Read lango Tic Okwena 28 Bible Online

Tic Okwena 28 - lango bible

Tic Okwena 28

¹Ka doŋ wan otyeko bwot, ote niaŋ ni cula-nono kara nyiŋe Melita.

²Wegi lobo-naca te timowa kica i yore moro a mom nen atata. Gin omoko mac ote jolowa iye, wan luŋ, pien kot onwoŋo doŋ oero cwe oko, onwoŋo piny ŋic.

³Paulo onwoŋo rik daŋ ocoko yen wic acel te onyo i mac; pi lyeto me mac, ororo te donnyo iye, te riria i ciŋ Paulo.

⁴Wegi lobo oneno ginnono tye alologa i ciŋe, ote kop kengi kengi ni, “Lonnono be anek jo. Kadi bed en obwot i nam, aŋolkop atira mom oye en ibedo kwo.”

⁵Cite Paulo te teŋo ororo-nono i mac, ginnoro otime daŋ mom.

⁶Gin obedo kuro kun otamo ni bino kwot, onyo ŋit bino rette piny te to oko oyotoyot; ka gin doŋ obedo kuro pi kare alalac, ginnoro arac mom otimere i kome, gin dok te loko tamgi oko, ote kobo ni, lonnono gire obaŋa moro.

⁷Kan a ceggi i bedoka-nono, rik obedo lobo a lo moro a nyiŋe Pubulio, ame en rik rwot me cula-nono. Lonnono rik obin ojolowa, te gwokowa daŋ aber pi nino adek.

⁸Pappere en Pubulio onwoŋo rik tye two too me lyeto kede cado remo, kun obuto kede piny. Paulo te wot lime; okwao Obaŋa eka te keto ciŋe i kome, te caŋe.

⁹A doŋ man otimere, jo ocele i cula-nono a rik two te bino, ote daŋ caŋogi.

¹⁰Gin te miyowa mot apol; i kare a wan odonyo i mel, gin oketo iye ginnoro luŋ a wan omito.

¹¹Ka dwete adek doŋ okato, ote ya i kuno i melloro me Alegejanderia ame onwoŋo otyeko kare me koyo i cula-nono anennere onwoŋo, “Omego a Rude.”

¹²Ote tuno i Cirakuc, ote tyeko nino adek kuno.

¹³Oya i kannono, otuno i Regio; ka nino acel okato, yamo me tutuŋ anyarolum te cako kodo, i nino me aryo mere ote tuno Puteoli.

¹⁴Kuno onwoŋo iye omego, gin daŋ te cwanowa ni obed kedgi nino abiro. Ote tuno i Roma amannono.

¹⁵Omego me kuno onwoŋo owinyo pirwa, ote bino me jolowa tuno naka i Cuk me Appio kede i paco ame olwoŋo ni, Udi Cem Adek. Ka Paulo onenogi, opwoo Obaŋa, cunye odwogo.

¹⁶A doŋwan otuno i Roma, oye ni Paulo bed kene, karacel kede cirikale ame gwoke.

¹⁷Ka nino adek okato, en olwoŋo Ojudaya adoŋo me kuno karacel; a doŋ gin ocokere, en te kobbigi ni, “Omegona, kadi bed mom atimo ginnoro arac baŋ jowa onyo i kom kite a kwariwa, cite gin otwea i buc i Jerucalem, ote miya iciŋ jo Roma.

¹⁸Ka gin opepenyo an, ote mito gonya oko, pien mom onwoŋo tye kopporo a romo miyo oneka.

¹⁹Cite ka Ojudaya opyem, mannono odia me juro baŋ Kaicari, kadi bed mom atye kopporo me piddi rokka.

²⁰Man en omio akwao ni anenwu, akob kedwu, pien pi gen ame Icrael tye kede, en omio otwea i jegere-ni.”

²¹Gin te kobbe ni, “Wan giwa mom olimo waraga moro ame oya i Jerucalem ame kobo kop i komi, akadi ominwa moro daŋ mom gire obino otittiwa onyo okobbiwa kopporo arac i komi.

²²Ento wan omito winyo i baŋi gin ame itamo, pien kop a dok i kom eryoŋet man, wan oŋeo ni okobo kop arac i kome i kabedo luŋ.”

²³Ka doŋgin otyeko moko nino moro kede, jo apol te mol baŋe acalo wele mege. En te yekkigi kop i kom loc Obaŋa, geye odiko tuno naka otyeno. Otemo niaŋogi kop i kom Yecu kun juro cik a Muca kede coc odwarpiny.

²⁴Jo mogo te ye kop a en okobo, cite mogo te kwero oko.

²⁵Ka rik tamgi doŋmom rwatte, ote ke keta oko, a doŋ Paulo otyeko kobbigi kop acel-li, ni, “Cuny Acil yam okobo aber baŋ kwariwu i dog adwarpiny Icaya ni,

²⁶‘Wot baŋ jo man, ikobbigi ni, Me winyo, ibino winyo wunu, ento mom ibino niaŋ wunu tere, me neno, ibino neno wunu, cite mom ibino ŋeyo wunu,

²⁷Pien rok-k i cunygi odoko nwaŋ, yitgi odiŋ oko, mom owinyo aber, waŋgi daŋ omio gigi oko; me kur onen kede waŋgi, kadi winyo kede yitgi, kadi niaŋ i cunygi, kadi dwogo baŋa me acaŋgi.’

²⁸Koŋ dok iŋe wunu ni, teko me larre ame Obaŋa mio doŋ ocwao oko baŋ Orok; gin bino winyo.” [

²⁹Ka en doŋokobo kop man, Ojudaya te keketa oko, kun opyem atek kengi kengi.]

³⁰En rik te bedo kuno runi aryo ikiŋ, i ottoro a en opaŋo, kun jolo jo ducu a bino baŋe.

³¹En orabbigi kop i kom loc Obaŋa, dok opwonyogi kop i kom Rwot Yecu Kricito kannaler, aboŋo ginnoro a geŋe.