Read lango Tic Okwena 26 Bible Online

Tic Okwena 26 - lango bible

Tic Okwena 26

¹Aguripa te kobbi Paulo ni, “Doŋ oye ni ikob koppi piri keni.” Paulo te ryeyo bade te pido ni,

²“An kena kena aparo ni atye kede winyo me pido pidona tin i nyimi yin abaka Aguripa, pido ame gudo kop luŋ a yam Ojudaya opida pire,

³akato mere, pien yin iŋeo kite Ojudaya luŋ karacel kede koppogo me pyem. En omio akwayi me diyo cunyi, winyo koppa.

⁴“Kite me kwona, cakere i tinona gin Ojudaya luŋ ŋeo, pien abedo iyi akina rokka kede i Jerucalem cakere i ageyi.

⁵Gin doŋ oŋeo pi kare alac, ka ce gin ye, gin twero tuco ni rik an abedo Aparicayo, kun alubo eryoŋet me diniwa ame cikkere tek meicel.

⁶Aman acuŋ kan apida pi gen atye kede ni Obaŋa bino cobo gin a rik ociko baŋ kwariwa.

⁷Gennono, atekerewa apar wie aryo luŋ geno ni obino nwoŋo, kun oketo cunygi i woro Obaŋa dyeceŋ kede dyewor. Pi gennono gire, en omio Ojudaya tye apida, ama abaka!

⁸Piŋo wun Ojudaya mogo itamo wunu ni mannono kop a mom oromo ye, ni Obaŋa cero jo oto?

⁹“An ikoma daŋ onwoŋo yam atamo ni myero atim gigi mogo apopol ame lweny i nyiŋ Yecu me Najaret.

¹⁰Daŋ ate timo amannono i Jerucalem; anwo Ŋo twer i baŋ olamdog adoŋo ate ke to jo Obaŋa apol i buc. Ka rik oŋolligi to, an daŋ abolo kwirra me nekogi.

¹¹Tyen apol ata atimogi cucu i kacokere luŋ, kun adiyogi me yeto nyin Yecu. Rik aŋo i komgi atek meicel, omio awapogi tuno naka i boma Orok pi wunogi.

¹²“Pi ticcono onwoŋo rik atye awot Damaciko kun onwoŋo anwoŋo twer kede or i baŋ olamdog adoŋo.

¹³I cuny dyeceŋ, abaka, ame onwoŋo atye i waŋa yo, ate neno acara moro ame oya i polo, ame ryennyere kato cen oko, te menya twoda dyere, kede jo a rik tye awot keda.

¹⁴Ame doŋ wan luŋ oony piny oko, ate winyo dwon ŋattoro a penya i leb Eburania ni, Taulo, Caulo, piŋo kara itye ka wuna? Bedo tek yin igweyo leb ecipet.

¹⁵An ate gamo ni, ‘Kara yin iŋa, Rwot!’ Rwot te gamo ni, ‘An a Yecu, en ame yin giri itye ka wuno-nono.

¹⁶Aco ya doŋ malo, icuŋ i tyeni, An doŋ anen baŋi me keti bedo aticca kede cadenna i kom gin ame ineno i koma, kede i kom en ame ibino neno ka dok anyutte baŋi.

¹⁷Abino lari i baŋ jo meri Icrael kede i baŋ Orok ame abino cwayi baŋgi.

¹⁸Yin ibino yabo waŋgi, me imigi oya oko i colpiny odwog i lero, dok oya oko i te twer a Catan odwog baŋ Obaŋa, me wek pi ye Yecu, Obaŋa wek balgi oko, onwoŋ daŋ kabedo i akina jo ame olonyo obedo acil.’

¹⁹“Pi mannono, abaka Aguripa, an rik mom akwero lubo gin onyutta iya i polo,

²⁰ento ageo rabo kop baŋ jo i Damaciko, kede doki i Jerucalem, anaka atot i lobo Judaya luŋ, kede baŋ Orok daŋ. Arabbigi ni mano, myero gin oŋut, olokere baŋ Obaŋa, eka ote tiyo tic ame jo oŋut porre tiyo.

²¹Man en kop omio Ojudaya omaka i ot Obaŋa, ote temo neka.

²²Cite Obaŋa obedo konya tuno naka i nino a tin-ni, omio acuŋ kan kun amio caden baŋ jo adoŋo kede atino, kun mom akobo gira kopporo, kono ka en a rik odwarpiny kede Muca okobo ni bino timere;

²³en ene ni, Kricito myero to, dok daŋ ni, en koŋ bino geyo cer iyi akina a jo oto, eka te rabo kop me lero baŋ Ojudaya kede baŋ Orok.”

²⁴A doŋ Paulo onwoŋo tye apido amannono, Fesito te redo i dwon aloŋo ni, “Lo-ni Paulo yin apoa. Pwonyereni atek ateka omio aloki oko idoko apoa.”

²⁵Paulo te gamo doge ni, “Adwoŋ won kwogo Fesito, an gira mom apo. An akobo kop me ateni dok daŋ me ryeko a tere tye.

²⁶Abaka gire ŋeo kop magi; i nyime an atwero kop i tekcuny, pien aŋeo aber ni en mom kwia kopporo i kom kop magi, pien gin-ni luŋmom tye moro iye ame otimere i muŋ.

²⁷Abaka Aguripa, yin iye odwarpiny? An aŋeo ni iyegi.”

²⁸Aguripa te kobbi Paulo ni, “Itamo ni itwero loka adoko Akricitayo pi kare anonokkoro-ni?”

²⁹Paulo te gamo ni, “Kadi pi kare anonokkoro onyo abor, akwao Obaŋa ni kono mom yin keken ibedo calo an, ento anaka jo luŋ ame tye awinya tin, cite mom i jegere-ni.”

³⁰Abaka te ya oko malo gin i aloc kede Berenike, kede jo a rik obedo kedgi.

³¹Ame gin doŋ owoto oko ote kop kengi kengi ni, “Lonnono gire mom otimo ginnoro a mio oromo neke kadi tweye.”

³²Aguripa te kobbi Fesito ni, “Lo-ni gire onwoŋo otwero gonyo oko, kono rik en mom ojuro baŋ Kaicari.”