Read lango Tic Okwena 6 Bible Online

Tic Okwena 6 - lango bible

Tic Okwena 6

¹I kare-nono ame wel a jo a lubo Yecu tye amedde, Ojudaya a kobo leb Grik te ero ŋuŋura i kom Ojudaya a kobo leb Eburania, ni mano didik ka apoko jami, mongi a coggi oto mom omaro paro pirgi wok.

²Okwena apar wie aryo te lwoŋo lwak luŋ a lubo Yecu, ote kobbigi ni, “Mom ber wan iweko rabo kop Obaŋa, ote lunyo ka pokki jo jami.

³Doŋ ba omegowa, yer wunu i akinawu jo abiro ame lwak pwoo, jo a yigi Opoŋ i Cuny Acil kede ryeko, me wan oketgi i kom tic man.

⁴Ento wan obino keto cunywa i kwayo Obaŋa kede i rabo kop.”

⁵Kop a gin okobo-nono oyomoro yi lwak luŋ; eka gin te yero Citefano, dano ame iyee mere dwon dok Cuny Acil opoŋ i yie, gin kede Pilipo, Porokoro, Nikanori, Timon, Parmena kede Nikolao dano me Antiokia ame olokere i dini Ojudaya.

⁶Gin te keto jo-nu i nyim okwena, eka okwena te kwayo Obaŋa pirgi kede keto ciŋgi i wigi.

⁷Kop Obaŋa rik te nya; wel jo a lubo Yecu daŋ te medde meicel i Jerucalem, olamdog apol daŋ rik te mako kop me iyee.

⁸Citefano ame rik winyo kede teko Obaŋa open i yie, obedo tiyo taŋo kede anyuttogo adoŋo i akina lwak.

⁹Ento jo mogo ame gin jo me kacokere ame ocwano ni, “Opii ame Ogonyo”, karacel kede jo Kurene, jo Alegejanderia, kede jo ame oya i Kilikia kede Acia, gin oya te ero pyem i Citefano.

¹⁰Ento loyo ryeko kede Cuny ame Citefano kobo kede, oloogi oko.

¹¹Gin te cupo jo mogo i muŋ me kob ni, “Wan otyeko winyo en akobo kop me ayet i kom Muca kede Obaŋa.”

¹²Gin te tutugo lwak, karacel kede odoŋe kede opwony-cik, gin te bino mako Citefano tero i nyim okiko.

¹³Gin te kela ocaden me goba ame kobo ni, “Dano man mom weko kobo kop arac i kom kabedo acil-li, kede i kom cik a Muca.

¹⁴Pien wan otyeko winyo kun en kobo ni, Yecu me Najaret-taca bino keto kabedo man oko, kede dok loko kitetwa a rik Muca omiowa.”

¹⁵Jo luŋ ame onwoŋo obedo i okiko te ciko waŋgi i kome; ote neno waŋe cal i wan amalaika.