Read lango Tic Okwena 23 Bible Online

Tic Okwena 23 - lango bible

Tic Okwena 23

¹Paulo te ciko waŋe atek i komjo i okiko, te kobo ni, “Omegona, an i kwona luŋ abedo ame yia ler i nyim Obaŋa tuno kede naka tin.”

²Ento Anania ame onwoŋo alamdog adwoŋ, te ciko jo ocuŋ i laŋete ni doŋ doge.

³Paulo te kobbe ni, “Obaŋa bino doŋi yin daŋ, yin apama ame opuo i lobo atar! Yin ibedo ka ŋolla kop i te cik, a kun yin ikomi ituro cik pi ciko ni doŋ doga?”

⁴Jo onwoŋo ocuŋ i laŋete te kobo ni, “Loni, yin iyeto alamdog adwoŋ Obaŋa?”

⁵Paulo te kobo ni, “Onwoŋo mom aŋeo ni en alamdog adwoŋ, amaa omega, pien rik ocoo ni, ‘Kur ikob kopporo arac i kom ŋat a loo jowu.’ ”

⁶Paulo ka oniaŋ ni jo-nono onwoŋo dul acel iye Ocadukayo, kede en ocele Oparicayo, oredo i okiko ni, “Omegona, an gira Aparicayo, onywalla daŋ Oparicayo. An gira aŋolla kop pien atye i gen i cer a jo oto.”

⁷A doŋ Paulo okobo kop man, pyem te erre i akina Oparicayo kede Ocadukayo, cokere te pokere oko aryo.

⁸Pien Ocadukayo kobo ni, cerroro gire mom tye, dok daŋ okobo ni, kadi omalaika, kadi tipo mom gire tye, ento Oparicayo ye ni ginnogo luŋ tye.

⁹Woo dok te bedo iye adwoŋ meicel, te miyo opwony-cikkogo me eryoŋet Oparicayo te ya malo i pyem kun okobo ni, “Wan giwa mom onwoŋo ginnoro arac a dano-ni otimo. Kara ka tipo onyo amalaika okobo kede, raccere tye kwene?”

¹⁰Ka pyem odoko agwa, alo cirikale luŋ te bedo i lworo ni gin bino yeyeco Paulo atitino, omio en te ciko ocirikale me luŋere piny baŋgi, wek oma Paulo oko iyi akinagi tetek, okele i lai.

¹¹Orwo mere i dyewor, Rwot te bino cuŋ i laŋete, te kobbe ni, “Di cunyi, pien acalo rik ibedo cadenna i Jerucalem, myero daŋ ibed cadenna i Roma.”

¹²A doŋ piny oru oko, Ojudaya te yiko kop karacel. Gin te kwoŋere me mom cem kadi mato pii, ŋuno waŋ ame koŋ oneko Paulo.

¹³Jo a rik oyiko kop kittono, onwoŋo kato pyeraŋwen oko.

¹⁴Gin te wot baŋ olamdog adoŋo kede odoŋe, ote kobbigi ni, “Wan otyeko kwoŋo kwoŋ atek meicel, ni mom obino gudo cem ituno waŋ a koŋ oneko Paulo.

¹⁵Pi mannono, wun karacel kede jo me okiko, myero icwa wunu kop baŋ alo ocirikale luŋ amanni, me kele baŋwu, acalo bala pwod ibino wunu medde yenyo wunu koppere odoco. Wan oyikere oko me neke a mom ru en otuno a ceggi.”

¹⁶Ento okeo a Paulo rik onwoŋo owinyo yikgi-nono oko; en te wot donyo i lai, te kobbi Paulo oko.

¹⁷Paulo te lwoŋo dano acel i akina odoŋ cirikale, te kobbe ni, “Ter atin awobi-ni baŋ adwoŋ a loowu, pien en tye kede kopporo ame en amito kobbe.”

¹⁸Dano-nu te tere baŋ alo ocirikale luŋ, te kobo ni, “Paulo ame abuc ocwana baŋe, te kwaya ni akel atin awobi-ni baŋi, ni en tye kede kopporo ame amito kobbi.”

¹⁹Alo cirikale te mako ciŋe tere teŋe, te penye i muŋ ni, “Kara kop aŋo ame imito kobba?”

²⁰En te kobo ni, “Ojudaya doŋ omoko kop me kwayi ni diki ter Paulo piny baŋgi i okiko, acalo bala gin pwod obino medde iyenyo koppere odoco.

²¹Ento yin kur iyegi, pien tye jogi pyeraŋwen ame doŋ okwonere oko ni mom obino cem kadi mato pii, ituno waŋ a koŋ oneko Paulo, jo-nono tye a kiye. Aman gin doŋ oyikere oko, okuro ka kop a ya i baŋi.”

²²Alo ocirikale te miyo awobi-nu wot kun ocike ni, “Kur dok okobbi ŋattoro kop ame ititta-ni ba.”

²³En te lwoŋo odoŋ me cirikale aryo, te kobbigi ni, “Yik wunu cirikale mia aryo, karacel kede wegi aguragura pyerabiro, kede wegi toŋi mia aryo, me wot Kaicaria caa adek me iwor.

²⁴Yik wunu daŋ leyi me ayita a Paulo, me gin otere oreme baŋ aloc Felikici.”

²⁵En te coyo waraga kit man,

²⁶“Baŋ adwoŋ Won Kwogo aloc Felikici. An Kulaudio Lucia, amoti.

²⁷Dano man onwoŋo Ojudaya omake, daŋ omito neke oko, cite an amwomere baŋgi kede ocirikale, ate maye oko i baŋgi, pien onwoŋo atyeko niaŋ ni en obedo Aroma.

²⁸Ka amito ŋeyo gin omio gin opide, atere piny i okikogi.

²⁹Anwoŋo ni mom romo neke kadi tweye i buc.

³⁰Ento ka awinyo ni gin opiro kop me neko ico man oko, en omio aru cwaye oko baŋi, kun aciko daŋ jo a mito pide ni kel kop i kome i nyimi.”

³¹Ocirikale te tero Paulo acalo ocikogi, ote kele dyewor tuno i Antipatri.

³²Odiko ka piny oru, gin gigi ote dok paco i lai, ote weko wegi aguragura medde wot kede.

³³Ka gin otuno i Kaicaria, ote miyo waraga baŋ aloc, daŋ ote nyuto Paulo baŋe.

³⁴Ka en otyeko kwano waraga, te penyo lobo a Paulo oya iye. Ka doŋ en oniaŋ ni oya i Kilikia,

³⁵te kobbe ni, “Abino winyo koppi ka jo a pidi doŋ otuno.” En te ciko ni myero gwoke i ot adwoŋ ame Kerode bedo iye.