Read lango Tic Okwena 4 Bible Online

Tic Okwena 4 - lango bible

Tic Okwena 4

¹Ame Petero kede Lakana pwod tye akop i lwak, olamdog kede adwoŋ cirikale me ot Obaŋa, karacel kede Ocadukayo, te bino baŋgi,

²a doŋ oŋo meicel pien gin otye opwonyo lwak dok orabo kop ni Yecu ocer, ame nyuto ni jo oto daŋ bino cer.

³Gin te makogi ketogi i ot kol ituno odiko, pien onwoŋo piny oyuto oko.

⁴Ento jo apol ame owinyo koppono, polgi oye Yecu, te miyo wel co romo tutumia abic.

⁵Orwo mere olocgi, odoŋe kede opwony-cik te cokere i Jerucalem,

⁶karacel kede Anna, ame alamdog adwoŋ, kede Kayapa, kede Lakana, kede Alegejanda, kede jo ducu a gin wati olamdog adoŋo.

⁷A doŋocibogi i dyere, gin te penyogi ni, “Wun kara itimo wunu man kede kodi teko aŋo onyo kede nyiŋŋene?”

⁸Eka Cuny acil te poŋ i yi Petero, te kobbigi ni, “Oloc a lwak kede odoŋe,

⁹ka tin ipenyowa wunu pi gin aber ame otimere i kom aŋwalo kede kite ame en ocaŋ kede,

¹⁰myero wun ducu, kede jo Icrael luŋ, iŋe wunu ni, pi nyiŋ Yecu Kricito me Najaret ame rik iguro wunu i kom yataria, eka Obaŋa rik te cere oko iyi akina a jo oto, pi nyiŋe en omio ico man ocuŋ inyimwu a doŋkome yot.

¹¹Man en kidi ame wun ogedo ikwero wunu, en ame odoko kidi me gwic ot.

¹²Larre mom doŋtye baŋ dano moro ocele; pien mom dok tye nyiŋŋoro ocele i te polo ame Obaŋa omio jo, a myero wan olarre pire.”

¹³Ka gin oneno tekcuny Petero gin kede Lakana, dok daŋ oniaŋ ni gin jo moro keken a mom opwonyo, gin owuro meicel, ote daŋ poyo ni jo-nono yam bedo karacel i Yecu.

¹⁴Ento ka gin oneno dano ame ocaŋo ocuŋ karacel kedgi, mom doŋote bedo kede kop a myero opyem iye.

¹⁵Gin koŋ te cikogi donyo oko i okiko, eka gin te bedo yiko kop kengi kengi.

¹⁶Gin te penyere ni, “Otim wunu ŋo i kom jo-ni? Pien jo i Jerucalem ducu doŋ ŋeo ni gin onyuto anyut a pire orwo, ame wan mom dok otwero kwero.

¹⁷Doŋ me geŋo kop man medde lal i akina a jo, myero obur wunugi me kur dok okobbi ŋattoro kop i kom nyiŋ man.”

¹⁸Amannono gin doŋ te lwoŋogi, ote cikogi atek ni kur gin okob kopporo, kadi pwonyo jo i nyiŋ Yecu.

¹⁹Ento Petero gin kede Lakana te dokkigi iye ni, “Ka ber i nyim Obaŋa me winyowu akato Obaŋa, wun myero iŋol wunu;

²⁰pien wan mom otwero weko kobo gin a doŋ oneno kede a doŋowinyo.”

²¹Dok ote burogi kede teko, ote gonyogi oko, kun mom onwoŋo yo me keto can i komgi pi lwak; pien lwak ducu onwoŋo apako Obaŋa pi gin ame otiye.

²²Dano a rik ocaŋo kede kodi anyut man, mwaka me dittere onwoŋo kato pyeraŋwen oko.

²³A doŋ otyeko gonyogi, gin te wot baŋ owotegi, ote porrigi gin ame olamdog adoŋo kede odoŋe okobbigi.

²⁴Ka gin owinyo, gin otiŋo dwongi karacel baŋ Obaŋa kun okobo ni, “Ama Adwoŋ Rwot, yin a nwaŋ itio polo kede lobo kede nam kede jami ducu a tye iye.

²⁵Yin ame rik ikobo i Cuny Acil i dog kwarowa Daudi, amiro meri ni, ‘Piŋo Orok rik owo kede akemo? Piŋo rok otamo kop a tere pe?

²⁶Rwode me lobo doŋ oterre oko, oloc ocokere karacel, i kom Rwot kede i kom Kricito mere.’

²⁷Iyi ateni, Kerode gin kede Pontio Pilato, karacel kede Orok kede jo me Icrael ducu, ocokere karacel i boma man i kom amiro meri acil, Yecu, a rik ioro me bedo abaka,

²⁸me wek gin otim gin ducu ame pi twer me ciŋi kede yikki rik imoko ni myero timere.

²⁹Doŋ amanni Rwot, koŋ inen kit a gin burowa kede, mi omiro meri tekcuny me kobo kop meri aboŋo lworo,

³⁰kun yin iryeo ciŋi icaŋo jo, imio anyuttogo kede taŋo timere i nyiŋ amironi acil, Yecu.”

³¹Ka gin doŋ otyeko kwayo Obaŋa oko, kabedo ame gin ocokere iye te yeŋere, Cuny Acil te poŋ i yigi luŋ, gin te kobo kop Obaŋa i tekcuny.

³²Lwak jo a rik oye Rwot rik obedo i tam acel kede cuny acel; mom tye ŋattoro ame kobo ni jami mere moro obedo mere kene, ento gin onoto jami ducu karacel.

³³Okwena omedde miyo cadengi i kom cer a Rwot Yecu i teko adwoŋ, dok winyo Obaŋa rik tye i komgi luŋ.

³⁴Iyi akinagi luŋ, mom tye ŋattoro ame gin a en mito oremo, pien jo ducu ame rik tye i potti, onyo udi, gin rik ocato oko ote kelo limmere,

³⁵keto i tyen okwena; eka ote pokki dano acel acel a rome.

³⁶Doŋ rik tye Alevi moro ame onywalo i Kupuro, ame okwena rik ocako nyiŋe Baranaba, te koppere ni, Acuk cuny jo.

³⁷En daŋ rik tye kede poto, ocato oko, te kela limmere keto i tyen okwena.