Read lango Tic Okwena 8 Bible Online

Tic Okwena 8 - lango bible

Tic Okwena 8

¹Caulo daŋ onwoŋo opwoo to mere-nono. I nino-nono ote cako wuno lwak jo oye Kricito ame tye i Jerucalem atek meicel; gin te ket ducu i lobo me Judaya kede Camaria, kono ka okwena keken en ate doŋ i Jerucalem.

²Jo a woro Obaŋa oyiko kom Citefano, ote daŋ koke meicel.

³Cite Caulo onwoŋo mito tyeko lwak jo oye Kricito luŋ, kun donyo i ot acel acel, wao iye co kede mon, ketogi i buc.

⁴Jo ame onwoŋo oket obedo wowota kun orabo amut aber.

⁵Pilipo rik oluŋere i paco moro me Camaria, te rabo pi Kricito baŋ jo kuno.

⁶Lwak oketo cunygi atek i kom gin a Pilipo okobo; kare ame gin owinyo koppere dok daŋ oneno anyuttogo a en otio.

⁷Pien jo apol a rik tye kede cen areco, cen oya oko i komgi kun oredo i dwon aloŋo; kede jo apol a rik two too me akwea kom kede aŋwal, daŋ ocaŋogi.

⁸Yomcuny i paco-nono rik doŋ te bedo adwoŋ okato kare oko.

⁹Ento i paco-nono rik tye iye lomoro a nyiŋe Cimon ame timo gigi mogo me jojok, ame rik en omio jo me Camaria luŋ wure; en rik kobo ni en e dano adwoŋ.

¹⁰Jo luŋ rik winye, jo atino kede adoŋo daŋ, kun okobo ni, “Dano man obedo teko Obaŋa ame olwoŋo ni, Teko Adwoŋ.”

¹¹Gin oketo cunygi i winyo koppere, pien pi kare alac en obedo miyogi wuro ticcere me jojokkono.

¹²Ento Pilipo orabo pi amut aber me loc Obaŋa kede nyiŋ Kricito, gin oye, ote batijagi oko, co kede mon.

¹³En Cimon ikome daŋ oye, ote batija en, mom doŋ te weko yo Pilipo; ka en obedo neno anyut apol kede taŋo adoŋo ame obedo timo, owuro.

¹⁴Okwena ame bedo i Jerucalem rik te winyo ni jo me Camaria daŋ doŋ ojolo kop Obaŋa; gin rik te oro baŋgi Petero kede Lakana.

¹⁵Gin owoto, ote wot kwayo Obaŋa pirgi, me gin daŋ onwoŋ Cuny Acil;

¹⁶pien rik mom ru opoto i kom ŋattoro i akinagi, ento obatijagi ka i nyiŋ Rwot Yecu keken.

¹⁷Petero kede Lakana rik te ke to ciŋgi i wigi, gin te nwoŋo Cuny Acil.

¹⁸Kare ame Cimon oneno ni jo onwoŋo Cuny Acil pi ciŋ ame okwena oketo i wigi, en okelli okwena lim,

¹⁹kun kobo ni, “An daŋ mia wunu kodi twer-ri, me wek ka an daŋ abino keto ciŋa i kom dano moro, dano-nono daŋ nwoŋ Cuny Acil.”

²⁰Cite Petero te kobbe ni, “Myero yin karacel i ciliŋ meri irweny wunu oko, pien itamo ni itwero nwoŋo mot Obaŋa kede lim!

²¹Yin mom itye kede dulloro ame opokki i kop man, pien cunyi mom atira i nyim Obaŋa.

²²Myero iŋut i kom timmi arac-ci, ite kwayo Rwot, me atot ya timmi kica i tam ame tye i cunyi-nono.

²³Pien aneni itye kede epio akec, aŋuc me bal otwei oko.”

²⁴Cimon te gamo ni, “Wun kwaya wunu Rwot, me ginnoro arac i kom kop ikobo wunu kur tun i koma.”

²⁵A doŋgin otyeko tuco kop me caden oko kede rabo kop a Rwot, rik ote dwogo gigi oko i Jerucalem, kun orabo amut aber i pacci apol me Camaria.

²⁶Amalaika a Rwot rik te kobbi Pilipo ni, “Ya iwot tutuŋ anyarolum i yo a dok tuŋ piny tuno naka i Gaja kun oya i Jerucalem.” (Mannono obedo yo a woto i tim)

²⁷Pilipo daŋ rik te ya wot. Oyot en te neno dano moro me Eciopia ame oroo oko, atic a Kandake adittere, ame onwoŋo abaka a dako me Eciopia; en rik ŋat ame onwoŋo kano lim abaka luŋ. En rik onwoŋo owoto i Jerucalem pi woro Obaŋa.

²⁸En onwoŋo doŋ adok kun obedo i wi gadigadi mere, akwano buk adwarpiny Icaya.

²⁹Cuny Obaŋa rik te kobbi Pilipo ni, “Wot iŋuk gadigadi ca, inywak kede yo.”

³⁰Pilipo te riŋo baŋe, te winyo en akwano buk adwarpiny Icaya, te penye ni, “Yin iniaŋ gin ame ikwano-nono?”

³¹En ogamo ni, “Atwero niaŋ niŋo aboŋo ŋattoro a gonnya tere?” En te cwano Pilipo ni yit bed karacel kede.

³²Dul a rik en akwano i coc a yam ocoo onwoŋo ene, ni, “Acalo romo ame atero me aneka, dok acalo atin romo a liŋ i nyim onyar yerrere, kittono en mom oŋamo gire doge.

³³Ka oturo dittere oko, okwero ŋolle kop atir. Ŋa kara a twero tito pi ikwae? Pien okwanyo kwo mere oko i wi lobo.”

³⁴Lon ame oroo-nu te penyo Pilipo ni, “Akwai, titta ba, kara adwarpiny okobo kop man i kom ŋa? I kome en kene, onyo i kom dano moro ocele?”

³⁵Pilipo te ero kop, ogeo i kom dul me coc a yam ocoo-naca, te tuno kede naka ititte amut aber i kom Yecu.

³⁶Ame gin rik pwod otye omedde i wotgi, gin te cop i pii moro, eka lon oroo ca te kobbi Pilipo ni, “Nen, kara pii do eŋeo! Ŋo a dok mona batija?” [

³⁷Pilipo te kobbe ni, “Ka ce iye kede cunyi ducu, twerre gire.” En te gamo ni, “Aye Yecu Kricito en Wot Obaŋa.”]

³⁸En te ciko ni gadigadi koŋ cuŋ, gin aryo ducu te yitto piny i pii, Pilipo gin kede lon ame oroo ca, ote batija en oko.

³⁹Ame gin doŋ oya oko i pii, Cuny a Rwot te tero Pilipo oko, lon ame oroo ca mom dok te medo nene; en gire te medde i wottere kun alelo meicel.

⁴⁰Cite rik ote bino neno Pilipo i Ajota. En obe bea i pacci ducu kun rabo amut aber, naka ka en obino i Kaicaria.