online

Tic Okwena 21 - lango bible

Tic Okwena 21

¹Ame wan doŋotyeko pokere kedgi, ote kwaŋ kun omako yo atira anaka atot i Koc. Odiko ocele ote tuno i Rodo, ka oya i kuno otuno i Patara.

²Ote nwoŋo mel ame awot i Poinike, eka ote donyo iye, ote kwaŋ.

³Okwaŋ kun oneno Kupuro, ote weko oko tuŋ cam, ote kwaŋ wot i Curia; ote koŋ yito i wi tela i Turo, pien onwoŋo omito loko jami me mel kuno.

⁴Wan omoo olub Yecu ote bedo baŋgi kuno pi nino abiro. Cuny Acil obedo miyogi kobbi Paulo ni kono kur omedde i wottere i Jerucalem.

⁵Ento ka kare me wot oromo, wan omedde giwa i wotwa. Gin luŋolwokowa okato kedwa i ŋet boma-nono, anaka mongi kede otinogi. Ote rumo coŋwa piny i dog nam, ote kwayo Obaŋa.

⁶Eka ote doŋcikere. Wan ote donyo i mel kun gin odok paco.

⁷Oya i Turo ote medde i wotwa naka i Putolemai, eka ote motte kede omego, ote bedo baŋgi nino acel.

⁸Orwo mere ote wot oko, tuno naka i Kaicaria, eka ote donyo i ot a Pilipo arab amut aber ame en rik onwoŋo dano acel i kom jo abiro ca, ote bedo baŋe.

⁹En rik tye kede anyira aŋwen ame mom ru onyomo, gin rik orabo kop bala odwarpiny.

¹⁰I bedowa kuno ame otero kare alalac, adwarpinnyoro a nyine Agabo obino baŋwa kun onwoŋo oya i Judaya.

¹¹A doŋen otuno baŋwa, okwanyo del me pyer Paulo, te tweyo i ciŋe kede tyene kene kene, te kobo ni, “Cuny Acil okobo ni mano, ‘Ojudaya ame bedo i Jerucalem bino tweyo won del-li amannono, eka ote miye baŋ Orok.’ ”

¹²Tekki wan owinyo man, wan kede jo a rik tye kuno, ote kwayo Paulo ni kur doŋwot i Jerucalem.

¹³Paulo te gamo dogwa ni, “Do kara ame itimo wununono, imito balo wunu cunya i kokowu? Pien an gira doŋ ayikere, mom pi buc keken, ento anaka me to i Jerucalem pi nyiŋ Rwot Yecu.”

¹⁴Wan ka oneno ni okwero winyo ajukawa, ote weke giwa kun okobo ni, “Gin a Rwot mito myero tiye gire.”

¹⁵A doŋ kare mano otum, wan oyikere, ote wot malo i Jerucalem.

¹⁶Kede olub Yecu mogo ame oya i Kaicaria daŋ onywako yo kedwa, ote terowa i ot a Munacon, dano me Kupuro, ame onwoŋo lubo Yecu cakere con, en dano a rik oyiko ni wan myero obed wele mere.

¹⁷A doŋ wan otuno i Jerucalem omego te jolowa kede lelo adwoŋ.

¹⁸Orwo mere Paulo te wot karacel kedwa tuŋ a Yakobo; onwoŋo odoŋe luŋ daŋ tye kuno.

¹⁹Ame wan doŋ otyeko motogi oko, Paulo te porrigi kop ducu i yore i yore i gin luŋ ame Obaŋa otimo i akina Orok pi ticcere.

²⁰Gin ka owinyo, ote pako Obaŋa, kun okobo ni, “Ineno ba, ominwa, jo tutumia i tutumia i akina Ojudaya doŋ otyeko ye Yecu. Gin luŋ otye akemo pi cik,

²¹cite gin luŋ doŋ otyeko winyo kop i komi oko, ni yin ipwonyo Ojudaya luŋ a bedo i akina Orok ni wek kop a Muca oko, kun ikobbigi ni, kur doŋ olir otinogi onyo olub kittoro me kwaro.

