Read lango Tic Okwena 3 Bible Online

Tic Okwena 3 - lango bible

Tic Okwena 3

¹Petero kede Lakana rik otye owot i ot Obaŋa i caa me kwac, en caa aboŋwen.

²Ote cop i kom jo a tiŋo dano moro ame aŋwalo geye i yi tottere. Jo-nono rik ocibe didik i doggola me ot Obaŋa ame olwoŋo ni, Aber, me en kwa lim baŋ jo a donyo i ot Obaŋa.

³En oneno Petero gin kede Lakana kun ocako donyo i ot Obaŋa, te kwayogi ni mie lim.

⁴Petero gin i Lakana te ŋiye, Petero te kobbe ni, “Nenwa.”

⁵En te moko tammere ducu i komgi, kun geno nwoŋo ginnoro i baŋgi.

⁶Cite Petero te kobbe ni, “An a mom i ryal kadi jabu, ento amiyi gin ame atye kede. Pi teko me nyiŋ Yecu Kricito me Najaret, ya iwoti.”

⁷Petero te mako ciŋe tuŋ cem, yiye malo. Cucuttono tyene kede ogwic tyene te doko atek oko;

⁸Oya malo iwic te cuŋ acuŋa, odonyo karacel kedgi i ot Obaŋa, kun woto pyepyea, pako Obaŋa.

⁹Jo luŋ onene kun doŋ awot apako Obaŋa,

¹⁰gin oniaŋ i kome ni en dano a yam bedo kun kwao lim i doggola Aber me ot Obaŋa; gin owuro atek meicel gin ame onwoŋo otimere i kome.

¹¹Ame en pwod ocerre i yo Petero gin kede Lakana, jo ducu orwomo ŋwec karacel baŋgi i te baraja ame olwoŋo ni, mea Culeman, kun owuro meicel.

¹²Ka Petero oneno, orabbi lwak ni, “Wun jo Icrael, piŋo iwuro wunu kop man, onyo piŋo wanwu omoko i komwa, bala wan pi tekowa, onyo ni pien wan olworo Obaŋa, en omio dano-nu owoto?

¹³Obaŋa Iburaim kede Icaka kede Yakobo, Obaŋa a kwariwa, rik oketo kwogo i kom amiro mere Yecu ame wun rik iketo wunu erupe i kome, daŋ ikwere wunu i nyim Pilato, ame onwoŋo omoko ni myero gonye oko.

¹⁴Wun ikwero wunu ŋat Acil kede Akite-atir, cite ite kwayo wunu ni tim ber gonnyiwu anek,

¹⁵ite neko wunu ŋat a terowa i kwo. Ento Obaŋa te cere oko i akina a jo oto; wan ocaden me cerrere.

¹⁶Nyiŋe, kede pi ye nyiŋe, en omio teko baŋ dano man ame ineno wunu, daŋ iŋee wunu; iyee ame obino pi Yecu en omio kom dano man odoko ayot odoco i nyimwu ducu.

¹⁷“Kakare omegona, aŋeo ni rik itimo wunu man pi kwiya piny, kede olocwu daŋ amannono.

¹⁸Ento i yore-nono Obaŋa doŋocobo kakare gin a rik en otito con i dog odwarpiny ducu, ni Kricito mere myero kany can adwoŋ.

¹⁹Ŋut wunu doŋ, ite dwogo wunu baŋ Obaŋa, me we balwu oko.

²⁰Kare me weo myero bin kun ya i nyim Rwot, dok myero en cwa Yecu, ame en Kricito a rik oyero pirwu con.

²¹Polo myero koŋ game ituno ka kare oromo me dwoggo jami ducu kakare, ame rik Obaŋa otito pire i dog odwarpinnyere acil, ame obedo kare acon.

²²Muca rik okobo ni, ‘Rwot Obaŋa bino miyowu adwarpinnyoro ame bino ya i akina omegowu, kite a en rik omia kede baŋwu. Wun ibino winye wunu i ginnoro luŋ a en bino kobbiwu.

²³Ento dano acel acel ame mom bino winyo kop adwarpiny-nyu, obino neko oko i akina jo.’

²⁴Kede odwarpiny ducu daŋ, geye i kom Camwiri kede jo olubo ŋec ducu ame okobo kopporo, gin orabo pi kare man.

²⁵Wun ikwae odwarpiny, daŋ ileo wunu cikere a rik Obaŋa ociko baŋ kwariwa, kun okobbi Iburaim ni, ‘Atekere luŋ me wi podo bino nwoŋo winyo pi ikwaeni.’

²⁶Kare ame Obaŋa doŋ omiowa amiro mere, ogeo ore baŋwu, me miwu winyo, me loko dano acel acel ya oko i kom ballere.”