Read lango Tic Okwena 7 Bible Online

Tic Okwena 7 - lango bible

Tic Okwena 7

¹Alamdog adwoŋ te penyo Citefano ni, “Kop tye amannono ateni?”

²En te kobbigi ni, “Omegona kede odoŋena, winy wunu koppa! Obaŋa won kwogo rik bin onen baŋ kwarowa Iburaim ame onwoŋo en tye i Mecopotamia, ame en mom ru odak i Karan,

³rik te kobbe ni, ‘Ya oko i lobowu kede i baŋ watini, iwot i lobo ame an abino nyutti.’

⁴En daŋ rik te ya oko i lobo a jo Kaldaya, eka te dak i Karan. Ka pappere doŋ oto, Obaŋa dok te kobe oko i kuno, kele naka i lobo ame aman ibedo wunu iye-ni.

⁵Obaŋa rik mom obin omie dulloro iye me bed mege ikome, kadi moro aduno a romo keto tyene keken, ento obin ociko acika ni ebino miyo baŋe me bed mege, kede ikwae ame bino lube, kadi bed atinnere moro nwaŋ mom.

⁶Cite Obaŋa okobo kop man ni, ikwae bino bedo wele i lobo a jo ocele; jo-nono bino lokogi odoko opii dok bino timogi cucu pi mwakki mia aŋwen.

⁷‘Cite an ikoma abino ŋolo kop i kom rok a gin otiyigi-nono, icennere gin bino ya oko i kuno, obino wora i kabedo man,’ mano Obaŋa en okobo.

⁸En rik te miyo baŋ Iburaim cikere me lirre. Pi mannono, kare ame Iburaim onywalo Icaka, olire i nino me aboro; Icaka te nywalo Yakobo, Yakobo te nywalo kwariwa acon apar wie aryo.

⁹“Kwariwa acon-naca nyeko rik te makogi i kom Yucepu, rik gin te cate oko i Miciri; ento Obaŋa obedo kede.

¹⁰Obaŋa rik te lare i cannoro luŋ ame ocore eka te miye winyo kede ryeko ame Parao abaka me Miciri nwaŋ te pwoyo, te miye loyo lobo Miciri kede ode luŋ.

¹¹Ka kec opoto i Miciri luŋ kede i Kanaan, can rik te rido jo atek, nwoŋo cam te loyo kwariwa oko.

¹²Cite ka Yakobo owinyo ni cam tye i Miciri, obin ooro kwariwa kuno tyen me agege.

¹³I wotgi me aryo Yucepu rik te nyutte kene baŋ omego mere, wati a Yucepu daŋ te ŋeye oko baŋ Parao.

¹⁴Eka Yucepu te oro jo wot lwoŋo pappere Yakobo gin i wati mere ducu baŋe, jo pyerabiro wie abic.

¹⁵Kite-nono Yakobo owoto i Miciri, eka te to oko, karacel kede kwariwa daŋ.

¹⁶Ote dwoko komgi i Cekem, yikogi i lyel a rik Iburaim owilo kede wel ryal i baŋ awobe a Kamor i Cekem kuno.

¹⁷“Ka kare doŋ onoko ceggi me cobo cikere ame Obaŋa rik ociko baŋ Iburaim, jo rik onya omedde atek i Miciri,

¹⁸ituno ka abaka ocele a kwia Yucepu ocako loc i Miciri.

¹⁹En rik te ŋolo ryeko i kom rokwa, te timogi alit meicel kun miogi obolo otinogi oko, wek kur bed kwo.

²⁰I karenaca en a rik ote nywalo iye Muca. En rik atin aber meicel i nyim Obaŋa; rik koŋ ote pite i ot a pappere dwete adek.

²¹Kare ame doŋ obole oko, nyaka a Parao te kwanye, pite acalo wode ikome.

²²Rik ote pwonyo Muca i ryeko a jo Miciri luŋ, en nwaŋ te bedo atek i koppere kede i ticcere.

²³“Kare ame mwaka me dittere oromo pyeraŋwen, en te tamo i cunye ni koŋ elim omego mere, jo Icrael.

²⁴Kare ame en oneno awuno danogi moro, en okonyo ŋat ame awuno, te neko dano me Miciri oko.

²⁵En otamo ni omego mere bino niaŋ ni Obaŋa bino tic kede me larogi, ento kara gin gigi mom oniaŋ.

²⁶Odiko ocele en te dok cop i kom jo Icrael aryo ame aromo, en te temo dwekogi kun kobbigi ni, ‘Jo-ni we, wun omego, kara pi ŋo iwunne wunu kenwu kenwu?’

²⁷Ento dano ame onwoŋo awuno wadgi ca te core teŋe kun kobo ni, ‘Ŋa kara oketi me oyowa kede ŋolliwa kop?

²⁸Imito neka bala Amiciri ame aworo ineko ca?’

²⁹Kodi kop-pi omio Muca obin oriŋo oko, te bedo welo i lobo me Midian, kan a en te nywalo iye awobe aryo.

³⁰“Kare ame dok mwaka pyeraŋwen okato, amalaika onen baŋe i tim me kidi Cinai, onen i leb mac ame alyel i yat obuŋere.