²²Kara Ŋo a myero doŋotim? Pien gin awinyo oko ni yin ibino.

²³Pi mannono myero iti gin a wan okobbi. Wan otye kan i jo aŋwen ame gin otyeko kwoŋŋere i kwoŋ.

²⁴Yin ter jo-nono iwot ilonyere karacel kedgi, dok icul gin ame mitte pi lyelo wigi. Mannono bino miyo jo luŋ ŋeo ni gin ame okobo i komi kara kop lebere, ento kun yin ikomi imako cik ilubo giri.

²⁵Aco kop i kom Orok a doŋ oye Yecu, wan rik doŋ ocoyigi waraga kun otittigi gin a wan oŋolo, ni mano gin myero okwer gin ame oyalli cal jogi, kede remo, kede ginnoro ame odeo adea, kede tim me coco.”

²⁶Orwo mere Paulo te tero co-naca, te wot lonyere karacel kedgi, eka te wot i ot Obaŋa me wot tito nino ame obino cobo iye lonyeregi kede miyo gin ame oŋolo pi dano acel acel.

²⁷A doŋnino abiro ca ceggi tum, Ojudaya ame oya i Acia, a rik onwoŋo onene i ot Obaŋa, te cupo lwak, eka ote mako Paulo oko,

²⁸kun owo okobo ni, “Wun jo Icrael, konywa wunu! Man en lo ame tye apwonyo jo luŋ i kabedo ducu kop arac i kom rokwa, kede i kom cik a Muca, kede i kom kabedo man. Medo dok i mannono daŋ, en okelo jo Grik i ot Obaŋa, opyedo doŋ kabedo a yam cil-li oko,”

²⁹Pien onwo Ŋo gin oneno Turopimo, dano me Epeco, kun tye kede i boma-nono, ote tamo ni Paulo doŋ otyeko tere oko i ot Obaŋa.

³⁰Man omio jo i boma luŋ te belle, lwak te rwato ŋwec karacel; ote mako Paulo, waye tere oko i ot Obaŋa, ote cego doggola luŋ cucuttono.

³¹Ka onwoŋo doŋ gin amito neke oko, kop te ru winyere oko baŋ adwoŋ a loo cirikale me Roma, ni, arubaruba tye i Jerucalem luŋ.

³²Oyotoyot, en te ru tero cirikale kede odoŋegi, ote ŋwec anaka baŋ lwak. Gin ka oneno adwonŋu kede cirikale, ote weko pwodo Paulo oko

³³Alo cirikale luŋ te wot baŋ Paulo, te make, eka te ciko ni myero twe i jegere aryo. Eka en doŋ te penyo ni, “Ŋa-nono? Ŋo ce a en otimo?”

³⁴Jo mogo i akina lwak te redo kun kopgi mom rwatte, mogo akobo man, mogo akobo en ocele. Ka niaŋ kop me ateni me woogi-nono oloc, en te ciko ni myero ter Paulo i laigi.

³⁵Ame gin doŋ otuno i acoge, ocirikale te tiŋo Paulo atiŋa pi gero a lwak;

³⁶pien lwak adwoŋŋere olubogi kun owo ni, “Neke wunu oko!”

³⁷A doŋ gin ceggi kelo Paulo i lai, en te kwayo alo cirikale luŋ ni, “Itwero ye an koŋ akobbi kopporo?” Alo cirikale te kobbe ni “Iŋeo leb Grik kara?

³⁸Mom yin a Miciri moro a rik bin cup lwak i kare okato, te tero jo Pala Bat tutumia aŋwen i tim?”

³⁹Paulo te gamo ni, “An gira Ajudaya, aya i Taruco ame tye i Kilikia, ame en boma a mom okwia. Akwayi, ye me koŋ akobbi lwak.”

⁴⁰A doŋ oye, Paulo te cuŋ i wi acoge, te diyo lwak kede ciŋe. Ka doŋ gin oliŋ iti, en te kop kedgi i leb Eburania ni mano.