Read lango Tic Okwena 5 Bible Online

Tic Okwena 5 - lango bible

Tic Okwena 5

¹Cite lo moro a nyine Anania gin kede cege Capira rik ocato dul lobo moro,

²eka ote kano dul limmogo oko, ame dako mere daŋ ŋeo, en te lunyo kela ka nucu moro keken keto i tyen okwena.

³Cite Petero te penye ni, “Anania, kara piŋo imio Catan oloo cunyi oko, omio ibwolo Cuny Acil, ite kano piri keni limmogo ame owilo i poto?

⁴Ame rik pwod mom ru icato, onwoŋo mom megi? Kadi ame doŋ icato, limmere rik gire mom tye i twerri? Kara piŋo cunyi dok omoko kodi kop-pi? Ibwolo giri Obaŋa, ento mom jo.”

⁵Ka Anania owinyo kop man, orette piny, te to oko. Lworo adwoŋ omako jo luŋ ame owinyo.

⁶Awobe te ya, boye, tere, yike oko.

⁷Ame pwod okato caa bala adek, dako mere daŋ te bino, kun mom oŋeo gin ame otimere.

⁸Petero te penye ni, “Koŋ ikobba ka rik icato wunu poto i wel-lie?” Dako te gamo ni, “Ee ta, wellere ennono.”

⁹Petero te kobbe ni, “Piŋo inoto dogwu i temo Cuny a Rwot? Nen, tyen jo oyiko cwari pwod enno i doggola, gin daŋ obino teri oko.”

¹⁰Cucuttono en te rette piny i tyen Petero, to oko. Ka awo be ca odwogo, onwoŋe oto oko, otere, ote yike i laŋet cware.

¹¹Lworo adwoŋ omako lwak jo luŋ oye Kricito, kede jo ducu ame owinyo kop man.

¹²Okwena obedo timo anyut kede taŋo apol i akina lwak. Gin ducu rik ocokere didik i te baraja a Culeman.

¹³Jo ocele mere-ni, moro mom odio cunye me notte kedgi, ento lwak oketo kwogo adwoŋ i komgi.

¹⁴Jo ame oye Rwot omedde baŋgi, lwak co kede mon apol.

¹⁵Omio jo okelo otwo anaka i waŋa yo, opyelogi i tanda kede gi-butogi, me ka Petero abeo akato, kadi tipo mere myero tun i kom jo mogo i akinagi.

¹⁶Jo ame oya i pacci ame omano Jerucalem daŋ te cokere apol, kun okelo otwo kede jo a cen arac lologi, gin luŋ rik obin ocaŋogi.

¹⁷Cite nyeko te mako alamdog adwoŋ atek, karacel kede jo luŋ a rik tye baŋe, ame onwoŋo eryoŋet Ocadukayo.

¹⁸Gin te ya mako okwena, ote ketogi i ot kol a lwak.

¹⁹Ento dyewor amalaika a Rwot oyabo doggola me buc oko, te cwayogi oko kun kobo ni,

²⁰“Wot icuŋ wunu i ot Obaŋa, ite kobbi wunu lwak kop ducu me Kwo man.”

²¹A doŋgin owinyo kop man ote donyo i ot Obaŋa ka ibayi, ote ero pwony. Ka alamdog adwoŋ obino, karacel i jo a rik tye baŋe, olwoŋo okiko, kede odoŋe a jo Icrael ducu, gin te oro jo i ot kol me wot omogi.

²²Ento ka otic obino, mom ownonogi i buc; gin te dok dwoko kop ni,

²³“Wan onwoŋo ocego ot kol aber meicel, okur daŋ onwoŋo ocuŋ i doggola, ento ka oyabo, mom giwa onwoŋo dano moro i yie.”

²⁴Kare ame gin owinyo kop man, adwoŋ cirikale me ot Obaŋa kede olamdog adoŋo wigi te cuŋ oko i kom okwena, kun openyere ni, “Kara Ŋo a dok otimere ba?”

²⁵Cite dano moro te bino kobbigi ni, “lo a rik iketo wunu i buc ca, otye i ot Obaŋa ocuŋ iye opwonyo jo.”

²⁶Eka adwoŋ me cirikale kede otic te wot omogi, ento mom tetek, pien onwoŋo olworo lwak, me kur napgi kede gweŋe.

²⁷Okelogi ote cibogi i nyim okiko, alamdog adwoŋ te penyogi ni,

²⁸“Wan rik ocikowu atek meicel ni kur dok ipwony wunu jo i nyiŋ Yecu, ento aman koŋ inen, pwonywu doŋolal i Jerucalem luŋ, dok imito dwoggo wunu bal me to a lon-naca i wiwa!”

²⁹Petero kede okwena te gamo ni, “Wan myero owiny Obaŋa akato jo.

³⁰Obaŋa a kwariwa ocero Yecu a nwaŋ ineko wunu kun iŋabe wunu i kom yat.

³¹Dano man Obaŋa otiŋe malo, okete i kabedo me kwogo i laŋete tuŋ cem me en bed Atel kede Alar, wek mi jo Icrael kare me ŋut kede weko balgi.

³²Wan ocaden me kop man, karacel kede Cuny Acil ame Obaŋa doŋomio baŋ jo a winye.”

³³Ka gin owinyo man, yigi owaŋ meicel, ote mito ni onekgi oko.

³⁴Cite Aparicayo moro a nyiŋe Gamaliel, ame rik onwoŋo apwony me cik ame lwak luŋ keto kwogo i kome, oya malo i okiko, te ciko ni myero koŋ cwa jo-nu oko pi kare anonokkoro.

³⁵En te kobbi lwak ni, “Wun jo Icrael, gwokere wunu i kom gin ame ibino timo wunu i kom jo-ni.

³⁶Pien kare moro a doŋokato, Teyuda nwaŋ opello te miye kene ni en edano adwoŋ, jo ame welgi romo bala mia aŋwen twal oonyakino i yore. Ento ka oneke, jo ducu a nwaŋ lube-ni te ket ata, rwenyo atwal.

³⁷Icennere doki, Juda me Galilaya te pello i mege i kare me coyo nyiŋ jo, lwak dok ojoye i yore; en daŋ obin oto, jo luŋ a nwaŋ lube daŋ obin oket ata.

³⁸Doŋ i kop me tin, an akobbiwu ni, kwany wunu ciŋwu oko i kom jo-nu, wekugi obedi; pien ka kono yikgi-ni onyo ticgi-ni ocakere i baŋ dano, bino gik oko.

³⁹Ento ka ce oya i baŋ Obaŋa mom ibino loyo wunugi; kare ocele itwero nwoŋo ni itye wunu ka romo kede Obaŋa.”

⁴⁰Gin te ye koppere, eka ote cwano okwena pwodogi apwoda, ote gonyogi kun koŋ ocikogi atek ni kur okob kopporo i nyiŋ Yecu.

⁴¹Gin te ya oko i nyim okiko ame cunygi yom gigi, pien Obaŋa oye ni gin oromo miyogi lewic pi nyin Yecu.

⁴²Doŋ i nino luŋ mom okeŋ pwony kede rabo amut aber i ot Obaŋa kede i paccigi ni Yecu en Kricito.