Read lango Tic Okwena 25 Bible Online

Tic Okwena 25 - lango bible

Tic Okwena 25

¹Ka Fesito doŋ obino ocako tic i lobo mere, ori nino adek te ya i Kaicaria wot oko i Jerucalem.

²Eka olamdog adoŋo kede Ojudaya adoŋo mege te kobbe kop ame gin opiddi Paulo iye kun daŋ odie,

³ni myero timgi ber mi kel Paulo i Jerucalem; kun onwoŋo gin oyiko kop me neke oko i waŋa yo.

⁴Fesito te gamo ni, “Paulo ogwoko i Kaicaria, an ikoma daŋ amito wot kuno aceggi-ni.

⁵Doŋ myero imi otelwu luŋere kuno karacel keda; me wek gin wot pide ka ce tye kopporo arac i kome en dano-nono.”

⁶Ame doŋ obedo kedgi nino a mom kato aboro onyo apar, en te wot gire oko i Kaicaria. Orwo mere en te bedo i kom me ŋolo kop, te ciko ni kel Paulo.

⁷Ka Paulo obino, Ojudaya ame oya i Jerucalem te cuŋ gure dyere, ote pide kop apol apek daŋ, ame gin ikomgi mom oromomoko i yore moro.

⁸Paulo te pido kun kobo ni, “An gira mom abalo kopporo kadi acelloro i cik Ojudaya, onyo i ot Obaŋa, kadi baŋ Kaicari.”

⁹Cite Fesito rik onwoŋo daŋ mito ni Ojudaya pwoc, omio en te gamo kop a Paulo ni, “Imito ni myero wot pidi kop magi i nyima i Jerucalem?”

¹⁰Paulo te dok iye ni, “An doŋ acuŋ i nyim kom me ŋolo kop a Kaicari, en kan a myero ŋolla iye kop. An gira mom atimmi Ojudaya ginnoro arac, yin daŋ giri iŋeo mano aber meicel.

¹¹Ka ce atye atimo onyo ca abalo ginnoro arac a romo miyo oneka, an gira mom akwero to; aco ka pidogi ame okelo i koma yore mom, ŋattoro a romo miya baŋgi daŋ mom tye. An ajure koppa baŋ Kaicari.”

¹²Ka Fesito koŋ okobo i jo me okiko mere, te dokke iye ni, “Yin doŋ ijuro baŋ Kaicari, ibino wot baŋ Kaicari.”

¹³A doŋ kare okato anonokkoro, abaka Aguripa gin i Berenike te tuno i Kaicaria pi jolo Fesito.

¹⁴Ame gin pwod otye obedo kuno pi kare moro alalac, Fesito te keto kop a Paulo i nyim abaka, kun kobo ni, “Lo moro a rik Felikici bin oweko i buc tye kan.

¹⁵Ame onwoŋo an atye i Jerucalem, olamdog adoŋo kede odoŋe okobba kop ame gin omito pide iye, kun okwaa ni an aŋol kop loc.

¹⁶An ate dokkigi iye ni, mom kite a jo Roma me miyo dano moro baŋ jo apide a kun mom ru en orwatte kedgi waŋ i waŋ, ote miye kare me pido i kom gin ame opide iye.

¹⁷Doŋ ka rik gin obino karacel kan, an mom agal; orwo mere ate bedo oko i wi kom me ŋolo kop, eka ate ciko ni myero kel lonnono iye.

¹⁸Jo a rik dote ka ocuŋ, mom dok ote kelo adottoro arac kit onwoŋo atamo;

¹⁹ento ote kelo ka koppogo me pyem a mako ka dinigi kede kop i kom lo moro ame nyiŋe Yecu, a rik doŋ otyeko to oko, ento Paulo pwod kobo ni tye gire kwo.

²⁰Yenyo te kopgi-nono oloa, omio apenye ka en mito ni wot pide kop magi i Jerucalem kuno.

²¹Ento ka en Paulo doŋ ojuro ni koŋ gwoke pi kuro ŋol a Won Kwogo Adwoŋ, an aciko ni gwoke ituno ka abino cwaye baŋ Kaicari.”

²²Aguripa te kobbi Fesito ni, “Amito koŋ winyo kop a lormono.” En te kobbe ni, “Ibino winyo diki.”

²³Orwo mere Aguripa te bino gin i Beranike i kwogo adwoŋ, ote donyo i ot kan ame owinyo iye pido, karacel kede odoŋe a loo crikale, kede jo adoŋo me boma-nono. Fesito te ciko ni myero kel Paulo, eka daŋ ote kelo.

²⁴Fesito te kobo ni, “Abaka Aguripa, kede wun luŋ a tye baŋwa koni, ineno wunu dano man ame lwak Ojudaya luŋ rik obako doggi baŋa pire i Jerucalem, kede kan daŋ, a kun oredo ni, kodi lo-ni mom doŋ porre bedo kwo.

²⁵Cite an mom anwoŋo ni otimo ginnoro a romo miyo oneke; doŋ acalo bala en ojuro Won Kwogo Adwoŋ, an doŋ amoko me cwaye.

²⁶Doŋ ba, an mom atye i ginnoro a myero aco i kome baŋ adwoŋ ca. En omio akele i nyimwu, akato mere i nyimi yin abaka Aguripa, me wek ka ŋit opepenyo en, anwoŋ ginnogo a myero aco.

²⁷Pien i tuŋ baŋa cwayo abuc aboŋo tito kop a tye i kome, aneno ni konnyere mom.”