³¹Muca ka oneno, owuro meicel gin ame eneno; te noko ceggi wek enen odoco. Dwon Rwot te pello ni,

³²‘An Obaŋa a kwarini, Obaŋa Iburaim, Obaŋa Icaka kede Obaŋa Yakobo.’ Kom Muca omyel, mom dok te diyo cunye me neno.

³³Rwot te kobbe ni, ‘Wot amuk oko i tyeni, pien kabedo ame icuŋ iye-nono, en lobo acil.

³⁴Ateni, doŋ aneno kite ame owuno kede jona ame tye i Miciri, awinyo daŋ ŋuŋuragi, en doŋ abino piny pi larogi. Bin amanni me aori i Miciri.’

³⁵“Muca-nono a rik gin okwero kun okobo ni, ‘Ŋa kara oketi me loyowa kede ŋolliwa kop?’ en ame Obaŋa oore me bedo aloc kede alar, kun Obaŋa otio kede amalaika ame rik onen baŋe i yat obuŋere.

³⁶En a rik obino okwanyogi kun timo taŋo kede anyuttogo i lobo me Miciri, kede i nam Arema, kede i tim pi runi pyeraŋwen.

³⁷Muca nono en a rik obin okobbi jo Icrael ni, ‘Obaŋa bino miyowu adwarpinyoro ame bino ya i akina omegowu, kite a rik en omia kede baŋwu.’

³⁸En acellono a daŋ rik obedo i akina a lwak i dye tim, karacel amalaika a rik okobo kede i wi kidi me Cinai, kede kwariwa; Obaŋa te miye koppogo me kwo, me amia baŋwa.

³⁹Kwariwa te kwero winye oko, ocore teŋe, eka ote loko cunygi me dok cen i Miciri,

⁴⁰kun okobbi Aron ni, ‘Timmiwa obaŋa mogo ame bino telowa, pien Muca ame rik okwanyowa i lobo me Miciri, mom dok oŋeo gin ame otimere i kome.’

⁴¹I kare-naca gin te tiyo atin twon ote kela gitum me yalo cal-Iu, kun yigi yom gigi i kom gin ame ciŋgi otio.

⁴²Cite Obaŋa olokere, te jalogi i woro mony me polo, acalo rik ocoo i buk odwarpiny ni, ‘Yam ikella wunu leyi aneka kede gin ame oŋolo mwaka pyeraŋwen i tim, wun doggola me Icrael?

⁴³Rik gire itino wunu kema a Molok, kede acer Obaŋawu Repan, cal ame itio wunu me aworawu; cite an abino kobowu i ŋe Babulon twal.’

⁴⁴“Kwariwa rik obedo kede kema me caden i tim, acalo Obaŋa rik ociko kun kobbi Muca ni, ti a rom i cal a rik eneno con.

⁴⁵Kwariwa ame olubogi ka omiogi, gin okelo karacel kede Yocwa, i kare ame gin ogamo lobo a rok apapat ame Obaŋa oryemo i nyim kwariwa, ori ituno i kare a Daudi.

⁴⁶Obaŋa omio Daudi winyo, omio Daudi te kwayo ni myero enwoŋ kabedo pi Obaŋa a Yakobo.

⁴⁷Ento Culeman en ame obin ogerri Obaŋa ot.

⁴⁸Kadi amanno, En Amalo Meicel mom gire bedo i ottoro ame jo ogero kede ciŋ, acalo rik adwarpiny okobo ni,

⁴⁹‘Polo en kom me locca, lobo en aten tyena. Kara kit ottene ame ibino gerra wunu? Man kop a Rwot. Onyo ka weo mera tye kwene?

⁵⁰Mom ciŋa en otio jami magi ducu?’

⁵¹“Wun jo a ŋutwu okaŋ, ame cunywu kede yitwu mom oliro, nino luŋ ibedo geŋo wunu Cuny Acil; wun daŋ itimo wunu bala kwariwu rik otimo.

⁵²Kara adwarpinnyene a mom kwariwu owuno? Gin daŋ oneko anaka jo a rik orabo kop con pi bino a ŋat Atir, ame wun onyoni idoko wunu jo oketo erupe i kome kede jo oneke,

⁵³wun ame rik Obaŋa omio omalaika okelliwu cikere, cite mom ite gwoko wunu.”

⁵⁴Ka gin owinyo koppono, yigt owaŋ meicel, ote kayo lakgi i kome.

⁵⁵Cite Citefano ame onwoŋo opoŋ i Cuny Acil, oŋao waŋe i polo, te neno kwogo Obaŋa, kun Yecu ocuŋ i laŋet Obaŋa tuŋ cem.

⁵⁶Te kobo ni, “Koninen wunu ba, aneno polo oyabere, aco Wot a dano tye ocuŋ i kabedo me kwogo i laŋet Obaŋa tuŋ cem.”

⁵⁷Gin ducu ote wo kede dwon aloŋo kun oculo yitgi oko, ote mwomere i kome karacel,

⁵⁸cwaye teŋe i boma, nanapo en i gweŋe; ocaden oketo boŋŋigi i tyen awobi a nyiŋe Caulo.

⁵⁹Ento i kare ame gin tye ananapo Citefano, en okwao ni, “Rwot Yecu, gam cunya.”

⁶⁰Eka te rumo piny kun redo i dwon aloŋo ni, “Rwot, kur ikwan bal man i komgi.” Ka doŋ okobo man te to nino gire oko.