Read lango Tic Okwena 27 Bible Online

Tic Okwena 27 - lango bible

Tic Okwena 27

¹Ka doŋ omoko ni wan okwaŋ nam owot naka i Itali, ote miyo Paulo kede obuc ocele baŋ adwoŋ cirikale me eryoŋet Augucito, ame nyiŋe Julio.

²Ote donyo i melloro me Aduramatio, ame onwoŋo mito wot i waŋ kwaŋ ame tye loka i dog nam me Acia, ote cako wotwa i nam. Aricitako, dano me Makedonia a rik oya i Tecalonika, onwoŋo daŋ tye kedwa.

³Odiko ocele ote tuno Cidon; Julio te timo Paulo ber, miye kare wot baŋ owote mere me gwoke.

⁴Ka oya i kuno ote beo cocok i cula nam me Kupuro pi geŋo yamo, pien yamo onwoŋo obino i tuŋ nyimwa.

⁵Eka ote kwaŋ ŋolo nam i ŋet Kilikia kede Pampulia, ote tuno i Mura ame tye i Lukia.

⁶Adwoŋ cirikale te nwoŋo melloro me Alegejandaria kuno, ame akwaŋ awot Itali, te ketowa iye.

⁷Ote bedo kwaŋ momot a romo nino apopol, eka ote tuno daŋ me tek i Kinido. A doŋ yamo ogeŋowa mom otwero wot anyim, ote lunyo kwaŋ bea cocok i cula nam me Kurete i ŋet Calmone.

⁸Kannono daŋ okato i tek, ote tuno i kabedo ame olwoŋo ni, Waŋ Edokit Abeco, ame boma me Lacea ceggi kede.

⁹Kare alac onwoŋo doŋ okato, wot daŋ doŋ odoko me can, pien nino me kanyo kec onwoŋo doŋokato oko, omio Paulo okwenyorogi,

¹⁰kun kobo ni, “An doŋ atyeko neno ni, wot man bino kelo aroma kede rwenyo jami apol, pe terwa keken kede mel, cite anaka kwowa daŋ.”

¹¹Ento adwoŋ cirikale rik te winyo kop aryem mel kede won mel, akaka winyo mea Paulo.

¹²Pien wan kwannono onwoŋo mom ber me bedo i kare me koyo, omio jo apol otamo ni myero ya oko iye, dony i nam, me ka twerre gin otun i Poiniki obed kuno; ame en waŋ kwaŋ me Kurete ame nen i tun anyarodi i tuŋ kide kede i tuŋ anyarolum i tuŋ kide.

¹³Ka yamo me tuŋ anyarolum ocako kodo momot, gin te tamo ni doŋ onwoŋo gin ame onwoŋo omito, ote puto nyonyo a tweo mel, ote kwaŋ beo a ceggi i ŋet Kurete.

¹⁴Ame kare pwod okato anonokkoro keken, yamo ager ame olwoŋo ni Yurakwilo te kuto atek kun ya i wi tela.

¹⁵A doŋyamo otyeko mako mel a mom doŋtwero tiko yamo, wan ote weko kolo gire.

¹⁶A kun oriŋo i geŋŋi me cula atidi ame olwoŋo ni Kauda, ote canne atek me mako yee.

¹⁷Ka doŋotyeko waya yee oko malo, ote lido mel kun ucwao tol i tere; dok owao boŋo i malo dwoggo piny, pien gin onwoŋo olworo ni kur opot i coto emwonya ame olwoŋo ni Curtic, yamo te kologi amannono.

¹⁸Orwo mere, a nam apuyowa atek meicel, gin te cako bolo ter i mel oko.

¹⁹I cen me adekkere gin ikomgi ote bolo jami tic me mel i ciŋgi.

²⁰A doŋ ceŋ kede acer otero nino apol kun mom nen, dok daŋ yamo kot adwoŋ obedo kodo diyowa, icennere genwa luŋ me bwot te tum oko.

²¹A doŋ gin ori kare alac aboŋo cam, Paulo te ya malo i akinagi, te kobo ni, “Owotena, kono ce onwoŋo iwinya wunu, eka mom ote ya oko i Kurete, kono mom onwoŋo wunu aroma kede rwenyo jami.

