Read lango Tic Okwena 24 Bible Online

Tic Okwena 24 - lango bible

Tic Okwena 24

¹Ka rik nino doŋ okato kany, Anania, alamdog adwoŋ, te bino kede odoŋe mogo, kede pilida moro a nyiŋe Terutulo. Gin te nyutti aloc kop a gin opiddi Paulo iye.

²A doŋ olwoŋo Paulo, Terutulo te geyo pido kun kobo ni, “Won Kwogo, adwoŋ Felikici, wan giwa obedo i kuc adwoŋ meicel piri, daŋ pi ryekoni, omio koppogo a yam reco doŋ oyiko oko pi rok man.

³Man wan ojolo giwa i yore luŋ i kabedo luŋ i twon pwoccoro adwoŋ.

⁴Ento, mom myero dok amedde olo komi akato. Akwayi ka akwaa keken pi kicani, imiwa kare anonokkoro, iwiny kopwa-nie.

⁵Pien wan doŋ oneno ni lo-ni, raccere doŋ rom i edeke. En obedo tubo Ojudaya a tye i kabedo luŋ i wi podo; dok-gu en obedo atel wiccoro me eryoŋet a jo Najaret.

⁶Otemo pyedo anaka ot Obaŋa, ote make oko, [kun onwoŋo wan omito ŋolle kop a lubo ci kwa.

⁷Ento Lucia ame adwoŋ a loo cirikale luŋ, te bino maye oko i ciŋwa tetek.

⁸En te ciko ni jo a pide myero bin i nyimi.] Yin daŋ ka ibino pepenyo en kop man, ibino niaŋ i ginnoro ducu ame wan opide iye.”

⁹Ojudaya daŋ te notte i pido-nono kun omoko ni koppono tye amannono.

¹⁰Aloc te cimo Paulo ni myero kobi, en te gamo ni, “An aŋeo ni, yin doŋ ibedo aŋolkop a rok man pi runi apol, en omio apido pidona kede yomcuny.

¹¹Yin ka iyenyo piri keni, ibino niaŋ ni mom ru okato nino a romo apar wie aryo geye ame akwanyo yo awoto malo i Jerucalem me wot woro Obaŋa.

¹²Jo-ni mom onwoŋa apyem i ŋattoro, onyo atye atubo lwak, kadi i ot Obaŋa, kadi i kacokere luŋ, kadi onyo i dye boma.

¹³Dok daŋ mom gire otwero moko kop ame gin opida iye amanni.

¹⁴An aye kop man i nyimgi ni, an aworo Obaŋa a kwariwa kun alubo kite me Yo man, ame gin ocwano ni eryoŋet, kun aye kop luŋ ame rwatte kede cik a Muca, kede ame odwarpiny ocoo.

¹⁵Daŋ atyei gen i kom Obaŋa, ame en kit gen acel a jo-ni ikomgi daŋ tye kede, ni mano, jo a kitegi atir kede jo a kitegi mom atir bino cer oko.

¹⁶Omio an nino luŋ aketo tek me bedo a yia ler baŋ Obaŋa kede baŋ jo.

¹⁷Ame doŋ runi okato apopol kun ape, abino baŋ rokka pi kelo kony ame omiogi, kede me miyo mot me yalo Obaŋa.

¹⁸Kare ame onwoŋo rik atye atimo man, gin ote nwoŋa i ot Obaŋa a doŋ alonyere gira oko, kun onwoŋo mom tye gire lwakkoro kadi woo moro kuno. Ento onwoŋo ka tye Ojudaya mogo ame oya i Acia;

¹⁹gin onwoŋo myero rik opida i nyimi kan con, kono ka ce onwoŋo gin rik otye i kopporo i koma.

²⁰Onyo koŋ imi jo-ni a tye kan amanni kob ginnoro ame gin rik onwoŋa abalo, i kare ame acuŋ i nyim okiko.

²¹Kono ka kop acel-li keken ame aredo kun acuŋ i akinagi, ni, ‘An gira aŋolla kop tin pi kop me cer a jo oto.’ ”

²²Cite Felikici, pien onwoŋo ŋeo kop me Yo-naca odoco, koŋ te galogi kun kobo ni, “Ka Lucia alo cirikale luŋ obino kan, an abino ŋolo kopwu.”

²³En te ciko adwoŋ me ocirikale ni gwok Paulo, ento myero mie kare, kur geŋ awottere moro miye kony.

²⁴Ka kare okato anonokkoro, Felikici te bino gin i cege Durucila, nya jo Judaya. Olwoŋo Paulo, te winyo ka en kobo kop i kom ye Yecu Kricito.

²⁵Ame onwoŋo en tye apyem i kom kite atira, gwokere ken, kede i kom ŋolo kop ame bino bedo tye i nyim, lworo rik te mako Felikici oko, te gamo ni, “Aman koŋ iwot giri; ka anwoŋo kare ate dok bino cwani.”

²⁶Medo i mannono, en onwoŋo ageno ni Paulo twero miye limmoro. Mano omio en obedo lwoŋe teretere kun kobo kede.

²⁷Ame mwaka aryo doŋ okato, Porkio Fesito te lunyo kaka Felikici. Felikici rik te weko Paulo i buc, pien onwoŋo mito ni Ojudaya pwoe.