Read lango Tic Okwena 22 Bible Online

Tic Okwena 22 - lango bible

Tic Okwena 22

¹“Omegona kede jo a pappa, winy wunu pidona ame aketo i nyimwu.”

²Ka gin owinyo ni Paulo tye akop i leb Eburania, gin te medde liŋ. En te kobo ni,

³“An Ajudaya; onywala i Taruco ame tye i Kilikia, ento adoŋo i boma man i ka tyen Gamaliel. Apwonyere i yore luŋ i kom cik ame oya i baŋ kwariwa, dok abedo kede akemo pi Obaŋa bala wun luŋ tin.

⁴Rik awuno jo me Yo man atek, anaka nekogi, kede tweyogi i buc, co kede mongu.

⁵Alamdog adwoŋ kede jo luŋ ame bedo i okiko gin cadenna. Pien rik abin agamo waraga i baŋgi ame ocoo baŋ omegowa Ojudaya ame tye i Damaciko, ate daŋ wot kuno pi mako jo a tye iye, me akelgi i Jerucalem a doŋ atweogi oko, wek ket can i komgi.

⁶“Ka rik awoto, a doŋ a ceggi tuno i Damaciko, oyotoyot i cuny dyeceŋ acara moro adwoŋ te ya i polo, te menya twoda dyere.

⁷Eka ate rette piny, ate winyo dwon ŋattoro ame penya ni, ‘Caulo, Caulo, piŋo kara itye ka wuna?’

⁸An ate gamo ni, ‘Kara yin iŋa, Rwot?’ En te gamo ni, ‘An a Yecu me Najaret, en ame yin giri itye ka wunonono.’

⁹Jo a rik onwoŋo tye karacel keda oneno ka acara keken, ento mom owinyo dwon ŋat a kop keda.

¹⁰An ate kobo ni, ‘Kara man myero doŋ atim ŋo, Rwot?’ Rwot te kobba ni, ‘Ya malo me idony i Damaciko; obino kobbi gin luŋ ame oyiko ni myero iti i kuno.’ ”

¹¹Ame onwoŋo doŋ mom atwero neno piny pi ryeny me acara ca, jo a rik otye kedgi te peya apea i ciŋa, eka ote tuno i Damaciko.

¹²“Eka ŋattoro a nyiŋe Anania, dano ame onwoŋo woro Obaŋa kun lubo cik, a nwaŋ Ojudaya ame bedo kuno luŋ pwoc,

¹³obino baŋa te cuŋ i laŋeta, te kobba ni, ‘Ominna Caulo, nen doŋ piny.’ I caa-naca ikome, atiŋo waŋa malo, ate daŋ nene oko.

¹⁴En doŋ te kobba ni, ‘Obaŋa a kwariwa doŋ oyeri ni iŋe gin ame emito, inen ŋat a Kite Atir, dok iwiny kop aya i doge,

¹⁵pien yin ibino bedo cadennere baŋ jo luŋ i kom jami ducu ame ineno kede ame iwinyo.

¹⁶Kara aman pwod dok ikuro ŋo ce? Ya malo ilwoŋ nyiŋe, me ibatija oko, balli kwany oko.

¹⁷“A doŋ atyeko dwogo i Jerucalem, kun atye akwayo Obaŋa i ot Obaŋa, tamma rik te koŋ dok yutte oko,

¹⁸ate nene kun akobba ni, ‘Ru ya oko i Jerucalem oyotoyot, pien gin mom obino ye kop ame ibino tito i koma,’

¹⁹An ate kobo ni, ‘Rwot, gin oŋeo aber ni an abedo tweyo kede pwodo jo ame oye yin i kacokere acel acel.

²⁰Dok i kare arik oonyo remo a cadenni Citefano, an onwoŋo daŋ acuŋ kuno, kun agwoko boŋŋi ajo aneke, dok daŋ apwoo timgi.’

²¹En te kobba ni, ‘Ape, woti; pien abino cwayi kan abor, ibedo akwena baŋ Orok.’ ”

²²Gin owinye naka en otyeko koppere-nono, eka ote redo kede dwon aloŋo ni, “Neke wunu oko! Kwany dano-nono oko i lobo, kodi dano-nono mom romo bedo kwo.”

²³Ame gin otye owo, kun obobolo boŋŋigi, okiro-gu apua malo,

²⁴alo ocirikale luŋ te ciko ni tere i lai, kun daŋ ciko ni myero penye kun apwode i del, pi yenyo te kop omio jo awo i kome amannono.

²⁵A doŋ otwee oko kede del, Paulo te kobbi alo cirikale ame onwoŋo ocuŋ kakannono ni, “Dano ame obedo dano me Roma cik ye ni myero pwod i del, ame mom ru daŋ oŋolle kop?”

²⁶Ka adwoŋ ocirikale owinyo, te wot baŋ alo cirikale luŋ, te kobbe ni, “Kara ŋo ame aman imito timo? Dano-nono be Aroma ba.”

²⁷Alo cirikale luŋ te bino baŋe, te penye ni, “Titta, yin Aroma?” Paulo te dok iye ni, “Ee ta.”

²⁸Alo cirikale luŋ te gamo ni, “An rik aculo lwak lim abup me doko Aroma.” Paulo te gamo ni, “Aco an onywala iye anywala.”

²⁹Jo a rik oyikere me penye kun opwode apwoda te ket gigi oko oyotoyot; anaka en alo cirikale luŋ daŋ te bedo i lworo kare ame doŋ en oŋeo ni Paulo kara Aroma, pien onwoŋo doŋ etweo oko i del.

³⁰Orwo mere, ka onwoŋo en mito niaŋ atir gin omio Ojudaya rik apiddi Paulo, en ociko olamdog adoŋo kede jo me okiko luŋ ni myero ocokere. En te gonyo Paulo oko, kela cibo i nyimgi.