²²Aman akobbiwu ni, diu cunywu; pien kwo a ŋattoro i akinawu mom bino rwenyo, kono ka mel keken.

²³Pien i dyewor a tin-ni, amalaika Obaŋa ame an aworo daŋ ocuŋ i laŋeta,

²⁴te kobba ni, ‘Kur ilwor, Paulo. Yin myero icuŋ i nyim Kaicari; dok, nen, Obaŋa doŋ otimo ber, omii jo luŋ ame tye a kwaŋ kedi-ni.’

²⁵Pi mannono, diu cunywu, owotena, pien an aye Obaŋa, abino bedo gire kit ame en okobba-nono.

²⁶Cite myero koŋ dok opot i kom icula moro.”

²⁷Ka doŋ oromo nino apar wie aŋwen kun pwod owiwira i nam me Adria, i dye idiŋ, okwaŋ mel te tamo ni doŋ oceggi tuno i lobo moro.

²⁸Gin te pimo, ote nwoŋo oromo futi mia acel i pyeraryo. Ote dok wot anok, ote dok pimo, ote nwoŋo futi pyeraboŋwen.

²⁹Gin te lworo ni ŋit obino coro lela, omio ote bolo nyonyo aŋwen i tuŋ ŋec me juko mel, ote kwayo Obaŋa ni myero mi piny ru.

³⁰Okwaŋ mel te mito lwi oko iyi mel, omio gin ocwao yee piny i nam, eka ote poporo ni omito bolo nyonnyogo i tuŋ nyime.

³¹Paulo te kobbi adwoŋ me cirikale, kede baŋ cirikale ni, “Jo-ni ka mom obedo i mel, mom itwero wunu bwot.”

³²Eka cirikale te ŋolo tol i yee oko, te weko poto teŋe.

³³A doŋ piny amito ru, Paulo te cuko cunygi gin luŋ, ni koŋ ocam cemmoro, kun okobo ni, “Tin doŋ odoko nino apar wie aŋwen ame ibedo wunu nino ducu a cunywu ogem agema aboŋo cam, a mom ibilo wunu ginnoro.

³⁴Omio abako doga baŋwu, cam wunu cemmoro koŋ; bino konyowu me-bwot, pien yer wi ŋattoro i akinawu mom bino rwenyo.”

³⁵A doŋ otyeko kobo kit-ti, omako ogati; ka doŋ opwoo Obaŋa i nyimgi luŋ, onyinyilo, te cako camo.

³⁶Gin luŋ cunygi te dwogo, ote daŋ camo cemmogo.

³⁷(Wan luŋ a rik otye i mellono, rik oromo jo mia aryo kede pyerabiro wie abicel.)

³⁸Ka gin otyeko cem a doŋ oyeŋ, gin obolo ŋano i nam me mel dok ayot.

³⁹Odiko ame piny doŋ oru, gin mom oŋeo lobo ame otye iye, ento oneno gul nam kan ame doge obedo kwoyokwoyo, gin te tamo ni ocwa mel iye ka ce twerre.

⁴⁰Gin te gonyo nyony, weko i dye nam, a kun daŋ olalago tol ame onwoŋo otweo kede pol a wiro mel, ote waya boŋo me nyime malo me yamo kolgi, ote kemo gul nam kan ame obedo kwoyokwoyo.

⁴¹Cite ka gin ocop i kan ame pii i nam rwatte iye, gin te coro mel i kwoyo; tuŋ nyime te moko oko a mom dok twero yeŋere, ojwinnere te tur oko pi teko me pii a bedo tagere.

⁴²Ocirikale te tamo ni myero onek obuc oko, me kur okwaŋ, ote lwi gigi oko.

⁴³Ento adwoŋ cirikale omito ni elar Paulo, omio en te geŋo tamgi-naca oko; eka te ciko jo a ŋeo kwaŋ i korgi ni gin koŋ oge poto i nam, ote kwaŋ wot i wi tela.

⁴⁴Jo odoŋ, mogo mak bao, mogo mak gigi mogo a tye i kom mel. Mannono omio gin luŋ ote tuno i wi tela oreme.